ၾႆးႁုပ်ႇမႆႈႁိူၼ်းၵူၼ်းဝၢၼ်ႈ ဢၼ်ပိုတ်ႇႁၢၼ်ႉၶၢႆၼမ်ႉမၼ်းလႄႈ ဢၼ်ပိုတ်ႇဝႆႉပႃး တႃႈရူတ်ႉ သျၢၼ်းမိၼ်းတႃး (ရှမ်းမင်း သားယာဉ်လိုင်း ဂိတ်) ၵိုၵ်းႁိူၼ်းတီႈ ၼႂ်းၸႄႈဝဵင်းမိူင်းသၢတ်ႇ၊ လွင်ႈၵူၼ်းလူႉတၢႆမၢတ်ႇၸဵပ်း ဢမ်ႇမီး။
ဝၼ်းတီႈ 21/8/2019 ယၢမ်းဝၢႆးဝၼ်း ၾႆးမႆႈ ႁိူၼ်းလုင်းၵျေႃႇတိၼ်ႉ လႄႈ ပႃႈမိၼ်ႉဢွင်ႇ ပွၵ်ႉဝၢၼ်ႈၵျွင်း ဢိူင်ႇမႄႈသွၼ် ႁွင်ႇ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။ ၾႆးလုၵ်ႉမႆႈ ၽွင်းတိုၵ်ႉသႂ်ႇၼမ်ႉမၼ်းၵႃး ဝႃႈၼႆ။
ၸၢႆးလူင် ၵူၼ်းၼုမ်ႇတႆး မိူင်းသၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ “ၶဝ်ဝႃႈတႄႉ မၼ်းလုၵ်ႉမႆႈမႃး မိူဝ်ႈၽွင်းလုၵ်ႈၸၢႆးၶဝ် ၸၢႆး ၵႅဝ်ႈ တိုၵ်ႉသႂ်ႇၼမ်ႉမၼ်းၵႃးၼၼ်ႉ၊ ၵႃးၵေႃႈသမ်ႉၼူဝ်းၶိူင်ႈၸၢၵ်ႈဝႆႉ၊ မိူဝ်ႈၽွင်းၼၼ်ႉ လုၵ်ႈၸၢႆးၶဝ်သမ်ႉ ပၢႆႇၾႆးလႅၼ်း ယႃႈတူၵ်းသႂ်ႇလႄႈ လုၵ်ႉႁုပ်ႇမႆႈမႃး တီႈၵႃးၶဝ်ၼၼ်ႉဢွၼ်တၢင်း” ဝႃႈၼႆ။
ၾႆးၼႆႉ လုၵ်ႉမႆႈတီႈၵႃးသေ လၢမ်းမႆႈႁိူၼ်း ႁၢၼ်ႉၶၢႆၼမ်ႉမၼ်းလႄႈ ဢွင်ႈတီႈႁပ်ႉၵူၼ်းၶီႇရူတ်ႉသေ ယဝ်ႉၵေႃႈ မႆႈပႃး ထႅင်ႈ ရူတ်ႉၶိူင်ႈသွင်လမ်း ဝႃႈၼႆ။
ၸၢႆးလူင် လၢတ်ႈဝႃႈ “ မႆႈမူတ်းၶႃႈယဝ်ႉ ၵႃးလမ်းၼိုင်ႈ၊ ရူတ်ႉၶိူင်ႈ 2 လမ်းလႄႈ ႁိူၼ်း။ ဢမ်ႇတၼ်းလႆႈၶူဝ်းၶွင်သင်။ ၵူၼ်း တႄႉ ဢမ်ႇတၼ်းပဵၼ်သင်ၵၼ်ၶႃႈ တၼ်းပၢႆႈလွတ်ႈၽေးၵၼ်ၵူႈၵေႃႉယူႇ။ ယွၼ်ႉဝႆႉမဝ်မၢင်ၶႃႈဢေႃႈ လွင်ႈၼမ်ႉမၼ်း၊ ၵႅတ်ႉ လႄႈ ၾႆးၶိတ်ႇၼႆႉ ယႃႇဝႆႉၸမ်ၵၼ်လႃးလႃး မၼ်းဝႆးၼႃႇ။ လွင်ႈလူႉသုမ်းတင်းမူတ်း မႅၼ်ႈၵႃႈႁိုဝ် ဢၼ်ဝႃႈ ၼၼ်ႉတႄႉ ဢမ်ႇလႆႈႁူႉ ” ဝႃႈၼႆ။
ၵဵဝ်ႇၵပ်းလွင်ႈၾႆးမႆႈၼႆႉ ၵူၼ်းႁိမ်းႁွမ်း၊ ၾၢႆႇၶႄၾႆး၊ ပလိၵ်ႈ၊ သိုၵ်းလူင်ပွင်ၸိုင်ႈမၢၼ်ႈ ႁူမ်ႈၵၼ် ၸွႆႈၶႄ မီးရူတ်ႉၶႄၾႆး မႃး ၸွႆႈႁူတ်း မွၵ်ႈ 3 လမ်းၼႆႉ ဝႃႈၼႆ။
ၵူၼ်းပိုၼ်ႉတီႈ ပွၵ်ႉဝၢၼ်ႈၵျွင်း လၢတ်ႈဝႃႈ “ ၵူၼ်းဝၢၼ်ႈ ၸဝ်ႈၼႃႈတီႈ လၢႆလၢႆၾၢႆႇ ႁူမ်ႈၵၼ်သေ ၸွႆႈၶႄၶႃႈဢေႃႈ။ တင်း မူတ်း မီးရူတ်ႉႁူတ်းၾႆး မႃးႁူတ်းၸွႆႈ တေမီးမွၵ်ႈ 3 လမ်းၼႆႉၶႃႈ။ သင်ဝႃႈ ဢမ်ႇမႃးၸွႆႈၶႄၶိုတ်းတၼ်းတႄႉ ၸၢင်ႈ လၢမ်းမႆႈ ပႃးႁိူၼ်းႁိမ်းႁွမ်းၼၼ်ႉၶႃႈယဝ်ႉ။ ယွၼ်ႉဝႃႈ တီႈပွၵ်ႉၼႆႉ လင်ႁိူၼ်းတိတ်းၸပ်းၵၼ်ၼႃႇ။ ပေႃးဢမ်ႇတၼ်း ၶိုတ်းတႄႉ လၢမ်းမႆႈႁိူၼ်းႁိမ်းႁွမ်းဢမ်ႇၵႃး ၸၢင်ႈလၢမ်းမႆႈပႃးဝတ်ႉထႅင်ႈၵွၼ်ႇ” ဝႃႈၼႆ။
ၾႆးမႆႈႁိူၼ်းလုင်းၵျေႃႇတိၼ်ႉ လႄႈ ပႃႈမိၼ်ႉဢွင်ႇၼႆႉ ပဵၼ်ႁိူၼ်းဢုတ်ႇၸၼ်ႉလဵဝ် တီႈႁိူၼ်းၼၼ်ႉ ပိုတ်ႇဝႆႉ ႁၢၼ်ႉၶၢႆၼမ်ႉ မၼ်းလႄႈ တႃႈရူတ်ႉႁပ်ႉၵူၼ်း ဢွၵ်ႈတၢင်း။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၶဝ် လႆႈပိုတ်ႇလိူင်ႈၸဝ်ႈၶွင်ႁိူၼ်းဝႆႉ လွင်ႈဝႆႉမဝ်မၢင် လွင်ႈၾႆး တီႈလုမ်းပလိၵ်ႈၸႄႈဝဵင်း မိူင်းသၢတ်ႇ ဝႃႈၼႆ။
