ငိၼ်းသဵင်ၵွင်ႈတႅၵ်ႇ ၼႂ်းၸႄႈဝဵင်းၼမ်ႉၶမ်း ႁူင်းႁဵၼ်းလူင်ပွင်ၸိုင်ႈ ပွႆႇလုၵ်ႈႁဵၼ်းမိူဝ်းၸဵမ်ၸဝ်ႉ

မိူဝ်ႈၼႆႉ ဝၼ်းတီႈ 22/8/2019 ယၢမ်းၵၢင်ၼႂ် 10 မူင်း လႆႈငိၼ်းသဵင်ၵွင်ႈ၊ မၢၵ်ႇလူင်တႅၵ်ႇ ၼႂ်းၸႄႈဝဵင်းၼမ်ႉၶမ်းသေ ႁူင်း ႁဵၼ်းလူင်ပွင်ၸိုင်ႈလႄႈ ၵၢတ်ႇ လႆႈပိၵ်ႉပႅတ်ႈမူတ်း ၵူၼ်းပိုၼ်ႉတီႈၼမ်ႉၶမ်းလၢတ်ႈ။

ယွၼ်ႉမၢၵ်ႇၵွင်ႈ မၢၵ်ႇလူင်တႅၵ်ႇႁိမ်းဝၢၼ်ႈၸေႈႁၢႆး ၸႄႈဝဵင်းၼမ်ႉၶမ်းသေ ၵူၼ်းမိူင်း ပိုၼ်ႉတီႈ ဢွၼ်ၵၼ်တူၵ်းၸႂ် တိုၼ်ႇ သၢၼ်ႈ ဢွၼ်ၵၼ်ပိၵ်ႉၵၢတ်ႇ သွင်ႉပွၵ်ႈႁိူၼ်းၵၼ်၊ ႁူင်းႁဵၼ်းလူင်ပွင်ၸိုင်ႈၵေႃႈၼႅတ်ႈပွႆႇလုၵ်ႈႁဵၼ်းမိူဝ်းႁိူၼ်းၸဵမ်ၸဝ်ႉ။

ၸၢႆးမိူင်း ၵူၼ်းဝၢၼ်ႈၸေႊႁၢႆး လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းသဵင်ၵွင်ႈ၊ သဵင်မၢၵ်ႇလူင် တႅၵ်ႇၶႃႈဢေႃႈ။ လႆႈႁၼ် ၵႂၼ်းၾႆးဢုၺ်၊ ယွၼ်ႉၼၼ် လုၵ်ႈႁဵၼ်း ဢွၼ်ၵၼ်ပွၵ်ႈႁိူၼ်းမူတ်းယဝ်ႉ။ ၵၢတ်ႇၵေႃႈပိၵ်ႉသေ ပွၵ်ႈႁိူၼ်းၵၼ်မူတ်းယဝ်ႉ” ဝႃႈၼႆ။

မိူဝ်ႈၼႆႉ သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်း 3 ငႃးသေ ၶိုၼ်ႈၵႂႃႇတၢင်း ဝၢၼ်ႈႁူဝ်ၼႃးငႃးၼိုင်ႈ၊ တၢင်းဝၢၼ်ႈသၶၢၼ်းမႂ်ႇ ငႃးၼိုင်ႈ လႄႈ တၢင်းဝၢၼ်ႈၵွင်းဝႆး ငႃးၼိုင်ႈ ၵူၼ်းၼမ်ႉၶမ်းလၢတ်ႈ။

ၵူၼ်းမိူင်းၼမ်ႉၶမ်း ဢႃယု မွၵ်ႈ 30 ပီပၢႆ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် သဵင်ၵွင်ႈတႅၵ်ႇဝႆႉတႄႉ လႆႈငိၼ်းမႃးတၢင်း ဝၢၼ်ႈၵွင်းဝဵင်း ၵူၼ်းဝၢၼ်ႈၼမ်ႉပၢၼ်းၶဝ် လႆႈငိၼ်းသဵင်ၵွင်ႈမၢၵ်ႇတႅၵ်ႇသေ ဢွၼ်ၵၼ်ပၢႆႈမႃး တၢင်းၸေႊႁၢႆးဝႆႉ ” ဝႃႈၼႆ။

ဝၢၼ်ႈၵွင်းဝႆးၼႆႉ ၵမ်ႈၼမ်ပဵၼ်ပီႈၼွင်ႉၸၢဝ်းတဢၢင်းယူႇသဝ်း ယၢၼ်ၵႆၵၼ်တင်းဝဵင်းၼမ်ႉၶမ်း မွၵ်ႈ 10 လၵ်း ဝႃႈၼႆ။

ၸဝ်ႈႁၢၼ် တႃႉဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ယၢမ်းၵၢင်ၼႂ် ႁဝ်းၶႃႈတင်း တပ်ႉသိုၵ်း မၢၼ်ႈ ပဵၼ်ပၢင်တိုၵ်းၵၼ် တၢင်းၼိူဝ်ဝၢၼ်ႈၵွင်းဝႆး။ ၵူၺ်းၵႃႈ ႁူဝ်ယွႆႈမၼ်းတႄႉ ပႆႇႁူႉ” ဝႃႈၼႆ။

တႄႇဢဝ် ဝၼ်းတီႈ 15 လိူၼ်ဢေႃႊၵတ်ႊသ်ၼႆႉမႃး ၸုမ်းဢူၺ်းလီပွတ်းႁွင်ႇ 3 ၸုမ်း လႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ် တၢင်းၸိုင်ႈတႆးပွတ်းႁွင်ႇ။ ယွၼ်ႉသိုၵ်းလူင်ပွင်ၸိုင်ႈမၢၼ်ႈ ထႅမ်ႁႅင်းသိုၵ်းၶိုၼ်ႈ ပွတ်းႁွင်ႇ တင်းၼမ်သေ တေႃႇထိုင်မိူဝ်ႈလဵဝ် လႆႈပဵၼ်ပၢင်တိုၵ်းၵၼ် ၵူႈဝၼ်း ဝႃႈၼႆ။

မိူဝ်ႈဝႃး ဝၼ်းတီႈ 20 ၵေႃႈ သုၼ်ႊၵေႃႊသျႅင်ႊ ၽွင်းလူင်ၶိုၵ်ႉတွၼ်းၶႄႇ ၵဵဝ်ႇလူၺ်ႈၵုၼ်ဢေႊသျိူဝ်ႊ ႁွင်ႉဢဝ် ၸုမ်းဢူၺ်း လီပွတ်းႁွင်ႇ ႁူပ်ႉဢုပ်ႇၵၼ်တီႈဝဵင်းၶုၼ်းမိင် ၸိုင်ႈမိူင်းၶႄႇ ဝႃႈၼႆ။