RCSS ပိုၼ်ၽၢဝ်ႇ ၸွမ်းၼင်ႇပွင်ပဵၼ်လႆႈ တေဢဝ်ႁူမ်ႇလူမ်ႈပၼ်ၵူၼ်းမိူင်း မိူဝ်ႈၽွင်း ဢွၵ်ႇၶၢဝ်းတၢင်း ၸွမ်းသဵၼ်ႈတၢင်း ပွတ်းႁွင်ႇ ၽွင်းတိုၵ်ႉမႄးသဵၼ်ႈတၢင်းလႄႈ ၶူဝ်ႁူၺ်ႈၵိုတ်ႈ ဝႃႈၼႆ။
RCSS/SSA ဢွၵ်ႇၶေႃႈပိုၼ်ၽၢဝ်ႇ မိူဝ်ႈဝၼ်းတီႈ 17/8/2019 ၵဵဝ်ႇၵပ်း လွင်ႈသဵၼ်ႈတႃႈသၢႆတၢင်း လွင်ႈၵပ်းသိုပ်ႇ ထုၵ်ႇ တတ်းၶၢတ်ႇ တၢင်းပွတ်းႁွင်ႇၼၼ်ႉ ၸွမ်းၼင်ႇပွင်ပဵၼ်လႆႈ တေဢဝ် ႁူမ်ႇလူမ်ႈပၼ်ၵူၼ်းမိူင်း ဝႃႈၼႆ။
ၸဝ်ႈသိုၵ်း ၸၢႆးဢူး ၽူႈၼင်ႈလုမ်းၵပ်းသၢၼ် RCSS/SSA တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ၽွင်းၶူဝ်ၵိုတ်ႈၵွႆ ဢမ်ႇၵႂႃႇမႃးလႆႈၼၼ်ႉ ၵူၼ်းမိူင်းၵမ်ႈၽွင်ႈႁူႉသဵၼ်ႈတၢင်းဝႄႈၶူဝ်ယူႇ မိူၼ်ၼင်ႇ ၼွင်ၶဵဝ် မႃး တၢင်းၵျွၵ်ႉၵူႇ၊ ၵျွၵ်ႉၵူႇ – ၼမ်ႉ လၼ်ႈ၊ ၼမ်ႉလၼ်ႈၵႂႃႇၸူးတၢင်းသီႇပေႃႉ – လႃႈသဵဝ်ႈ ၸိူဝ်းၼၼ်ႉ ၵူၼ်းမိူင်းၵမ်ႈၽွင်ႈ ႁူႉယူႇသေတႃႉၵေႃႈ ယွၼ်ႉၵူဝ်ဝႃႈ ငဝ်းလၢႆးဢမ်ႇပႆႇၵတ်းယဵၼ်လႄႈ မီးတၢင်းမႆႈၸႂ်ၸိူင်ႉၼၼ်သေ ၵူဝ်ဢမ်ႇပႆႇႁတ်းၵႂႃႇမႃး ယွၼ်ႉၼၼ် ယူႇတီႈၸုမ်းႁဝ်းၶႃႈ တေ ဢဝ်လွင်ႈႁူမ်ႇလူမ်ႈပၼ် လွင်ႈၵႂႃႇမႃး ၸွမ်းၼင်ႇပွင်ပဵၼ်လႆႈ” ဝႃႈၼႆ။
ၼႂ်းလိၵ်ႈၽိုၼ်ၽၢဝ်ႇ RCSS/SSA ဢွၵ်ႇဝႆႉၼၼ်ႉ တင်းမူတ်းမီး 3 ၶေႃႈ။ ၼႂ်းၼၼ်ႉ ၶေႃႈထီႉ 2 တႅမ်ႈဝႆႉဝႃႈ “မိူဝ်ႈယၢမ်းၽွင်း တိုၵ်ႉၶိုၼ်းမႄး သဵၼ်ႈတႃႈသၢႆတၢင်း၊ ၶူဝ် ၸိူဝ်းဢၼ်လူႉၵွႆၵႂႃႇၼၼ်ႉ သင်ဝႃႈ ပေႃႈမႄႈၵူၼ်း မိူင်း တေဢွၵ်ႇၶၢဝ်းတၢင်း ၸွမ်းသဵၼ်ႈတၢင်းလႃႈသဵဝ်ႈ၊ ၼမ်ႉလၼ်ႈ၊ ၵျွၵ်ႉၵူႇ၊ ၼွင်ၶဵဝ်၊ ဝဵင်းလိူဝ်ႇ ပေႃးၼႆၸိုင် ၼင်ႇႁိုဝ် သဵၼ်ႈတၢင်းပေႃးတေမီး လွင်ႈႁူမ်ႇလူမ်ႈလွတ်ႈၽေးၼၼ်ႉ ယူႇတီႈမုၵ်ႉၸုမ်း RCSS/SSA တေၶတ်းၸႂ်ႁဵတ်းသၢင်ႈၵႂႃႇ ၸွမ်းၼင်ႇပွင်ပဵၼ်လႆႈ” ဝႃႈၼႆ။
ၵဵဝ်ႇၵပ်းလွင်ႈ RCSS/SSA ဢွၵ်ႇၶေႃႈပိုၼ်ၽၢဝ်ႇၼႆႉသေ ယူႇတီႈလူင်ပွင်ၸိုင်ႈမိူင်းတႆး ယိၼ်းႁူမ်ၸူမ်းႁပ်ႉတွၼ်ႈၸွမ်း ဝႃႈၼႆ။
ဢူးၸူဝ်းၸူဝ်းၸေႃႇ ၽူႈၼမ်းၼႂ်း ၸုမ်းလူင်ပွင်ၸိုင်ႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းၶႃႈ ယိၼ်းႁူမ်ၸူမ်း ႁပ်ႉတွၼ်ႈ ၶေႃႈပိုၼ်ၽၢဝ်ႇ RCSS မိူဝ်ႈဝၼ်းတီႈ 17 ၼၼ်ႉယူႇ” ဝႃႈၼႆ။
လိူဝ်ၼၼ်ႉ ၼႂ်းလိၵ်ႈပိုၼ်ၽၢဝ်ႇ RCSS ပိုၼ်ၽၢဝ်ႇတိုၵ်းသူၼ်း ႁႂ်ႈၵူၼ်းမိူင်း ဝႆႉသတိ ဝိရိယ သေ ယူႇသဝ်းၵႂႃႇမႃးၵၼ် ယွၼ်ႉဝႃႈ ပၢင်တိုၵ်းၼႂ်းၸိုင်ႈတႆးပွတ်းႁွင်ႇ တေပဵၼ်ႁိုင်ၵႃႈႁိုဝ် ဢၼ်ဝႃႈၼၼ်ႉ ပႆႇလၢမ်းၶၢတ်ႈလႆႈ ဝႃႈၼႆ။
မိူဝ်ႈၼႆႉ ဝၼ်းတီႈ 20/8/2019 ယၢမ်းၵၢင်ဝၼ်း ႁွင်ႈၵၢၼ်ၾၢႆႇၵေႃႇသၢင်ႈ ၶိုၼ်းသၢင်ႈၶူဝ်လဵၵ်းတဵင်သႂ်ႇၼိူဝ်ၶူဝ်ၵဝ်ႇႁူၺ်ႈ ၵိုတ်ႈၼၼ်ႉယဝ်ႉတူဝ်ႈလီငၢမ်းယဝ်ႉလႄႈ ပွႆႇပၼ်ရူတ်ႉၵႃးၶၢမ်ႈၵႂႃႇမႃးတူၺ်းယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ