ပၢင်ပွႆးႁပ်ႉတွၼ်ႈပီမႂ်ႇတႆး ပၢင်ယႂ်ႇၼၼ်ႉ မွပ်ႈပၼ်ၵေႃလိၵ်ႈလၢႆးတူၼ်ႈတီး ၸတ်းယဝ်ႉသေတႃႉ ဢုပ်ႇဢူဝ်းၵၼ် တေ ၸတ်းပၢင်ပွႆးပီမႂ်ႇတႆး 2114 ၼီႈ တီႈၵဵင်းတုင် ၸိုင်ႈတႆး ပွတ်းဢွၵ်ႇၶူင်းယူႇ ဝႃႈၼႆ။
ဝၼ်းတီႈ 17/8/2019 ၸုမ်းပွင်ၵၢၼ် ပွင်ပဵၼ်ပၢင်ပွႆးပီမႂ်ႇတႆး ဝဵင်းၵဵင်းတုင် ဢုပ်ႇဢူဝ်းၶွတ်ႇၽွတ်ႈၶွမ်ႊမတီႊတႃႇၸတ်း ႁဵတ်းပၢင်ပွႆးပီ မႂ်ႇတႆး 2114 တီႈၵဵင်းတုင် ဢုပ်ႇဢူဝ်းမၵ်းမၼ်ႈပႃး ဝၼ်းတေၸတ်းႁဵတ်းပၢင်ပွႆး၊ ပၢင်ၵုမ်ၼႆႉ ၸတ်းႁဵတ်းတီႈ ဝတ်ႉပႃႇလႅင် ဝဵင်းၵဵင်းတုင်။
ၸၢႆးသၢမ်တိပ်ႉသိူဝ် ၵႅမ်ႁူဝ်ပဝ်ႈၶွမ်ႊမတီႊပွင်ပဵၼ်ပၢင်ပွႆးပီမႂ်ႇတႆး ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉတႄႉ ႁဝ်း ၶႃႈ ၶွတ်ႇၽွတ်ႈၶွမ်ႊမတီႊဝႆႉ 2 ၸုမ်း၊ တႃႇၸုမ်းၼိုင်ႈ ႁၢင်ႈႁႅၼ်းတေမိူဝ်းၸွႆႈပွႆးပီမႂ်ႇတႆးတီႈတူၼ်ႈတီး၊ ထႅင်ႈၸုမ်းၼိုင်ႈ သမ်ႉ တေႁၢင်ႈႁႅၼ်း ၸတ်းႁဵတ်းတီႈၵဵင်းတုင်။ တွၼ်ႈတႃႇၵဵင်းတုင်တႄႉ ႁဝ်းတေၸတ်းၵွၼ်ႇဝၼ်းပီမႂ်ႇ တေပဵၼ်ဝၼ်း တီႈ 7 ထိုင် 11 လိူၼ်ၼူဝ်ႊဝႅမ်ႊပိူဝ်ႊ 2019။ ပေႃးဝၼ်းပီမႂ်ႇလိူၼ်ၸဵင်မႂ်ႇၼိုင်ႈၶမ်ႈတႄႉ ႁဝ်းၶႃႈတေၵၢပ်ႈသွမ်းသင်ၶၸဝ်ႈ လႄႈ လူႇၶဝ်ႈမႂ်ႇႁဵတ်းၼၼ်ၵူၺ်း” ဝႃႈၼႆ။
ပၢင်ပွႆးပီမႂ်ႇတႆး 2114 ၼီႈ တီႈၸႄႈဝဵင်းၵဵင်းတုင်ၼႆႉ တေၸတ်းႁဵတ်းၼႂ်းဝၼ်းတီႈ 7-11/11/2019 တႃႇၶၢဝ်းတၢင်း 5 ဝၼ်း ဝႃႈၼႆ။
ၸၢႆးသၢမ်တိပ်ႉသိူဝ် သိုပ်ႇလၢတ်ႈဝႃႈ “ပီၼႆႉ တူၵ်းပုၼ်ႈၽွၼ်းႁဝ်းၶႃႈ ၸတ်းႁဵတ်းပၢင်ပွႆးပီမႂ်ႇတႆး 2114 ၼီႈၶိုၵ်ႉယႂ်ႇလူင်ၶႃႈ ၵူၺ်းၵႃႈ တီႈၵဵင်းတုင်ႁဝ်းၶႃႈၼႆႉ ငဝ်းလၢႆးသၢႆငၢႆမၼ်းဢမ်ႇပၼ်။ တီႈယူႇႁဝ်းမၼ်း ဢမ်ႇပေႃးၶႅမ်ႉလႅပ်ႈတဵမ်ထူၼ်ႈလႄႈ ႁဝ်းၶႃႈပႆႇပဵၼ်ႁပ်ႉ။ ၼႂ်း ပီ 2020 ၵေႃႈသမ်ႉ မႅၼ်ႈ ပၢင်လိူၵ်ႈတင်ႈလႄႈ တေပႆႇၸၢင်ႈႁဵတ်း ပေႃးထိုင်မႃး 2021 ၸိုင် တေ ဢၢၼ်းမႃးၸတ်းႁဵတ်းတီႈၵဵင်းတုင်ယဝ်ႉ”ဝႃႈၼႆ။
ပၢင်ပွႆးပီမႂ်ႇတႆးယႂ်ႇ ဢၼ်ႁူမ်ႈၵၼ်ၸတ်းႁဵတ်းၼႆႉ မိူဝ်ႈပီဢွၼ် 2017 ၸတ်းႁဵတ်းတီႈဝဵင်းလႃႈသဵဝ်ႈ၊ ၵွၼ်ႇၼႃႈၼၼ်ႉ သမ်ႉၸတ်းတီႈဝဵင်းလူင်တူၼ်ႈတီးသေ ပွၵ်ႈႁႅၵ်ႈတႄႉ ၸတ်းတီႈဝဵင်းၵဵင်းတုင် မိူဝ်ႈပီ 2012 ။ ပၼ်ႇပုတ်ႈၵၼ်ၸတ်းႁဵတ်း ပွႆးယႂ်ႇ 3 ပီ ၼိုင်ႈပွၵ်ႈ။ တေတူၵ်းထွင်ၶိုၼ်းၼႃႈတီႈ ပီႈၼွင်ႉၵဵင်းတုင် ၼႂ်းပီ 2020 ၼီႈသေတႃႉ ယွၼ်ႉပိူဝ်ႈ တေမီး ပၢင် လိူၵ်ႈတင်ႈလႄႈ ဢၢၼ်းၸတ်းလူင်ႈၼႃႈ ၼႂ်းပီ 2019 ၼႆႉ။ ၵူၺ်းၵႃႈ ယွၼ်ႉငဝ်းလၢႆးၵူႈလွင်ႈလွင်ႈဢမ်ႇပႆႇသၢင်ႇထုၵ်ႇလႄႈ ပီႈၼွင်ႉၵဵင်းတုင် ၶိုၼ်းမႃးမွပ်ႈပၼ်ၵေႃလိၵ်ႈလၢႆးတူၼ်ႈတီး ၸတ်းႁဵတ်းၵႂႃႇ ယူႇတီႈပီႈၼွင်ႉၵဵင်းတုင်သေ 2021 ၸင်ႇတေ ၸတ်းပွႆးပီမႂ်ႇယႂ်ႇလူင် လႆႈႁူႉၼင်ႇၼႆ။
