ဝၢႆးသေ ၸုမ်းဢူၺ်းလီပွတ်းႁွင်ႇ 3 ၸုမ်း လူမ်ႇယိုဝ်း ၼႂ်းၸႄႈဝဵင်းၼွင်ၶဵဝ်လႄႈ တီႈၸၼ်ႉၸွမ်သိုၵ်းမၢၼ်ႈ (ၾၢႆႇပၢႆး ၸၢၵ်ႈ) တီႈဝဵင်းပၢင်ႇႁူႈၼၼ်ႉသေ ယၢမ်းဝၢႆးဝၼ်းၼၼ်ႉ လႆႈမႃးပဵၼ်ပၢင်တိုၵ်းၵၼ် တင်း RCSS ထႅင်ႈ ဝႃႈၼႆ။

ဝၼ်းတီႈ 15/8/2019 ယၢမ်းႁူဝ်ၶမ်ႈ 5 မူင်းၼၼ်ႉ တပ်ႉသိုၵ်းတဢၢင်း TNLA တင်း တပ်ႉသိုၵ်းတႆး RCSS လႆႈပဵၼ်ပၢင် တိုၵ်းၵၼ် ၼႂ်းၵႄႈမၢၼ်ႈပၢင်ႇတင်း ဝၢၼ်ႈပၢင်မၢၵ်ႇလုပ်ႇ ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇထႅင်ႈ ႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းတဢၢင်း TNLA ပိုၼ်ၽၢဝ်ႇဝႆႉ။

ၸဝ်ႈႁၢၼ်တႃႉဢၢႆႈၵျေႃႇ ႁွင်ႈၵၢၼ်ၾၢႆႇပိုၼ်ၽၢဝ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ “လႆႈႁိုၵ်ႉၺႃးၵၼ်တင်း သၢႆသိုၵ်း RCSS သေ ပိုတ်းယိုဝ်းၵၼ်။ ၵူၼ်းသိုၵ်း TNLA တၢႆၵေႃႉၼိုင်ႈ” ဝႃႈၼႆ။

ၵဵဝ်ႇၵပ်းလွင်ႈၼႆႉ ၾၢႆႇ RCSS တႄႉ တွပ်ႇလၢတ်ႈတီႈၽူႈတွႆႇႁွၵ်ႈဝႃႈ ပႆႇလႆႈႁူႉၸွမ်းႁူဝ်ယွႆႈတႅတ်ႈတေႃး ဝႃႈၼႆ။

ၸဝ်ႈသိုၵ်း ၸၢႆးမိူင်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈပႆႇယိုၼ်ယၼ်လႆႈဝႃႈ တပ်ႉသိုၵ်း တဢၢင်း တင်း တပ်ႉသိုၵ်းႁဝ်း ပဵၼ်ပၢင်တိုၵ်းၵၼ်ဢၼ်ဝႃႈၼၼ်ႉ။ ၵဵဝ်ႇၵပ်းလွင်ႈၼႆႉ ႁဝ်းၶႃႈ တိုၵ်ႉၶတ်းၸႂ် တွင်ႈထၢမ်ၵႂႃႇ တီႈၵူၼ်း ႁဝ်းၼႂ်းပိုၼ်ႉတီႈယူႇ။ ၵူၺ်းၵႃႈ တၢင်းတႂ်ႈပႆႇႁၢႆးငၢၼ်းမႃးလႄႈ ႁဝ်းၶႃႈပႆႇယိုၼ်ယၼ်လႆႈဝႃႈ ႁဝ်းတင်းၶဝ် ပဵၼ်ပၢင်တိုၵ်းၵၼ်” ဝႃႈၼႆ။

ၵဵဝ်ႇၵပ်းလွင်ႈၼႆႉ ဢူးမွင်ႇမွင်ႇၸူဝ်း ၽူႈပၵ်းတႃပႂ်ႉတူၺ်း ၵၢၼ်မိူင်း၊ ၵၢၼ်သိုၵ်း လၢတ်ႈတီႈၽူႈတွႆႇႁွၵ်ႈဝႃႈ ၵႃႈၸူဝ်ႈ TNLA လႄႈ RCSS ပႆႇဢုပ်ႇၵၼ်လႆႈတႄႉ တိုၼ်းတေၵမ်းၵမ်းပဵၼ်ပၢင်တိုၵ်းယူႇဝႃႈၼႆ။

“TNLA လႄႈ RCSS ၼႆႉ ၶဝ်ပဵၼ်ၸုမ်းဢၼ်ဢမ်ႇလႆႈႁူပ်ႉထူပ်းဢုပ်ႇၵုမ်ၵၼ်သေၵမ်း။ ပေႃးပႆႇမီးလွင်ႈဢုပ်ႇဢူဝ်းၵၼ် ၼႆႉ မၼ်းတိုၼ်းတေဢမ်ႇၸၢင်ႈၵိုတ်းပၢင်တိုၵ်းၵၼ်လႆႈ မိူၼ်ၼင်ႇ SSPP တင်း RCSS တႄႉ ၶဝ်လႆႈဢုပ်ႇၵၼ်လႄႈ ၶဝ် ၸၢင်ႈ ၵိုတ်းတိုၵ်းၵၼ်ယဝ်ႉၼႃႇ။ ဢၼ်လီသေပိူၼ်ႈတႄႉ ဢုပ်ႇဢူဝ်းၵၼ်ၼႆႉၵူၺ်း တေၸၢင်ႈၵႄႈလိတ်ႈလႆႈပၼ်ႁႃၼႆႉ” ဝႃႈၼႆ။

မိူဝ်ႈဝႃး ဝၼ်းတီႈ 15/8/2019 ယၢမ်းၵၢင်ၼႂ် 5 မူင်းၼၼ်ႉ ၸုမ်းဢူၺ်းလီပွတ်းႁွင်ႇ ဢၼ်မီး သိုၵ်းလွႆ TNLA, သိုၵ်းရၶႅင်ႇ AA, သိုၵ်းၵဝ်ႈၵၢင်ႉ MNDAA ႁူမ်ႈၵၼ် ၶဝ်ႈလူမ်ႇယိုဝ်း ၸၼ်ႉၸွမ်သိုၵ်း DSTA တီႈဝဵင်းပၢင်ႁူႈ (ပၢင်ႇဢူႈလူင်/ ပိၼ်ႇဢူး လုၼ်ႇ) ၊ တီႈလၢၼ်ႇ X-Ray ရူတ်ႉၵႃး ႁိမ်းၽြႃး လူင်ပၢင်ႇဢူႈ (တၢင်းဢွၵ်ႇၵႂႃႇလႃႈသဵဝ်ႈ) ၊ တပ်ႉၵွင် 114 လႄႈ 115 ဢၼ်မီး ႁိမ်း ဝၢၼ်ႈၵုင်းၵႅင်း ၊ တီႈလၢၼ်ႇၵူတ်ႇထတ်းယႃႈမဝ်းၵမ်လႄႈ တူဝ်းၵဵတ်ႉ ဢူဝ်ႊရီႊယႅၼ်ႊထိူဝ်ႊ ႁၢႆးဝေးႁူဝ်ၵိုတ်ႈ ဝဵင်း ၼွင်ၶဵဝ် လႄႈ ၶူဝ်ႁူၺ်ႈၵိုတ်ႈ ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

ႁွင်ႈၵၢၼ် ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ “ယွၼ်ႉၸုမ်းၽူႈသုၵ်ႉယုင်ႈ ဢူၼ်ၵဝ်းၶဝ်ႈ ယိုဝ်းတီႈၼွင်ၶဵဝ်ၼၼ်ႉသေ သိုၵ်းလႄႈပလိၵ်ႈလူင်ပွင်ၸိုင်ႈမၢၼ်ႈ လႆႈလူႉတၢႆၵႂႃႇ 12 ၵေႃႉ။ ၵူၼ်းမိူင်းတၢႆ 2 ၵေႃႉ” ဝႃႈၼႆ။