ပလိၵ်ႈထႆး တီႉၺွပ်းလႆႈယႃႈမဝ်းၵမ် တီႈႁိမ်းလႅၼ်လိၼ် တႆး – ထႆး တႃႈၶီႈလဵၵ်းၶဝ်ႈၸူးမႄႈသၢႆ ယိုတ်းလႆႈယႃႈမႃႉၼပ်ႉသႅၼ်မဵတ်ႉ/ယႃႈဢႆသ်ႊ 50 ၵီႊလူဝ်ႊ ပၢႆ။ ၵူၼ်းတေႃႉယႃႈပၢႆႈလွတ်ႈ ။
ဝၼ်းတီႈ 18/12/2017 ၸဝ်ႈၼႃႈတီႈႁူင်းပလိၵ်ႈမႄႈသၢႆ ၵူတ်ႇထတ်းၸွမ်းပိုၼ်ႉတီႈသေ ထူပ်းႁၼ် ၽူႈၸၢႆး 3-4 ၵေႃႉ ပိူဝ်ႉတင်းထူင်ၸၢၼ်ႈ လုၵ်ႉတၢင်းလႅၼ်လိၼ် တႃႈၶီႈလဵၵ်း – မႄႈသၢႆတေႃႉယႃႈ ၶဝ်ႈမိူင်းထႆး ၸဝ်ႈၼႃႈတီႈၸင်ႇၼႄတူဝ်ၶဝ်ႈၵူတ်ႇထတ်း ၵူၼ်းတေႃႉယႃႈပၢႆႈလွတ်ႈ ။
ၸဝ်ႈၼႃႈတီႈထႆးၶဝ်ႈၵူတ်ႇထတ်း ထူပ်းႁၼ်ထူင်ၸၢၼ်ႈ 3 ထူင် ၼႂ်းထူင်ၼၼ်ႉ မီးယႃႈဢႆသ်ႊ50 ၵွၼ်ႈ ၼမ်ႉၼၵ်းမီးမွၵ်ႈ 50 ၵီႊလူဝ်ႊလႄႈယႃႈမႃႉ 25 မတ်ႉ ၼိုင်ႈမၼ်ႉမီး 2,000 မဵတ်ႉ ႁူမ်ႈတင်း မူတ်းမီး 100,000 မဵတ်ႉ ။
ၸဝ်ႈၼႃႈတီႈၸင်ႇယိုတ်းဢဝ်ယႃႈမဝ်းၵမ်တင်းမူတ်း သူင်ႇႁူင်းပလိၵ်ႈမႄႈသၢႆသေ သိုပ်ႇၸွမ်းႁႃတူဝ် ၽူႈၵဵဝ်ႇၶွင်ႈ တႃႇတီႉၺွပ်း ပၼ်တူတ်ႈတၢမ်ႇ ၸွမ်းၼင်ႇပၵ်းပိူင်မၢႆမီႈၸိုင်ႈမိူင်းမီးၼၼ်ႉဝႃႈၼႆ။
Photo: Mae Sai News
