ႁူဝ်ၼႃႈပျီႇတူႉၸိတ်ႉ လႄႈ တင်းမေးၼၢင်း ဢိူင်ႇမိူင်းယၢင်း ၸႄႈဝဵင်းလႃႈသဵဝ်ႈ ၺႃးၸုမ်းဢမ်ႇႁူႉၸၵ်း ၶဝ်ႈယိုဝ်းတၢႆ သွင် ပူႇဢွၵ်ႇၽူဝ်မေး။

ဝၼ်းတီႈ 20/8/2019 ယၢမ်းၵၢင်ၶမ်ႈ မွၵ်ႈ 8 မူင်းၶိုင်ႈၼၼ်ႉ မီးၵူၼ်းဢမ်ႇႁူႉၸၵ်း ၸုမ်းမႃးယိုဝ်း လုင်းဝိၼ်းမွင်ႇ ႁူဝ်ၼႃႈပျီႇ တူႉၸိတ်ႉ ပိုၼ်ႉတီႈလႄႈ မေးၼၢင်း ပႃႈမျႃႉ ဢၼ်မီးတီႈမၢၼ်ႈၵွင်း ဢိူင်ႇမိူင်းယၢင်း။ မီးၾၢႆႇဢွၵ်ႇၸႄႈဝဵင်းလႃႈသဵဝ်ႈ မွၵ်ႈ 20 လၵ်း။

ၸၢႆးႁၢၼ်ႇ ႁူဝ်ပဝ်ႈၸုမ်းၵူၼ်းၼုမ်ႇတႆး TYO ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ဝၼ်းတီႈ 20 ယၢမ်းၵၢင်ၶမ်ႈ မွၵ်ႈ 8 မူင်းၶိုင်ႈၼၼ်ႉ ပိူၼ်ႈမႃးယိုဝ်းၶႃႈ။ ပဵၼ်ၸုမ်းယိပ်းၵွင်ႈၵၢင်ႇ ၸုမ်းလႂ်တႄႉ ဢမ်ႇႁူႉ။ ဢၼ်လႆႈလူႉတၢႆၵႂႃႇၼႆႉ ပဵၼ် ႁူဝ်ၼႃႈပျီႇတူႉၸိတ်ႉ ပိုၼ်ႉတီႈ လုင်းဝိၼ်းမွင်ႇ ဢႃ ယု 60 ပီလႄႈ မေးၼၢင်း ပႃႈမျႃႉ ဢႃယု 58 ပီ။ လၢၼ်ဢွၼ်ႇၶဝ် ဢႃယု 16 ပီတႄႉ တၼ်းပၢႆႈလွတ်ႈၵႂႃႇ” ဝႃႈၼႆ။

ၵူၼ်းၶဝ်ႈမႃးယိုဝ်းၼၼ်ႉ ယိုဝ်းသေဢမ်ႇ ၵႃး၊ ပွႆႇမၢၵ်ႇသႂ်ႇထႅင်ႈ။ ရူတ်ႉၶိူင်ႈ၊ ထေႃႈ ဢၼ်ၵိုတ်းဝႆႉၼႂ်းဝၢင်းႁိူၼ်းၶဝ်ၼၼ်ႉ ၵေႃႈ ၽဝ်ပႅတ်ႈမူတ်း ဝႃႈၼႆ။

ၸၢႆးႁၢၼ်ႇ သိုပ်ႇလၢတ်ႈဝႃႈ “ ဝၼ်းတီႈ 21/8/2019 ယၢမ်းၵၢင်ၼႂ် ႁဝ်းၶႃႈ လႆႈႁွတ်ႈၽႅဝ်တီႈႁိူၼ်းဢူးဝိၼ်းမွင်ႇၶဝ်၊ လႆႈထူပ်း ႁၼ် သွႆႉမၢၵ်ႇၵွင်ႈႁွႆႈႁူဝ်ႉဝႆႉယူႇ ၸိူင်ႉၼၼ်။ ၶွၵ်ႇမၢၵ်ႇၵွင်ႈ၊ ႁွႆးမၢၵ်ႇတႅၵ်ႇမၢၵ်ႇပွမ်းဢၼ်ပႆႇတႅၵ်ႇလႄႈ တီႈၾႆးမႆႈ ၸိူဝ်း ၼၼ်ႉ။ တူဝ်တၢႆ လုင်းဝိၼ်းမွင်ႇတႄႉ လႆႈထူပ်းႁၼ် မီးၼႂ်းႁွင်ႈၼမ်ႉ။ ပႃႈမျႃႉ သမ်ႉ တိူဝ်ႉၺႃးမၢၵ်ႇသေ လူမ်ႉတၢႆဝႆႉ တီႈ ၸဵင်ႇႁိူၼ်း” ဝႃႈၼႆ။

ၵူၼ်းပိုၼ်ႉတီႈ မၢၼ်ႈၵွင်း လၢတ်ႈဝႃႈ “ ၸုမ်းဢၼ်မႃးယိုဝ်းႁိူၼ်းပျီႇတူႉၸိတ်ႉလုင်းဝိၼ်းမွင်ႇၼႆႉ လႆႈငိၼ်းၶဝ်လၢတ်ႈ ၵႂၢမ်းၶႄႇတေႃႇၵၼ် ဢၼ်ၶဝ်ၶဝ်ႈမႃးယိုဝ်းၼၼ်ႉ မွၵ်ႈ 8 မူင်းၶိုင်ႈထိုင် 9 မူင်းၶိုင်ႈ။ တၢင်းမိူင်းယၢင်းၼႆႉ ပၢင်တိုၵ်းတႄႉ ဢမ်ႇမီး။ သိုၵ်းမၢၼ်ႈၵေႃႈႁိုင်ႁိုင်မႃးၼိုင်ႈပွၵ်ႈၵူၺ်း” ဝႃႈၼႆ။

ၶမ်ႈၼၼ်ႉ ၵူၼ်းဝၢၼ်ႈဢွၼ်ၵၼ် တူၵ်းၸႂ်တိုၼ်ႇသၢၼ်ႈၵၼ်သေ ၼႅတ်ႈဢွၼ်ၵၼ်ပၢႆႈၵႂႃႇသွၼ်ႈတီႈဝတ်ႉ ဝႃႈၼႆ။

တေႃႈလဵဝ် တူဝ်တၢႆ လုင်းဝိၼ်းမွင်ႇတင်း ပႃႈမျႃႉၼႆႉ ယူႇတီႈၸုမ်းၸွႆႈထႅမ် ၽေးၵိုင်ႉၵၢင်ႉလႃႈသဵဝ်ႈ လႆႈၵႂႃႇၸွႆႈဢဝ်ဢွၵ်ႇ မႃးသေ လႆႈသူင်ႇဝႆႉတီႈႁူင်းယႃ လႃႈသဵဝ်ႈယဝ်ႉ ဝႃႈၼႆ။