ၶူဝ်ႁူၺ်ႈၵိုတ်ႈဢၼ်ၵၢႆႇၸူးတင်းမိူင်းမၢၼ်ႈ လႄႈ မိူင်းတႆး ပွတ်းႁွင်ႇ မီးၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇၼၼ်ႉ ၺႃး ၸုမ်း ဢူၺ်းလီပွတ်းႁွင်ႇ 3 ၸုမ်ႈ ႁူမ်ႈၵၼ်သေ လူမ်ႇယိုဝ်းပွႆႇမၢၵ်ႇယႃႉလႅဝ်ပႅတ်ႈ။ လူင်ပွင်ၸိုင်ႈ ၶိုၼ်းလူင်းမိုဝ်းမႄး မိူဝ်ႈ ၼႆႉ ၵမ်းလဵဝ် ႁႂ်ႈယဝ်ႉၼႂ်းၶၢဝ်းတၢင်း 1-2 ဝၼ်းၼႆႉ။
ၸၢႆးဢွင်ႇမိူင်း ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ “ လႆႈႁူႉတႄႉ မိူဝ်ႈၼႆႉ တင်း မိူဝ်ႈၽုၵ်ႈ ၶဝ်တေႁဵတ်းၶူဝ်ၶိုၼ်းႁႂ်ႈယဝ်ႉ။ တေပဵၼ်ၶူဝ်လဵၵ်း၊ ႁႂ်ႈရူတ်ႉၵႃးၵႂႃႇမႃးလႆႈ။ တင်ႈတႄႇၶဝ်ပွႆႇမၢၵ်ႇယႃႉလႅဝ် မိူဝ်ႈဝႃးၼၼ်ႉ သေ ရူတ်ႉၵႃး ဢမ်ႇၸၢင်ႈၵႂႃႇမႃး တေႃႇထိုင်ဝၼ်းမိူဝ်ႈၼႆႉ။ ၵူၼ်းတေမႃးၵေႃႇသၢင်ႈႁဵတ်းၶူဝ်ၼၼ်ႉ ၶဝ်လုၵ်ႉတီႈၼေႇပျီႇ တေႃႇမႃးႁွတ်ႈၽႅဝ်တီႈၼွင်ၶဵဝ်မိူဝ်ႈၵႆႈၼႆႉယဝ်ႉ။ လဵၵ်းဢၼ်တေၵၢႆႇၶူဝ်ၼၼ်ႉၵေႃႈ ၶဝ်တေႃႉဢဝ်တၢင်းသီႇ ပေႃႉလူင်းမႃး” ဝႃႈၼႆ။
တေႃႈလဵဝ် ရူတ်ႉၵႃး ဢၼ်လႅၼ်ႈတၢင်း မိူင်းမၢၼ်ႈ – ဝဵင်းလိူဝ်ႇ(မၼ်းတလေး) တင်း မိူင်းတႆး ပွတ်းႁွင်ႇ ၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ လႃႈသဵဝ်ႈ ထိုင် မူႇၸေႊ လႅၼ်လိၼ်တႆး – ၶႄႇၼၼ်ႉ ရူတ်ႉၵႃးလႆႈၵိုတ်းယင်ႉဝႆႉၸူဝ်ႈၶၢဝ်း ပႆႇၸၢင်ႈၵႂႃႇမႃးလႆႈ၊ ၵၢၼ်ၵႃႉၶၢႆလႄႈ ၵူၼ်းၵႂႃႇတႃႈၵႂႃႇတၢင်းၵေႃႈလႆႈၵိုတ်းၵၢတ်ႈဝႆႉမူတ်း ဝႃႈၼႆ။
ၵဵဝ်ႇၵပ်းလွင်ႈၼႆႉ ၶူးႁိုၼ်း ၵႃယၢင်း ၽူႈတႅမ်ႈလိၵ်ႈ၊ ၽူႈပၵ်းတႃငဝ်းလၢႆးၵၢၼ်မိူင်း မိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ“ ယၢမ်းလဵဝ်တႄႉ သဵၼ်ႈတႃႈသၢႆတၢင်းၵေႃႈၶၢတ်ႇ လွင်ႈၵႃႉၵူးသိုဝ်ႇသၢၼ်တေႃႇၵၼ်ၵေႃႈၶၢတ်ႇ။ ၵွပ်ႈၼႆ ၵုၼ်ႇသိၼ်ၵေႃႈ ၵႃႈၶၼ်တေယႂ်ႇ။ တုမ်ႉတိူဝ်ႉထိုင်ၵူၼ်းမိူင်းဢၼ်ၵႂႃႇမႃး ႁႃၵိၼ်လဵင်ႉတွင်ႉ ၸွမ်းသၢႆတၢင်းသဵၼ်ႈၼႆႉ ၵမ်းသိုဝ်ႈ။ ဢၼ်တိူဝ်ႉ လိူဝ်ႁႅင်းတႄႉ သဵၼ်ႈတၢင်းလူင်ၼႆႉ ပဵၼ်ဢၼ်လမ်ႇလွင်ႈတႃႇၵပ်းသိုပ်ႇတိတ်းတေႃႇ တင်းမိူင်းၶႄႇ ၵမ်းသိုဝ်ႈလႄႈ သင် ၸိူဝ်ႉဝႃႈ ၶူဝ်ႁူၺ်ႈၵိုတ်ႈၼႆႉ ၼႂ်းၶၢဝ်းတၢင်း 3 ဝၼ်း 50 ဢမ်ႇလီလႆႈၶိုၼ်း ပေႃးၼႆၸိုင် ပၼ်ႁႃဢၼ်ၼႆႉ တေလုၵ်ႉတီႈပၼ် ႁႃဢၼ်လဵၵ်ႉလဵၵ်ႉသေ တေၸၢင်ႈၵိူတ်ႇၽႄႈလၢမ်းထိုင်တင်းမိူင်း ပတ်းပိုၼ်ႉထိုင်တီႈတုၵ်ႉယၢၵ်ႈၽၢၼ်ၵိၼ်းၵႂႃႇၶႃႈ ဢေႃႈ” ဝႃႈၼႆ။
ၵဵဝ်ႇလူၺ်ႈလွင်ႈပဵၼ်ပၢင်တိုၵ်းၵၼ် ၼႂ်းၸႄႈဝဵင်းၼွင်ၶဵဝ်ၼႆႉသေ ၵူၼ်းမိူင်း ဢၼ်ယူႇသဝ်းႁိမ်းႁွမ်း ၶႅပ်ႇဝဵင်းၸိူဝ်းၼၼ်ႉ လႆႈဢွၼ်ၵၼ်ၽူင်ႉပၢႆႈ ဢမ်ႇယွမ်း 300 ၵေႃႉ။
ၸၢႆးဢွင်ႇမိူင်း လၢတ်ႈဝႃႈ “ မိူဝ်ႈပဵၼ်ပၢင်တိုၵ်းၵၼ်ၼၼ်ႉ ၵူၼ်းဝၢၼ်ႈလူင်ယုမ်း၊ ယူင်ႇၸၢၵ်ႈလႄႈ ၶၢႆးမွၼ် ၸိူဝ်းၼႆႉ ဢွၼ် ၵၼ်ပၢႆႈမႃးသွၼ်ႈဝႆႉတီႈဝတ်ႉသပေႇတင်း ဝတ်ႉတၽၢၼ်ႇၵၢႆး တင်းမူတ်းတေမီးႁူဝ်ၵူၼ်းမွၵ်ႈ 300 ပၢႆၼႆႉ။ ၵူၺ်းၵႃႈ မိူဝ်ႈ ၼႆႉ ယၢမ်းၵၢင်ၼႂ်တႄႉ ဢွၼ်ၵၼ်ပွၵ်ႈမိူဝ်းၶိုၼ်းႁိူၼ်းၽႂ်မၼ်းမူတ်းယဝ်ႉ” ဝႃႈၼႆ။
ၶူဝ်ႁူၺ်ႈၵိုတ်ႈၼႆႉ မီးၾၢႆႇၸၢၼ်းဝဵင်းၼွင်ၶဵဝ်။ မီးလႅၼ်ၶႅၼ်ႈလိၼ်တိူင်းတႃႈလိူဝ်ႇလႄႈ မိူင်းတႆး ပဵၼ်ၶူဝ်ဢၼ်လမ်ႇလွင်ႈ တႃႇၵၢၼ်ၵႃႉၶၢႆလႄႈ ပၢႆးမၢၵ်ႈမီးၵူၼ်းမိူင်းမၢၼ်ႈ မိူင်းၶႄႇ ဢၼ်ၼိုင်ႈသေ ရူတ်ႉၵႃးဢၼ်လတ်းၽၢၼ်ႇၵႂႃႇမႃးတီႈၶူဝ်ၼႆႉ ၽတ်ႉၽဵင်ႇၼိုင်ႈဝၼ်းမီးမွၵ်ႈမိုၼ်ႇ။
ဝၼ်းတီႈ 15/8/2019 မိူဝ်ႈဝႃးၼႆႉ ၸုမ်းဢူၺ်းလီပွတ်းႁွင်ႇ 3 ၸုမ်း TNLA, AA, MNDAA ၶဝ်ႈယိုဝ်းတပ်ႉပၢင်သဝ်းပလိၵ်ႈ ႁူၺ်ႈၵိုတ်ႈတၢႆ 14 ၵေႃႉ။ ဝၢႆးၼၼ်ႉ ဢဝ်မၢၵ်ႇပွႆႇသႂ်ႇၶူဝ်ႁူၺ်ႈၵိုတ်ႈ ၵူၼ်ႇပင်းႁၢၵ်းလႅဝ်ရူတ်ႉၵႃး ဢမ်ႇၸၢင်ႈၵႂႃႇမႃး။
