ၽူႈႁွင်ႉၽဵင်းၵႂၢမ်းတႆး ႁူပ်ႉဢုပ်ႇၵၼ် ၼႂ်းၶၢဝ်းတၢင်း 2 ဝၼ်း တီႈဝဵင်းလၢႆးၶႃႈ ယိူင်းဢၢၼ်း တႃႇၶွတ်ႇၽွတ်ႈၸုမ်းပၢႆးမွၼ်း တႆး။
ဝၼ်းတီႈ 17-18/8/2019 ယၢမ်းၵၢင်ၼႂ် 9 မူင်း ထိုင် ဝၢႆးဝၼ်း 3 မူင်း ယူႇတီႈၸဝ်းပၢႆးမွၼ်းၽဵင်းၵႂၢမ်းတႆး လၢႆလၢႆၵေႃႉ ဢွၼ် ႁူဝ် ၸတ်းႁဵတ်းပၢင်ဢုပ်ႇၵုမ် ၸဝ်ႈပၢႆးမွၼ်းၽဵင်းၵႂၢမ်းတႆးတႃႇ ၶွတ်ႇၽွတ်ႈၸုမ်းပၢႆးမွၼ်းတႆး။ ပၢင်ဢုပ်ႇဢူဝ်းၵၼ်ၼႆႉ ၸတ်းႁဵတ်းတီႈႁူင်းလုၵ်းၼွင်ၶမ်း ပွၵ်ႉ 1 ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၸၢႆးသႅင်ၸွမ်ၾႃႉ ၽူႈႁွင်ႉၽဵင်းၵႂၢမ်းတႆး လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်းဢၼ်ႁဝ်းၶႃႈ ၸတ်းႁဵတ်း ပၢင်ၵုမ်ၸဝ်ႈ ပၢႆးမွၼ်းတႆးႁဝ်းၶႃႈၼႆႉ ၶေႃႈထီႉ 1) တႃႇမီးၸုမ်းၵႅတ်ႇၶႄႁႄႉၵင်ႈ လွင်ႈပူၼ်ႉပႅၼ်သုၼ်ႇပၢႆးမွၼ်းတႆးႁဝ်း။ 2) သမ်ႉ တႃႇ ၶူၼ်ႉၶႂႃႉမႅတ်ႇပႅင်းႁၵ်ႉသႃပၢႆးမွၼ်းတႆး ႁႂ်ႈၶိုတ်းတၼ်းၵၢပ်ႈပၢၼ်လႄႈ 3) တႃႇယုၵ်ႉမုၼ်းၼမ်ႉၵတ်ႉပၢႆးမွၼ်းသႅၼ်းႁုၼ်ႈ မႂ်ႇ ၸိူဝ်းၼႆႉသေ ၸင်ႇလႆႈၸတ်းႁဵတ်းမႃး” ဝႃႈၼႆ။
ဝၢႆးသေဢုပ်ႇဢူဝ်းၵၼ်ယဝ်ႉ ၼႂ်းၶၢဝ်းတၢင်း 2 ဝၼ်းၼႆႉ ၸဝ်ႈပၢႆးမွၼ်းၽဵင်းၵႂၢမ်းတႆး 50 ပၢႆ လႆႈႁူမ်ႈၵၼ်ၶွတ်ႇၽွတ်ႈဝႆႉ ၶွမ်ႊမတီႊၸူဝ်ႈၶၢဝ်းသေ လႆႈၸႂ်ၵၼ် မၵ်းမၼ်ႈဝႃႈ တေသိုပ်ႇၸတ်းႁဵတ်းပၢင်ၵုမ်ၸဝ်ႈပၢႆးမွၼ်းၽဵင်းၵႂၢမ်းတႆး ထႅင်ႈပွၵ်ႈ ၵမ်း 2 ဝႃႈၼႆ။
ၸၢႆးသႅင်ၸွမ်ၾႃႉ လၢတ်ႈဝႃႈ “ ပေႃးဝႃႈပၢင်ၵုမ်ႁဝ်း ပွၵ်ႈၵမ်း 2 မႃးၼႆႉ ႁဝ်းၶႃႈတေဢုပ်ႇၵၼ်လွင်ႈတေပၼ် ပၢင်ၾိုၵ်း ၽွၼ်ႉယုၵ်ႉမုၼ်းၼမ်ႉၵတ်ႉလွင်ႈၽဵင်းၵႂၢမ်းတႆး မိူၼ်ၼင်ႇ လွင်ႈႁွင်ႉၽဵင်းၵႂၢမ်း၊ လွင်ႈတႅမ်ႈ။ ယဝ်ႉၵေႃႈ လွင်ႈႁဵတ်း Music App၊ Online Platform၊ လွင်ႈ Music Database ၸိူဝ်းၼႆႉ”ဝႃႈၼႆ။
ပၢင်ၵုမ်ၸဝ်ႈပၢႆးမွၼ်းတႆး ပွၵ်ႈၵမ်းၼိုင်ႈၼႆႉ လႆႈဢုပ်ႇဢူဝ်းၶွတ်ႇၽွတ်ႈဝႆႉ ၶွမ်ႊမတီႊၸုမ်းပၢႆးမွၼ်းတႆးၸူဝ်ႈၶၢဝ်း။ ပၢင် ၵုမ်ထႅင်ႈပွၵ်ႈၵမ်း 2 ၼၼ်ႉ ယူႇတီႈၶွမ်ႊမတီႊၸူဝ်ႈၶၢဝ်းၼႆႉသေ တေဢုပ်ႇဢူဝ်းၵၼ် ၼႂ်းၶၢဝ်းတၢင်း 2-3 လိူၼ်သေ ၸင်ႇ တေပွင်ႇလႅင်းပၼ်ၶိုၼ်း ၸဝ်ႈပၢႆးမွၼ်းၽဵင်းၵႂၢမ်းတႆး ဝႃႈတေၸတ်းပၢင်ၵုမ်ထႅင်ႈတီႈလႂ်၊ ဝၼ်းလႂ် ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ