ၽွင်းလူင်ၾၢႆႇပၢႆးပၺ်ၺႃ လူင်ပွင်ၸိုင်ႈ ၵမ်ႉထႅမ်ပၼ်ၶိူင်ႈလဵၼ်ႈဢဵၼ်ႁႅင်း တႃႇၵူၼ်းမိူင်းၼႆသေ ယူႇတီႈၽူႈတႅၼ်း သၽႃးၸႄႈတွၼ်ႈလႃႈသဵဝ်ႈ လႆႈမွပ်ႈယိုၼ်ႈပၼ်ၵူၼ်းမိူင်း တီႈၸႄႈဝဵင်းသႅၼ်ဝီ။
ဝၼ်းတီႈ 15/8/2019 ယူႇတီႈၵေႃသႅၼ်မူဝ်ၶၢဝ် ပွၵ်ႉ 2 ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ မွပ်ႈယိုၼ်ႈဝႂ်ယုၵ်ႉယွင်ႈၵုင်ႇ မုၼ် ပၼ်ၸၢႆးဝၼ်းလႅင်းၶမ်း ၽူႈတႅၼ်းသၽႃး ၸိူဝ်ႉၸၢတ်ႈၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ ဢၼ်လႆႈၸွႆႈ ၵမ်ႉထႅမ်ပၼ် ၶိူင်ႈလဵၼ်ႈဢဵၼ်ႁႅင်း 1 ၸုမ်ႇ ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၽွင်း လူင်ၾၢႆႇပၢႆးယူႇလီ လူင်ပွင်ၸိုင်ႈ ယိုၼ်ႈပၼ်မႃး တီႈၽူႈတႅၼ်းသၽႃးသေ ၶႃႈႁဝ်း ႁပ်ႉဢဝ်မႃးတႃႇၵူၼ်းမိူင်း ႁဝ်း ပေႃးတေလႆႈ(ဢွၵ်ႇ)ဢဵၼ် ဢွၵ်ႇႁႅင်းၵၼ် 5 ၸုမ်ႇ တွၼ်ႈတႃႇ ၼႂ်းၶဵတ်ႇသဵင်ၶႃႈႁဝ်း 5 ၸႄႈဝဵင်း။ ၼိုင်ႈၸႄႈဝဵင်းလႂ် ၶႃႈတေ ဢဝ်ၵႂႃႇဝႆႉပၼ် 1 ၸုမ်ႇ၊ ဢွၼ်တၢင်းသုတ်းတႄႉ ၶႃႈႁဝ်းမႃးယိုၼ်ႈပၼ် တီႈသႅၼ်ဝီၼႆႉဢွၼ်ႇတၢင်း” ဝႃႈၼႆ။
လိူဝ်ၼၼ်ႉ ဢၼ်ၵိုတ်းထႅင်ႈ 4 ၶိူင်ႈၼၼ်ႉ တေဢဝ်ၵႂႃႇမွပ်ႈပၼ် ၵူၼ်းမိူင်းတၢင်းလႃႈသဵဝ်ႈ၊ မိူင်းယႆ၊ တၢင်ႉယၢၼ်းလႄႈ ၵုၼ်လူင် ၸဵမ်ၸိူဝ်းၼႆႉ။
“သင်ဝႃႈ ပီႈၼွင်ႉၵူၼ်းမိူင်းႁဝ်း တၢင်ႇတီႈတၢင်ႇယွၼ်းမႃး ၸွမ်းၼင်ႇဢၼ်ႁဝ်းၶႃႈ ယိုၼ်းမိုဝ်းထိုင်လႆႈၼၼ်ႉ ႁဝ်းၶႃႈ တေ ၸၢင်ႈတၢင်ႇၶိုၼ်ႈယွၼ်းပၼ်တီႈၽွင်းလူင်ၾၢႆႇပၢႆးယူႇလီၶဝ်လႆႈၸိူင်ႉႁိုဝ်။ ပေႃးလႃးလႃးဝႃႈ လူဝ်ႇလႆႈသိုဝ်ႉဢိူဝ်ႈၼႆ ႁဝ်းၶႃႈ တေၶတ်းၸႂ် ဢဝ်ငိုၼ်းႁဝ်းသေ သိုဝ်ႉလူႇတၢၼ်းပၼ် ပီႈၼွင်ႉ ႁဝ်းၶႃႈ မီးယိူင်းဢၢၼ်းဝႆႉၸိူင်ႉၼၼ်ယူႇၶႃႈ” ၸၢႆး ဝၼ်းလႅင်းၶမ်းလၢတ်ႈၼႄၼင်ႇၼႆ။
ၶိူင်ႈလဵၼ်ႈဢဵၼ်ႁႅင်း Outdoor Fitness ဢၼ်ၾၢႆႇၽွင်းလူင်ပၢႆးယူႇလီ လူင်ပွင်ၸိုင်ႈမွပ်ႈယိုၼ်ႈပၼ်မႃး တီႈၽူႈတႅၼ်းသ ၽႃးၼၼ်ႉ ၼိုင်ႈၸုမ်ႇလႂ် တေမီး 4 (ယၢင်ႇ/ပိူင်)။ ၵႃႈၶၼ် 1 ၸုမ်ႇတေမီးမွၵ်ႈ 7 သႅၼ်ပျႃး။
