ၵၢတ်ႇလႄႈ ႁူင်းႁဵၼ်းလူင်ပွင်ၸိုင်ႈ ၼႂ်းၸႄႈဝဵင်းၼမ်ႉၶမ်း ပိုတ်ႇၶိုၼ်းယဝ်ႉ

ႁူင်းႁဵၼ်းလႄႈၵၢတ်ႇ ၼႂ်းၸႄႈဝဵင်းၼမ်ႉၶမ်း ဢၼ်ပိၵ်ႉဢိုတ်းဝႆႉ ယွၼ်ႉပၢင်တိုၵ်းၼၼ်ႉ မိူဝ်ႈၼႆႉပိုတ်ႇၶိုၼ်းမိူၼ်ၵဝ်ႇယဝ်ႉ ဝႃႈၼႆ။

မိူဝ်ႈၼႆႉ ဝၼ်းတီႈ 23/8/2019 ဢမ်ႇမီးသဵင်ၵွင်ႈသဵင်မၢၵ်ႇယဝ်ႉလႄႈ ၵူၼ်းမိူင်းၼမ်ႉၶမ်း ဢွၼ်ၵၼ်တူင်ႉၼိုင်ၵႂႃႇမႃးၶိုၼ်း မိူၼ်ၵဝ်ႇ။ ႁူင်းႁဵၼ်းလူင်ပွင်ၸိုင်ႈ ၼႂ်းၸႄႈဝဵင်းၼမ်ႉၶမ်း ၸိူဝ်းပိၵ်ႉဝႆႉ ၼၼ်ႉၵေႃႈ ပိုတ်ႇၶိုၼ်းမိူၼ်ၵဝ်ႇယဝ်ႉ ဝႃႈၼႆ။

ၸၢႆးမၢဝ်း ၵူၼ်းပိုၼ်ႉတီႈၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵူၼ်းမိူင်း တူင်ႉၼိုင်ၵႂႃႇမႃး မိူၼ်ၵဝ်ႇၶိုၼ်းယဝ်ႉ။ ၵၢတ်ႇၵေႃႈ ပိုတ်ႇၶိုၼ်းမိူၼ်ၵဝ်ႇ၊ ႁူင်းႁဵၼ်းၵေႃႈ ပိုတ်ႇၶိုၼ်ႈၶိုၼ်းယဝ်ႉ။ ၵူၺ်းၵႃႈ မိူဝ်ႈၼႆႉ ၾူၼ်တူၵ်းႁႅင်းၼႃႈ တွၼ်ႈၵၢင် ၼႂ်ၼႆႉ လုၵ်ႈႁဵၼ်းမၢင်ၵေႃႉ ဢမ်ႇၵႂႃႇၶိုၼ်ႈႁူင်းႁဵၼ်းၵၼ်ၵေႃႈမီးယူႇ။ သဵင်ၵွင်ႈၵေႃႈ ယဵၼ်ဝႆႉယူႇ” ဝႃႈၼႆ။

မိူဝ်ႈဝႃး ဝၼ်းတီႈ 22/8/2019 ယၢမ်းၵၢင်ၼႂ် 10 မူင်း ၼၼ်ႉ သဵင်မၢၵ်ႇၵွင်ႈ၊ မၢၵ်ႇလူင်တႅၵ်ႇႁိမ်းဝၢၼ်ႈၵွင်းဝႆး လႄႈ ဝၢၼ်ႈ ၸေႈႁၢႆး ၼႂ်းၸႄႈဝဵင်းၼမ်ႉၶမ်း။ ၵူၼ်းမိူင်းပိုၼ်ႉတီႈ ဢွၼ်ၵၼ်တူၵ်းၸႂ် တိုၼ်ႇသၢၼ်ႈ ပိၵ်ႉၵၢတ်ႇ သွင်ႉပွၵ်ႈႁိူၼ်း၊ ႁူင်း ႁဵၼ်းလူင်ပွင်ၸိုင်ႈ ၵေႃႈၼႅတ်ႈပွႆႇလုၵ်ႈႁဵၼ်းမိူဝ်းႁိူၼ်းၸဵမ်ၸဝ်ႉ။

မိူဝ်ႈဝႃးၵူၺ်းၼင်ႇၵဝ်ႇ သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်း 3 ငႃးသေ ၶိုၼ်ႈၵႂႃႇတၢင်း ဝၢၼ်ႈႁူဝ်ၼႃး ငႃးၼိုင်ႈ၊ တၢင်းဝၢၼ်ႈ သၶၢၼ်းမႂ်ႇ ငႃးၼိုင်ႈ လႄႈ တၢင်းဝၢၼ်ႈၵွင်းဝႆး ငႃးၼိုင်ႈၼၼ်ႉၵေႃႈ တေႃႈထိုင်ယၢမ်းလဵဝ်၊ ပႆႇႁၼ် ထွႆထွၼ်ပွၵ်ႈၶိုၼ်း ၵူၼ်း ၼမ်ႉၶမ်းလၢတ်ႈ။

ၵူၼ်းပိုၼ်ႉတီႈ ၼမ်ႉၶမ်း ၽူႈၸၢႆး ဢႃယု မွၵ်ႈ 35 ပီ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ဢမ်ႇလႆႈ ငိၼ်းသဵင်ၵွင်ႈသင် လႅပ်ႈၾူၼ်တူၵ်းႁႅင်းလႄႈ ၶဝ်ဢမ်ႇယိုဝ်းၵၼ်ယူဝ်ႉ။ သိုၵ်းမၢၼ်ႈဢၼ်ၶိုၼ်ႈၵႂႃႇတၢင်း ဝၢၼ်ႈႁူဝ်ၼႃး၊ ဝၢၼ်ႈသၶၢၼ်းမႂ်ႇ လႄႈ ဝၢၼ်ႈၵွင်းဝႆးၼၼ်ႉၵေႃႈ ဢမ်ႇပႆႇႁၼ်ၶဝ်ပွၵ်ႈၶိုၼ်း။ ဢမ်ႇၼၼ် ၶဝ်သိုပ်ႇၵႂႃႇ တၢင်ႇတီႈထႅင်ႈယူဝ်ႉ ထၢင်ႇတႄႉ” ဝႃႈၼႆ။

ဢိင်ၼိူဝ် လွင်ႈပဵၼ်ပၢင်တိုၵ်းၵၼ်ႁိမ်းဝၢၼ်ႈၵွင်းဝႆးၼၼ်ႉသေ ၵူၼ်းဝၢၼ်ႈၵွင်းဝႆး 200 ပၢႆ လႆႈဢွၼ်ၵၼ်ပၢႆႈသွၼ်ႈယူႇဝႆႉ တီႈ ထမ်ႇမရုင်ႇ ၵွင်းတပ်ႉ ဝႃႈၼႆ။

မိူဝ်ႈၼႆႉ ဝၼ်းတီႈ 23/8/2019 ၼႆႉ သိုၵ်းဢူၺ်းလီပွတ်းႁွင်ႇ တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ် ၼႂ်း ၵႄႈၵူတ်ႉၶၢႆ – မူႇၸေႊ။

တႄႇဢဝ် ဝၼ်းတီႈ 15 လိူၼ်ဢေႃႊၵတ်ႊသ်ၼႆႉမႃး ၸုမ်းဢူၺ်းလီပွတ်းႁွင်ႇ 3 ၸုမ်း လႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ် တၢင်းၸိုင်ႈတႆးပွတ်းႁွင်ႇ။ ယွၼ်ႉသိုၵ်းလူင်ပွင်ၸိုင်ႈမၢၼ်ႈ ထႅမ်ႁႅင်းသိုၵ်းၶိုၼ်ႈ ပွတ်းႁွင်ႇ တင်းၼမ် သေ တေႃႇထိုင်မိူဝ်ႈလဵဝ် လႆႈပဵၼ်ပၢင်တိုၵ်းၵၼ် ၵူႈဝၼ်း ဝႃႈၼႆ။