ပလိၵ်ႈထႆးၵူတ်ႇထတ်း ယိုတ်းလႆႈယႃႈတင်းၼမ်သေ တီႉၺွပ်းသွင်ၵေႃႉၽူဝ်မေး ၸိူဝ်းၶဝ်ဝႃႈ လႆႈႁပ်ႉတေႃႉသူင်ႇယႃႈတီႈ ၸၢဝ်းတႆး။

ဝၼ်းတီႈ 20/08/2019 ပလိၵ်ႈထႆးၽၢၵ်ႈ 5 ၵဵင်းမႆႇ လႆႈတီႉၺွပ်းတူဝ် ၸၢႆးသူႊၽၶျႆႊ ၵမူၼ်ႊလၢတ်ႊ ဢႃယု 49 ပီ လႄႈ ၼၢင်းၵႃႊဝီႊ ၵမူၼ်ႊလၢတ်ႊ ဢႃယု 49 ပီ သွင်ၵေႃႉၽူဝ်မေး ဢၼ်ပိုတ်ႇလၢၼ်ႉၵူၺ်ႈတဵဝ် (ၶဝ်ႈသွႆး) ဝႆႉ တီႈဢိူင်ႇၸၢင်ႉ ၽိူၵ်ႇ ၸႄႈဝဵင်းမိူင်း ၸႄႈတွၼ်ႈ ၵဵင်းမႆႇ ၸိုင်ႈထႆး ။ ယိုတ်းလႆႈယႃႈမႃႉ 1,000,000 မဵတ်ႉ (ၼိုင်ႈလၢၼ်ႉမဵတ်ႉ) ယႃႈဢၢႆႉသ် 10 ၵီႊလူဝ်ႊ ယိုတ်းလႆႈပႃးၵႃး 2 လမ်း။

ၼၢင်းၵႃႊဝီႊ လၢတ်ႈဝႃႈ “ လႆႈႁပ်ႉၸၢင်ႈ ဢဝ်ယႃႈတီႈၸၢႆးၸေႃးၵႃႉ (ပဵၼ်တႆး) မႃးဝႆႉတီႈႁၢၼ်ႉႁဝ်းၶႃႈၸူဝ်ႈၶၢဝ်းသေ တေမီးၵူၼ်းမႃးႁပ်ႉထႅင်ႈတွၼ်ႈၼိုင်ႈ လႆႈၵႃႈၸၢင်ႈ 100,000 ဝၢတ်ႇ ႁဵတ်းမႃးသွင်ပွၵ်ႈယဝ်ႉ ၊ ယွၼ်ႉပိူဝ်ႈၶႂ်ႈ လႆႈငိုၼ်း မႃးတႅၼ်းၼီႈတႅၼ်းၶွတ်ႇ၊ ၶၢဝ်းၶိဝ်းၼႆႉပၢႆးမၢၵ်ႈမီးဢမ်ႇလီ ” ဝႃႈၼႆ ။

ၸဝ်ႈၼႃႈတီႈပလိၵ်ႈၸင်ႇတီႉၺွပ်းတူဝ်တင်း2ၵေႃႉလႄႈ ယႃႈမဝ်းၵမ် ဢိၵ်ႇပႃးၶူဝ်းၶွင် ရူတ်ႉၵႃး သူင်ႇႁူင်းပလိၵ်ႈ ပိူဝ်ႈပၼ်တူတ်ႈတၢမ်ႇၵႂႃႇ ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီး။

မိူဝ်ႈဝၼ်းတီႈ 17/7/2019 ၼၼ်ႉၵေႃႈ ၽူႈၸၢႆး 2 ၵေႃႉ ပဵၼ်ၸၢဝ်းထႆး ဢႃယု 19 ပီ လႄႈ 30 ပီ လၵ်ႉတေႃႉယႃႈ မဝ်း ၵမ် တၢင်းၾင်ႇတႃႈၶီႈလဵၵ်းသေ တေဢဝ်ၵႂႃႇတၢင်းၾင်ႇထႆးၼၼ်ႉ ၺႃးၸဝ်ႈၼႃႈတီႈပလိၵ်ႈ ၵူတ်ႇထတ်းတီႉလႆႈတီႈၶူဝ်မိုတ်ႈၵိုဝ်းမၢႆ 1 တႃႈၶီႈလဵၵ်း – မႄႈသၢႆ ။