ၸုမ်းယိပ်းၵွင်ႈၵၢင်ႇ ၵဵပ်းၶွၼ်ႇ ရူတ်ႉၵႂႃႇမႃး ၼိူဝ်သဵၼ်ႈတၢင်း ၼမ်ႉဢုၼ်ႇ – တီးမႃႉ – တႃႈမိူင်းငႅၼ်း

ၶၢဝ်းတၢင်း 2-3 ဝၼ်းမႃးၼႆႉ ၸုမ်းယိပ်းၵွင်ႈၵၢင်ႇ ႁႄႉၵဵပ်းၶွၼ်ႇ ရူတ်ႉၵႃးၵႂႃႇမႃး ၼိူဝ်သဵၼ်ႈတၢင်း ၼမ်ႉဢုၼ်ႇ – တီးမႃႉ လႄႈ တႃႈမိူင်းငႅၼ်း။

ၸဝ်ႈၵႃး ဢၼ်ႁပ်ႉတေႃႉသူင်ႇၵူၼ်း မူႇၸေႊ – တႃႈမိူင်းငႅၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်သိုၵ်းၸုမ်းဢူၺ်းလီ ပွတ်း ႁွင်ႇ၊ ၶဝ်ပႂ်ႉၵဵပ်းတီႈတီးမႃႉၼၼ်ႉယဝ်ႉ ပဵၼ်သိုၵ်းၶၢင် တင်း သိုၵ်းတဢၢင်း ၶဝ်ပဵၼ်ႇၵၼ်ၵဵပ်း မိူဝ်ႈဢွၼ်ၼႃႈ 1 ဝၼ်း 2 ဝၼ်း ၼၼ်ႉ ပဵၼ်သိုၵ်းၶၢင်။ မိူဝ်ႈၼႆႉသမ်ႉ ပဵၼ်သိုၵ်းတဢၢင်းၵဵပ်း၊ ၶဝ်ၵဵပ်း ၼိုင်ႈလမ်းလႂ် 5 မိုၼ်ႇပျႃး” ဝႃႈၼႆ။

ယူႇတီႈၸုမ်းဢူၺ်းလီပွတ်းႁွင်ႇ ပႂ်ႉၵဵပ်းၶွၼ်ႇရူတ်ႉၵႃးၵႂႃႇမႃး ၼိူဝ်သဵၼ်ႈတၢင်း ၼမ်ႉဢုၼ်ႇ – တႃႈမိူင်းငႅၼ်းၼႆႉ တႄႇၵဵပ်း မႃးမိူဝ်ႈဝၼ်းတီႈ 21/8/2019 ယၢမ်းၵၢင်ၶမ်ႈ၊ တေႃႇထိုင်ဝၼ်းတီႈ 23/8/2019 ၼႆႉ မီးၶၢဝ်းတၢင်း 3 ဝၼ်းယဝ်ႉ။

ၸဝ်ႈၵႃး သိုပ်ႇလၢတ်ႈဝႃႈ “ တၢင်းပွတ်းတွၼ်ႈၼႆႉ မၼ်းပဵၼ်ၼႃႈတီႈသိုၵ်းဢူၺ်းလီပွတ်းႁွင်ႇ ယူႇဝႆႉၶႃႈယဝ်ႉ။ ၵမ်ႈၼမ် မိူဝ်ႈဢမ်ႇပဵၼ်ပၢင်တိုၵ်းၵၼ်ၼၼ်ႉ ပိူၼ်ႈဢွၼ်ၵၼ်လႅၼ်ႈၸွမ်းတၢင်းလူင် မူႇၸေႊ – ၼမ်ႉဢုၼ်ႇ – ၼမ်ႉၽၵ်းၵႃ – ၵူတ်ႉၶၢႆ ၵမ်းသိုဝ်ႈ။ ယွၼ်ႉဝႃႈ သဵၼ်ႈတၢင်းလူင်ၼၼ်ႉ မီးပၢင်တိုၵ်းလႄႈ ၸဝ်ႈၵႃးၵမ်ႈၼမ် ၸင်ႇဢွၼ်ၵၼ်မႃးလႅၼ်ႈ တၢင်းသဵၼ်ႈၼႆႉယဝ်ႉ” ဝႃႈၼႆ။

သဵၼ်ႈတၢင်း မူႇၸေႊ – ၼမ်ႉဢုၼ်ႇ – တီးမႃႉ – သျႅဝ်ႇၶေႃး – တႃႈမိူင်းငႅၼ်းၼႆႉ ပဵၼ်သဵၼ်ႈတၢင်းထိူၼ်ႇ ဢွင်ႈတီႈၸိူဝ်း ၼၼ်ႉ ပဵၼ်တီႈၸုမ်းဢူၺ်းလီပွတ်းႁွင်ႇ တူင်ႉၼိုင်။

ၸဝ်ႈၵႃး သိုပ်ႇလၢတ်ႈဝႃႈ “ သင်ဝႃႈ ပီႈၼွင်ႉႁဝ်း မႃးသဵၼ်ႈတၢင်းၼႆႉၸိုင် ႁႂ်ႈဢွၼ်ၵၼ်ဝႆႉသတိၽွင်ႈ။ ပေႃးၶဝ်ႁၼ်ၾူၼ်း ၸိုင် ၶဝ်တေသိမ်းဢဝ်လၢႆ။ ၶဝ်ၵူဝ်ပိူၼ်ႈထၢႆႇႁၢင်ႈ သူင်ႇၶၢဝ်ႇယူဝ်ႉထၢင်ႇတႄႉ။ လိူဝ်ၼၼ်ႉ ႁဝ်းဝႃႈ ဢမ်ႇမီး ငိုၼ်းၼႆ ၵေႃႈ ၶဝ်ၸႂ်ႉႁဝ်း ယွၼ်းၵူႈဢဝ်တီႈၵူၼ်းၶီႇမႃးၸွမ်းႁဝ်းၼၼ်ႉ သေပၼ်ၶဝ် ” ဝႃႈၼႆ။

ၵဵဝ်ႇလူၺ်ႈလွင်ႈၵႃး ႁပ်ႉတေႃႉသူင်ႇၵူၼ်း လႃႈသဵဝ်ႈ – မူႇၸေႊၼႆႉ ၸဝ်းၵႃး ၵမ်ႈၼမ် ဢမ်ႇႁတ်းတၢင်ႇၵူၼ်းၵႂႃႇၵမ်းလမ်း လမ်း။ ႁူမ်ႈၵၼ်သေ ဢွၵ်ႇၵႂႃႇၸွမ်းၵၼ် ပဵၼ်မူႇ။ ယွၼ်ႉဝႃႈ ပၢင်တိုၵ်းၵေႃႈယင်းတိုၵ်ႉမီးယူႇပဵၼ်တီႈ။ လႆႈဢွၼ်ၵၼ်ပၼ်ႇ လဵပ်ႈဝႄႈတီႈမီးပၢင်တိုၵ်းၼၼ်ႉ ဝႃႈၼႆ။

ၸဝ်ႈၵႃး ဢၼ်လႅၼ်ႈတၢင်ႇၵူၼ်း မူႇၸေႊ – လႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဢွၼ်တၢင်းတႄႉ လုၵ်ႉမူႇၸေႊ ၵႂႃႇလႃႈသဵဝ်ႈၼႆႉ လႆႈပၼ်ၵႃႈၵႃး ၼိုင်ႈၵေႃႉ ၼိုင်ႈမိုၼ်ႇပျႃး။ ဝၢႆးပဵၼ်ပၢင်တိုၵ်းမႃးၼႆႉ ၵႃႈၵႃး ၼိုင်ႈၵေႃႉလႂ် လႆႈၵဵပ်း ႁိမ်း 4 မိုၼ်ႇပျႃးပေႃးပဵၼ် မူႇၸေႊ ဝဵင်းလိူဝ်ႇ ပဵၼ်ႁႃႈမိုၼ်ႇပျႃး။ မိူဝ်ႈၵူႈပွၵ်ႈ ႁဝ်းၶႃႈ လႆႈလႅၼ်ႈသဵၼ်ႈတၢင်းလူင် မူႇၸႄႊ – လႃႈသဵဝ်ႈၵမ်းသိုဝ်ႈ လႆႈၸႂ်ႉၶၢဝ်း 6 ၸူဝ်ႈမူင်းသေႁေႃႈ။ တေႃႈလဵဝ်ၼႆႉ လႆႈၵႂႃႇတၢင်းၵူင်ႉလႄႈ လႆႈၸႂ်ႉၶၢဝ်းယၢမ်း တၢင်း ဝၼ်းၶႃႈယဝ်ႉ” ဝႃႈၼႆ။

တႄႇဢဝ် ဝၼ်းတီႈ 15/8/2019 မႃးၼႆႉသေ သိုၵ်းဢူၺ်းလီပွတ်းႁွင်ႇ 3 ၸုမ်း ႁူမ်ႈၵၼ် လူမ်ႇယိုဝ်း တီႈၸၼ်ႉၸွမ်သိုၵ်း မၢၼ်ႈ ၾၢႆႇပၢႆးၸၢၵ်ႈ / DSTA ပၢင်ႇႁူႈ ယဝ်ႉၵေႃႈ မႃးလူမ်ႇယိုဝ်းထႅင်ႈ တီႈၸႄႈဝဵင်းၼွင်ၶဵဝ် 5 တီႈ။ ၸဵမ်ၵူၼ်းမိူင်း၊ ပလိၵ်ႈ မၢၼ်ႈလႄႈ သိုၵ်းမၢၼ်ႈ လူႉတၢႆထင်တီႈ ဢမ်ႇယွမ်း 10 ၵေႃႉ ဝႃႈၼႆ။

ဝၢႆးၼၼ်ႉမႃး သိုၵ်းလူင်ပွင်ၸိုင်ႈမၢၼ်ႈ ထူဝ်းသိုၵ်းၶဝ်ႈတၢင်းၸိုင်ႈတႆးပွတ်းႁွင်ႇ တင်းၼမ်သေ လႆႈပဵၼ်ပၢင်တိုၵ်းၵၼ် တၢင်း ၸုမ်းဢူၺ်းလီပွတ်းႁွင်ႇမႃးႁၢဝ်ႈႁႅင်း တေႃႇထိုင်ယၢမ်းလဵဝ် ၵူၼ်းမိူင်းပွတ်းလႃႈသဵဝ်ႈ၊ သႅၼ်ဝီ၊ ၵူတ်ႉၶၢႆလႄႈ ၼမ်ႉ ၶမ်း လႆႈဢွၼ်ၵၼ်ပၢႆႈ မွၵ်ႈ 5,000 ပၢႆယဝ်ႉ ဝႃႈၼႆ။