ၾူၼ်လူမ်းတူၵ်းထပ်းၵၼ်လၢႆဝၼ်း ၼမ်ႉလုပ်ႇၼွင်းထူမ်ႈ တၢင်းပွၵ်ႉၸွၼ်ႊၸူဝ်ႇ လႄႈ တီႈၶူင်ႈ တီႈယၢၼ်း ၼႂ်းၸႄႈ ဝဵင်းမူႇၸေႊ လႅၼ်လိၼ်တႆး – ၶႄႇ ၸိုင်ႈတႆးပွတ်းႁွင်ႇ။

မိူဝ်ႈဝႃး ဝၼ်းတီႈ 22/8/2019 ယၢမ်းၵၢင်ၶမ်ႈ ၾူၼ်တူၵ်းႁၢဝ်ႈႁႅင်းလႄႈ ၼမ်ႉလုပ်ႇၼွင်းထူမ်ႈ ၼႂ်းပွၵ်ႉၸွၼ်ႊၸူဝ်ႇ၊ ပွတ်း မၢၼ်ႈဝဵင်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ထူမ်ႈထိုင်ၼႂ်းႁိူၼ်းၵူၼ်းဝၢၼ်ႈ ရူတ်ႉၵႃးၵေႃႈ ၺႃးထူမ်ႈၸွမ်း။

ၸၢႆးမူဝ်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းပွၵ်ႉၸွၼ်ႊၸူဝ်ႇ ၸိူဝ်းဢွင်ႈတီႈၶူင်ႈယၢၼ်း ဢၼ်ၼမ်ႉထူမ်ႈႁၢဝ်ႈ ႁႅင်းၼႆႉ ပေႃးသွၼ်ႇပႃးပွၵ်ႈၼႆႉ ၼႂ်းပီၼႆႉၵူၺ်း ပဵၼ် 4 ပွၵ်ႈယဝ်ႉ။ ပေႃးၾူၼ်တူၵ်းႁႅင်းၵေႃႈ ၼမ်ႉၵေႃႈထူမ်ႈ။ ႁွင်ႈၼမ်ႉ၊ လၢႆႇၼမ်ႉ ဢၼ်လႆၼႂ်းဝဵင်းမူႇၸေႊၼႆႉ ယွၼ်ႉၵူၼ်းႁဝ်းဢမ်ႇမီးပၵ်းပိူင်သေ ဢဝ်ယုၵ်းယၵ်းပႅတ်ႈတူၵ်းသႂ်ႇတိၵ်းတိၵ်း လႄႈ ယုၵ်းယၵ်း ဢိုတ်းၶမ်။ ပေႃးၾူၼ်တူၵ်းႁႅင်း ၼမ်ႉတိုၼ်းထူမ်ႈႁၢဝ်ႈႁႅင်းၵမ်းလဵဝ်” ဝႃႈၼႆ။

ၼမ်ႉထူမ်ႈတီႈပွၵ်ႉၸွၼ်ႊၸူဝ်ႇၼၼ်ႉ ထူမ်ႈႁိူၼ်းၵူၼ်းဝၢၼ်ႈမွၵ်ႈ 10 လင်၊ ၵႃႈလမ်းၼိုင်ႈ။ ၽူႈမီးပုၼ်ႈၽွၼ်း ၵူၼ်းဝၢၼ်ႈ ဢွၼ်ၵၼ်ဢဝ်ယုၵ်းယၵ်းဢွၵ်ႇ ၼမ်ႉၸင်ႇယူပ်ႈလူင်း။ လိူဝ်ၼၼ်ႉ တီႈၶူဝ်ၼမ်ႉပေႃႈၵေႃႈ ၵႃးလမ်းၼိုင်ႈ လႆလွင်ႈၸွမ်း ၼမ်ႉၼင်ႇၵဝ်ႇ ဝႃႈၼႆ။

ၸၢႆးၵျေႃႇတဵင်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ႁွင်ႈၼမ်ႉ၊ လၢႆႇၼမ်ႉ ၼႂ်းဝဵင်းမူႇၸေႊၼႆႉမၼ်းတိုၼ်ႈ။ ယုၵ်းယၵ်းၶမ်။ မိူၼ်ၼင်ႇ ဢွင်ႈတီႈယၢၼ်း တီႈတႅမ်ႈ ၸိူဝ်းတၢင်းပွတ်း ၸွၼ်ႊၸူဝ်ႇလႄႈ မၢၼ်ႈပဵင်း ၸိူဝ်းၼၼ်ႉ ၺႃးၼမ်ႉထူမ်ႈတိၵ်းတိၵ်း”ဝႃႈၼႆ။

ယွၼ်ႉၼၼ် ႁႂ်ႈၵူၼ်းမိူင်းမူႇၸေႊဢွၼ်ၵၼ်ပႅတ်ႈယုၵ်းယၵ်း ၸွမ်းပၵ်းပိူင် ပေႃးယုၵ်းယၵ်း ဢမ်ႇၶမ်ႁွင်ႈ၊ ၼမ်ႉၵေႃႈ တေလူၼ်ႉၾင်ႇၶိုၼ်ႈမႃးထူမ်ႈႁိူၼ်းၵူၼ်း ၸၢႆးၵျေႃႇတဵင်း ၽူႈတႅၼ်းသၽႃး တုၵ်းယွၼ်းလၢတ်ႈၼႄၼင်ႇၼႆ။

ဢေးပီ ၵူၼ်းမိူင်းမူႇၸေႊ လၢတ်ႈတီႈၽူႈတွႆႇႁွၵ်ႈ “ ၾၢႆႇလိူမ်ႈလႆႇ ၶဝ်မႃးၵဵပ်းငိုၼ်းပႅတ်ႈယုၵ်းယၵ်းယူႇ တႃႇသေႇ။ ၵူၺ်းၵႃႈ ပုင်းယုၵ်းယၵ်းဢမ်ႇဝႆႉပၼ်။ ၸွမ်းသဵၼ်ႈတၢင်းၵေႃႈ ယုၵ်းယၵ်းပဵၼ်ၵွင် မဵၼ်တူႇမဵၼ်ၼဝ်ႈ ဢမ်ႇမႃးၵဵပ်းဢမ်ႇမႃးၽဵဝ်ႈ။ ၵူၼ်းမိူင်းၸူးငၢႆႈသေ ဢွၼ်ၵၼ်ပႅတ်ႈတူၵ်းၼႂ်းၼမ်ႉႁွင်ႈ ၵွပ်ႈၼၼ်ၺႃး ၼမ်ႉထူမ်ႈ” ဝႃႈၼႆ။

တီႈဝဵင်းမူႇၸေႊၼႆႉ ယွၼ်ႉပိူဝ်ႈၶွမ်ႊပၼီႊၽဵဝ်ႈယုၵ်းယၵ်းဢမ်ႇႁဵတ်းၵၢၼ်၊ ၾၢႆႇလိူမ်ႈလႆႇၵေႃႈ ဢမ်ႇၸတ်းၵၢၼ်ပၼ်လႆႈ ထိုင်တီႈလႄႈ ပၼ်ႁႃတီႈပႅတ်ႈယုၵ်းယၵ်းၼႆႉ ပႆႇၵႄႈလႆႈမီးမႃး 3-4 ပီ တေႃႇထိုင်ယၢမ်းလဵဝ်။