မိူဝ်ႈၼႆႉ ၸုမ်းၽူႈသိုဝ်ႇၶၢဝ်ႇဝဵင်းတူၼ်ႈတီး ၸတ်းႁဵတ်းပၢင်ၵုမ် ၽူႈသိုဝ်ႇၶၢဝ်ႇဢၼ်ႁႃၶၢဝ်ႇတႅမ်ႈၶၢဝ်ႇၼႂ်းမိူင်းတႆး။

ဝၼ်းတီႈ 15/8/2019 ယၢမ်းၵၢင်ၼႂ် 8 မူင်းၶိုင်ႈ ထိုင် 3 မူင်းဝၢႆးဝၼ်း ယူႇတီႈၸုမ်း Taunggyi Journalist Association (TJA) ဢွၼ်ႁူဝ်ၸတ်းႁဵတ်း ပၢင်ၵုမ်ၽူႈသိုဝ်ႇၶၢဝ်ႇ ၸိူဝ်းႁႃၶၢဝ်ႇတႅမ်ႈၶၢဝ်ႇ ၼႂ်းမိူင်းတႆး။ ပၢင်ၵုမ်ၸတ်းႁဵတ်း တီႈဝတ်ႉဢွင်ႇမေႇ ပူင်ႇၸၢၼ်ႇ ပွၵ်ႉၸဵင်ႇပၢၼ်း ၸႄႈဝဵင်း တူၼ်ႈတီး ၸိုင်ႈတႆးပွတ်းၸၢၼ်း။

မွင်ႇၸီႇတႃႇႁဵင်း ၽူႈဢွၼ်ႁူဝ်ပွင်ပဵၼ်ပၢင်ၵုမ် ၸုမ်း Taunggyi Journalist Association (TJA) လၢတ်ႈဝႃႈ “ ယိူင်းဢၢၼ်း ဢၼ်လႆႈဢုပ်ႇဢူဝ်းၵၼ် မိူဝ်ႈ ၼႆႉ ၼင်ႇႁိုဝ် ၽူႈသိုဝ်ႇၶၢဝ်ႇဢၼ်မီးၼႂ်းမိူင်းတင်းသဵင်ႈ ပေႃးၽွမ်ႉႁူမ်ႈၵၼ်သေ ယဝ်ႉၵေႃႈ ႁႂ်ႈပေႃးပဵၼ်ႁႅင်းယႂ်ႇၶိူင်ႇၶမ်ႉ ၵႅၼ်ႇၶႅင် ၶိုၼ်ႈမႃး” ဝႃႈၼႆ။

သိုပ်ႇလၢတ်ႈဝႃႈ “ တေႃႈလဵဝ် ၽူႈသိုဝ်ႇၶၢဝ်ႇ/ ဢဝ်ၶၢဝ်ႇၼႆႉ ယွမ်းလူင်းၵႂႃႇၵမ်းဢိတ်းဢိတ်း ၺႃးၸွႆးတြႃး၊ ၺႃးလွၵ်ႇငိုတ်ႈ ၸိူဝ်းၼႆႉ ၼင်ႇႁိုဝ် တေႁႃလႆႈတၢင်းဢွၵ်ႇမၼ်းၼၼ်ႉ ႁဝ်းၶႃႈ ၸင်ႇမႃးၸတ်းႁဵတ်းပၢင်ၵုမ် ႁူပ်ႉဢုပ်ႇဢူဝ်းၵၼ်ၶႃႈ ယဝ်ႉ။ လိူဝ်ၼၼ်ႉ ဢၼ်လႆႈဢုပ်ႇဢူဝ်းၵၼ်မႃး ၽွၼ်းပၢင်ႈမၼ်းၼၼ်ႉ တေဢွၵ်ႇၶေႃႈပိုၼ်ၽၢဝ်ႇ၊ ယဝ်ႉၵေႃႈ တေႁဵတ်း လိၵ်ႈတၢင်ႇၸူးလူင်ပွင်ၸိုင်ႈ ၸဵမ်ၸိူဝ်းၼႆႉ” ဝႃႈၼႆ။

ပၢင်ၵုမ် ၽူႈသိုဝ်ႇၶၢဝ်ႇၼႆႉ မီးၽူႈသိုဝ်ႇၶၢဝ်ႇ တၢင်းမိူင်းတႆးပွတ်းႁွင်ႇ၊ ပွတ်းၸၢၼ်းလႄႈ ပွတ်းဢွၵ်ႇၶူင်း ၸဵမ် ၸိူဝ်းၼႆႉ ၶိုၼ်ႈႁွတ်ႈ။

ၶုၼ်ႇသေႃႇဢူး ၽူႈသိုဝ်ႇၶၢဝ်ႇ DVB ဢၼ်ၺႃး ၸႅင်ႈၵႂၢမ်း လွင်ႈဝႃႈ ႁေႃႈၵႃး ဢမ်ႇ မီးဝႂ်ၶွၼ်ႇၼၼ်ႉ လၢတ်ႈဝႃႈ “ ဢၼ် လမ်ႇလွင်ႈမၼ်း ယူႇတီႈၽူႈသိုဝ်ႇၶၢဝ်ႇၼႂ်းမိူင်းတႆးၼႆႉသေ ဢွင်ႈတီႈ ဢၼ်မၵ်းတတ်း ဢမ်ႇပၼ်ဢဝ်ၶၢဝ်ႇ၊ ဢွင်ႈတီႈၵုမ်း ၵမ်၊ ဢွင်ႈတီႈပၼ်ႁႃ ပၢင်တိုၵ်း။ ယဝ်ႉၵေႃႈ ဢွင်ႈတီႈၵၢၼ်ၵႃႉၶၢႆလႄႈလွင်ႈ ယႃႈမဝ်းၵမ် ၸိူဝ်းၼႆႉ။ ပိူင်ပဵၼ်ၸိူင်ႉၼႆ တွၼ်ႈတႃႇၽူႈသိုဝ်ႇၶၢဝ်ႇမိူင်းတႆး ပေႃးတေလႆႈတႅမ်ႈၶၢဝ်ႇဢွၵ်ႇၼၼ်ႉ ယွၼ်ႉမီးလွင်ႈ လွၵ်ႇငိုတ်ႈ ဢမ်ႇမီးလွင်ႈႁူမ်ႇလူမ်ႈ ၸဵမ်ၸိူဝ်းၼႆႉ ပဵၼ်ဢၼ်ယၢပ်ႇၽိုတ်ႇသေ ၸင်ႇလႆႈမႃးဢုပ်ႇဢူဝ်း ႁႃတၢင်းဢွၵ်ႇမၼ်းၵႂႃႇ” ဝႃႈၼႆ။

တႄႇဢဝ် ပၢၼ်လူင်ပွင်ၸိုင်ႈ ၵူၼ်းမိူင်းၼႆႉၶိုၼ်ႈမႃး ၽူႈသိုဝ်ႇၶၢဝ်ႇ ဢၼ်ၺႃးၸွႆးတြႃး ပိုတ်ႇလိူင်ႈဝႆႉ တင်းမူတ်းမီး 36 လိူင်ႈ ဝႃႈၼႆ။