ၼၢင်းယိင်း 3 ၵေႃႉဢွၵ်ႇၵႂႃႇႁႃႁဵပ်း ၸွမ်းၵၼ်သေ ယဵပ်ႇၺႃးမၢၵ်ႇ မၢတ်ႇၸဵပ်း 2 ၵေႃႉ ၼႂ်းဢိူင်ႇမိူင်းပူးလူင် ၸႄႈဝဵင်း မိူင်းပဵင်း ၸိုင်ႈတႆးပွတ်းဢွၵ်ႇၶူင်း။
ဝၼ်းတီႈ 11/8/2019 ယၢမ်းၵၢင်ဝၼ်း 11 မူင်းၶိုင်ႈ ၼၢင်းယိင်း 3 ၵေႃႉ ၵႂႃႇႁႃႁဵပ်းၼႂ်းထိူၼ်ႇၸွမ်းၵၼ်သေ ယဵပ်ႇၺႃးမၢၵ်ႇ တႅၵ်ႇၽူင်ႉသႂ်ႇ တီႈႁိမ်းဝၢၼ်ႈၸွမ်တွင်း ဢိူင်ႇမိူင်းပူးလူင် ၸႄႈဝဵင်းမိူင်းပဵင်း မၢတ်ႇၸဵပ်း 2 ၵေႃႉ။ တႃႇ ၵေႃႉၼိုင်ႈတႄႉ ဢမ်ႇတၼ်းတိူဝ်ႉ ဝႃႈၼႆ။
ၸၢႆးၸူဝ်းမိူင်း ၽူႈၼင်ႈလုမ်းၵပ်းသၢၼ် RCSS/SSA တီႈၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ ၼၢင်းယိင်း 3 ၵေႃႉၼႆႉ ၶဝ် ၵႂႃႇႁႃႁဵပ်းၼႂ်းထိူၼ်ႇသေ ယဵပ်ႇၺႃးမၢၵ်ႇ တႅၵ်ႇသႂ်ႇ ၼၢင်းၸေႃးလႃႉ တင်း ၼၢင်းၺုၼ်ႉ ၶဝ် 2 ၵေႃႉ။ ၼၢင်းၸေႃးလႃႉတႄႉ လႆႈတိူဝ်ႉၺႃးမၢတ်ႇၸဵပ်းဢိတ်းဢီႈ။ တွၼ်ႈတႃႇ ၼၢင်းၺုၼ်ႉတႄႉ လႆႈတိူဝ်ႉၺႃးမၢတ်ႇၸဵပ်း ႁၢဝ်ႈႁႅင်း” ဝႃႈၼႆ။
ဢွင်ႈတီႈဢၼ် ၼၢင်းယိင်း 3 ၵေႃႉ ယဵပ်ႇၺႃးမၢၵ်ႇၼၼ်ႉ ပဵၼ်ၼႂ်းၵႄႈၵၢင် တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ ဝၢၼ်ႈ ၸွမ်တွင်း ပေႃးလုၵ်ႉတီႈဝၢၼ်ႈသေ ပႆၵႂႃႇၸိုင် တေႁိုင်မွၵ်ႈ 1 ၸူဝ်ႈမူင်း။ ၵူႈပီပီၼႆႉ ၵူၼ်းပိုၼ်ႉတီႈ ဢွၼ်ၵၼ်ၵႂႃႇႁႃ ႁဵပ်းၵၼ် မႃးၶၢႆ မႃးၵိၼ်ၵၼ်ၵူႈပီ ဝႃႈၼႆ။
ၸၢႆးၸူဝ်းမိူင်း သိုပ်ႇလၢတ်ႈဝႃႈ “ ၵူၼ်းပိုၼ်ႉတီႈ ၵႂႃႇႁႃႁဵပ်းၵၼ်ယူႇၵူႈပီၶႃႈယဝ်ႉ။ ၵူၺ်းၵႃႈ ဢမ်ႇတွၼ်ႉယၢမ်ႈယဵပ်ႇၺႃး မၢၵ်ႇမႃးသေပွၵ်ႈ။ ဢွင်ႈတီႈႁိမ်းၼၼ်ႉ တပ်ႉသိုၵ်းမၢၼ်ႈတိုၵ်ႉမႃးတင်ႈတပ်ႉမႂ်ႇ မိူဝ်ႈပူၼ်ႉမႃးၼႆႉၵူၺ်း။ မၢၵ်ႇဢၼ်တႅၵ်ႇ ၼႆႉ မၼ်းဢမ်ႇၸႂ်ႈမၢၵ်ႇၸုမ်းႁဝ်းၶႃႈ။ ပဵၼ်မၢၵ်ႇၸုမ်းလႂ်ႁၢင်ႈၵၢင်ဝႆႉ ဢၼ်ဝႃႈၼၼ်ႉ တေလႆႈဝႃႈယၢပ်ႇဝႆႉ။ ယွၼ်ႉဢမ်ႇမီး သၢၵ်ႈသေႇလၵ်းထၢၼ်သင်ၼၼ်ႉယဝ်ႉ” ဝႃႈၼႆ။
ၼၢင်းၺုၼ်ႉ ဢႃယု 32 ပီ ဢၼ်တိူဝ်ႉၺႃးမၢၵ်ႇၼၼ်ႉ တေႃႈလဵဝ် လႆႈယူတ်းယႃၶႃႈၸိူဝ်ႉမႅင်းဝႆႉသေ လွင်ႈဝႃႈ တေ လႆႈၽႃႇတတ်း ဢမ်ႇၽႃႇတတ်း ဢၼ်ဝႃႈၼၼ်ႉ တေလႆႈပႂ်ႉတူၺ်းငဝ်းလၢႆးမၼ်းၵွၼ်ႇ။ တေႃႈလဵဝ် ၼၢင်းၺုၼ်ႉၼႆႉ ယူႇ တီႈတပ်ႉသိုၵ်းလူင်ပွင်ၸိုင်ႈမၢၼ်ႈ ႁွင်ႉဢဝ်တူဝ်မႃးယူတ်းယႃတီႁူင်းယႃသိုၵ်း တီႈၵဵင်းတုင်ဝႆႉ ၸဵမ်မိူဝ်ႈဝၼ်းတီႈ 13 ဝႃႈၼႆ။
တၢင်းပွတ်းတွၼ်ႈ ဢိူင်ႇမိူင်းပူးလူင် ၸႄႈဝဵင်းမိူင်းပဵင်းၼႆႉ ပဵၼ်တီႈ တပ်ႉသိုၵ်းလူင်ပွင်ၸိုင်ႈမၢၼ်ႈ၊ ပျီႇတူႉၸိတ်ႉလႄႈ သိုၵ်း RCSS/SSA တူင်ႉၼိုင်ၵႂႃႇမႃးယူႇတႃႇသေႇ။
ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF လၢတ်ႈတီႈၽူႈတွႆႇႁွၵ်ႈဝႃႈ “တေႃႈလဵဝ် ပဵၼ် ၶၢဝ်းၵိုတ်းတိုၵ်းပတ်းပိုၼ်ႉ လူင်းလၢႆးမိုဝ်း NCA ၵေႃႇသၢင်ႈလွင်ႈငမ်းယဵၼ်ယဝ်ႉလႄႈ တွၼ်ႈတႃႇၵူၼ်းမိူင်းတႄႉ မုင်ႈမွင်း လွင်ႈငမ်းယဵၼ်ၵၼ်ၶႃႈယဝ်ႉ။ တေႃႈလဵဝ်ၼႆႉ ၼၢင်းယိင်း 3 ၵေႃႉ ၵႂႃႇႁႃႁဵပ်းသေ ယဵပ်ႇၺႃးမၢၵ်ႇၸိူင်ႉၼႆ ယူႇတီႈၵူၼ်းမိူင်း တႄႉ ပဵၼ်ဢၼ်တူၵ်းၸႂ်တိုၼ်ႇၵူဝ်ၵၼ်ၶႃႈယဝ်ႉ။ ၵဵဝ်ႇ လူၺ်ႈလွင်ႈႁၢင်ႈၵၢင်မၢၵ်ႇၸိူင်ႉၼႆ ထုၵ်ႇလီၵူတ်ႇထတ်းတူၺ်းဝႃႈ ပဵၼ်ၽႂ်/ ၸုမ်းလႂ် ႁင်ႈၵၢင်ဝႆႉ။ ၵဵဝ်ႇလူၺ်ႈလွင်ႈငမ်းယဵၼ် ၵေႃႈ ထုၵ်ႇလီထတ်းသၢင်ၶိုၼ်းၶႃႈယဝ်ႉ” ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ