ၾူၼ်တူၵ်းထပ်းလၢႆဝၼ်း လိၼ်ၵူၼ်ႇသႂ်ႇ ႁိူၼ်းၵူၼ်းဝၢၼ်ႈ တီႈပွၵ်ႉၶရိတ်ႉယၢၼ်ႇလႄႈ ပွၵ်ႉၵွင်းၼွင် လင်ႁိူၼ်း 10 လင် ပၢႆ လႆႈလူႉၵွႆ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။
လိၼ်ၵူၼ်ႇပင်း မိူဝ်ႈဝၼ်းတီႈ 15/8/2019 ယၢမ်းၵၢင်ၼႂ် 9 မူင်းၶိုင်ႈၼၼ်ႉ လွင်ႈၵူၼ်းလူႉတၢႆမၢတ်ႇၸဵပ်းတႄႉ ဢမ်ႇမီး ဝႃႈ ၼႆ။
ၸၢႆးၵျေႃႇတဵင်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 1 လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်တီႈပွၵ်ႉၶရိတ်ႉယၢၼ်ႇ လႄႈ ၵွင်းၼွင် သွင်ပွၵ်ႉၼႆႉၶႃႈ။ တီႈပွၵ်ႉၶရိတ်ႉယၢၼ်ႇၼၼ်ႉ ႁိူၼ်းၵူၼ်ႇပင်း 10 လင်၊ တီႈၵွင်းၼွင်သမ်ႉ 1 လင်။ လွင်ႈ ၵူၼ်းမၢတ်ႇၸဵပ်းလူႉတၢႆဢမ်ႇမီး” ဝႃႈၼႆ။
ဝၼ်းတီႈ 13/8/2019 ၼၼ်ႉ ယူႇတီႈၽူႈၵွၼ်းပွၵ်ႉၶရိတ်ႉယၢၼ်ႇ လၢတ်ႈတီႈၽူႈတႅၼ်းသၽႃးဝႃႈ “တီႈၼႂ်းပွၵ်ႉ ၼႆႉ မီးႁွႆး လိၼ်တႅၵ်ႇၸတ်ႉဝႆႉ ၼႆလႄႈ လႆႈၶၢႆႉၵူၼ်းႁိမ်းႁွမ်းၼၼ်ႉ ၵႂႃႇဝႆႉတီႈလွတ်ႈၽေး ၼႂ်းဝၼ်းၼၼ်ႉၵမ်းလဵဝ်။ ၵွပ်ႈၼၼ် လိၼ်ၵူၼ်ႇတဵင်ႁိူၼ်းၵေႃႈ ဢမ်ႇၺႃးၵူၼ်းသေၵေႃႉ” ဝႃႈၼႆ။
ၸၢႆးၵျေႃႇတဵင်း လၢတ်ႈဝႃႈ “ ၵူၼ်းမိူင်းၸိူဝ်းပၢႆႈဝႆႉတီႈလွတ်ႈၽေးၼၼ်ႉ မၢင်ၵေႃႉၵႂႃႇယူႇၸွမ်းႁိူၼ်းပီႈၼွင်ႉ ၶဝ်၊ မၢင်ၵေႃႉ ၵႂႃႇၶၢတ်ႈႁိူၼ်းယူႇ။ သင်ဝႃႈ ၾူၼ်ႁိူတ်ႇယဝ်ႉသေ လႅတ်ႇဢွၵ်ႇမႃးၸိုင် ၸင်ႇတေဢွၼ်ၵၼ်ၵႂႃႇၸွႆႈၶူၼ်ႉႁိူၼ်းယေး ဢၼ် ၵူၼ်ႇပင်းၶမ်လိၼ်ဝႆႉၸိူဝ်းၼၼ်ႉ” ဝႃႈၼႆ။
ယွၼ်ႉၾူၼ်တူၵ်းထပ်းၵၼ်လၢႆဝၼ်းသေ လိၼ်တႅၵ်ႇယၢတ်ႇ ၵူၼ်ႇသႂ်ႇလင်ႁိူၼ်းၵူၼ်းဝၢၼ်ႈၸိူဝ်းယူႇတၢင်းတႂ်ႈလွႆ တီႈ ပွၵ်ႉၶရိတ်ႉယၢၼ်ႇၼၼ်ႉ လႆႈလူႉၵွႆၵႂႃႇ ႁိူၼ်းယေးၵမ်ႈၽွင်ႈ၊ သိုင်ႇၾႆး၊ ႁွင်ႈၼွၼ်း လႄႈ ႁွင်ႈၼမ်ႉ ၸဵမ်ၸိူဝ်းၼႆႉ။
ၵဵဝ်ႇလူၺ်ႈလွင်ႈလိၼ်ၵူၼ်ႇပင်းသႂ်ႇႁိူၼ်းၼႆႉသေ လွင်ႈလူႉသုမ်း မႅၼ်ႈၵႃႈႁိုဝ် ဢၼ်ဝႃႈၼၼ်ႉ ပႆႇႁူႉ။
