သဵင်ၵွင်ႈ သဵင်မၢၵ်ႇ ၼၼ်ႈမေႃးတၢင်းၾၢႆႇတပ်ႉၵွင်ႈလူင် တီႈဝဵင်းၵျွၵ်ႉမႄး  ၸိုင်ႈတႆးပွတ်းႁွင်ႇ လႄႈ ႁဵတ်းႁႂ်ႈၵူၼ်းမိူင်းတူၵ်းၸႂ်ၵူဝ်ႁႄ။

ဝၼ်းတီႈ 16/8/2019 ယမ်းၵၢင်ၶိုၼ်း 10 မူင်း သဵင်ၵွင်ႈလူင်တႅၵ်ႇ 3-4 ၵမ်း၊ ယဝ်ႉၵေႃႈ မီးသဵင်ၵွင်ႈဢွၼ်ႇ တႅၵ်ႇလင်မေႃးၸွမ်း။ ၵဵဝ်ႇၵပ်းလွင်ႈၼႆႉသေ ၽွင်းတႅၼ်းသၽႃးၸႄႈမိူင်း ၵျွၵ်ႉမႄးလၢတ်ႈတီႈ ၽူႈတွႆႇႁွၵ်ႈ ဝႃႈ – “တႅၵ်ႇတၢင်းၾၢႆႇတပ်ႉ 352 တပ်ႉဢမျႂၵ်ႈဢေႃႈ။ မွၵ်ႈ 10 မူင်း ၶိုၼ်းၼႆႉၶႃႈ။  ငိၼ်းသဵင်ၵွင်ႈလူင်  သဵင်မၢၵ်ႇ ။ ပႆႇလႆႈႁူႉ လွင်ႈတၢင်း။ ၽႂ်ၵေႃႈဢမ်ႇႁတ်းဢွၵ်ႈႁိူၼ်း ယဝ်ႉၶႃႈလူးၼေႃႈ” – ဝႃႈၼႆ။

သိုဝ်ႇဢမ်ႇႁူႉၾၢႆႇ ၼိူဝ်သူဝ်ႊသျႄႊ ဢွၼ်ႊလၢႆႊ တႄႉ ၽႄႈၵၼ်ဝႃႈ – ၸုမ်းယိပ်းၵွင်ႈၶီႇ လူတ်ႉၵႃးၶဝ်ႈမႃး၊ ဢဝ်မၢၵ်ႇပီၵူၺ်ႈသေ လိုင်ႇသႂ်ႇၼႂ်းတပ်ႉယဝ်ႉသွင်ႉ။  သိုၵ်းလူင်ပွင်ၸိုင်ႈမၢၼ်ႈလိုပ်ႈလမ်းတိုၵ်း ယူႇၼႆသေ တႃႉ ၵူၼ်းဢမ်ႇၶႂ်ႈဢွၵ်ႇၸိုဝ်ႈ ႁွတ်ႈယူႇႁူင်းယႃၵျွၵ်ႉမႄး ဢၼ်မီးႁိမ်းတပ်ႉ သဵင်ၵွင်ႈ တႅၵ်ႇၼၼ်ႉဝႃႈ ပဵၼ်သဵင်ၵွင်ႈဢၼ်ယိုဝ်းၾၢႆႇလဵဝ်ၵူၺ်း။ ဢမ်ႇမီးသဵင်ယိုဝ်းတွပ်ႇၶိုၼ်း  – ဝႃႈၼႆ။

“ယၢမ်းလဵဝ်ဝၢၼ်ႈမိူင်းႁဝ်း မၢႆမီႈၽိင်ႈမိူင်း ဢမ်ႇသုမ်ႇသုမ်ႇငမ်းတူဝ်ႈယဝ်ႉလႄႈ ထုၵ်ႇလႆႈၾၢင်ႉသတိၵၼ် ႁင်းၽႂ်မၼ်း။ ပႃးၸဵမ်လွင်ႈၵႂႃႇမႃးၸွမ်းတႃႈၸွမ်းတၢင်း။ လွင်ႈပၢႆးႁူမ်ႇလူမ်ႈတႄႉၵေႃႈမၼ်းဢမ်ႇမီးယဝ်ႉ ”– ၼႆၽူႈတႅၼ်းသၽႃး ၸၢႆးထုၼ်းဝိၼ်း လၢတ်ႈ။

ဝၼ်းတီႈ 15/08/2019 ၼၼ်ႉ ၸုမ်းသိုၵ်းဢူၺ်းလီပွတ်းႁွင်ႇ ၶဝ်ယိုဝ်းတပ်ႉသိုၵ်းလႄႈတပ်ႉပလိၵ်ႈ  5 တီႈ ၼႂ်းၸေႈဝဵင်း ၼွင်ၶဵဝ် (မိူင်းတႆးပွတ်းႁွင်ႇလႄႈ) ႁူင်းႁဵၼ်း DSTA ဝဵင်းပၢင်ႇႁူႈ (မေႇမဵဝ်ႉ)။ တေႃႇထိုင်ဝၼ်းမိူဝ်ႈၼႆႉ သဵၼ်ႈတၢင်းလူင် လႃႈသဵဝ်ႈ – ဝဵင်းလိူင်ႇ တႃႇပိုတ်ႇပွင်ႇ ၶိုၼ်း ယင်းပႆႇဝႆႉဝၢင်းၸႂ် ၼႆလႄႈ ရူတ်ႉၾႆး၊ ရူတ်ႉၵႃး ၵိုတ်းယင်ႉၵၢၼ်ၵႂႃႇမႃးတေႃႉသူင်ႇဝႆႉသဵင်ႈသဵင်ႈ။