သိုၵ်းလူင်ပွင်ၸိုင်ႈမၢၼ်ႈ ဢွၵ်ႇၶေႃႈပိုၼ်ၽၢဝ်ႇ ပၼ်ၾၢင်ႉၸူးၸုမ်းၸၢဝ်းၶိူဝ်းယိပ်းၵွင်ႈၵၢင်ႇ ၸိူဝ်းပႆႇလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉ တူဝ်ႈမိူင်း NCA ၼၼ်ႉဝႃႈ ယႃႇၸၼ်ၶၢဝ်းယၢမ်း ႁႂ်ႈဢုပ်ႇဢူဝ်းငူပ်ႉငီႉၵၼ်ၵႂႃႇ ထိုင်တီႈထိုင်လႅၼ် ဝႃႈၼႆ။
ဝၼ်းတီႈ 14/8/2019 ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇပၼ်ၾၢင်ႉၸူး ၸုမ်းယိပ်းၵွင်ႈၵၢင်ႇ ၸိူဝ်းပႆႇလူင်း မိုဝ်း NCA ၼၼ်ႉ ယွၼ်ႉဝႃႈ ၶၢဝ်းယၢမ်းၵိုတ်းယိုဝ်း ဢၼ်တပ်ႉသိုၵ်းလူင်ပွင်ၸိုင်ႈပိုၼ်ၽၢဝ်ႇဝႆႉၼၼ်ႉ တေသုတ်းသဵင်ႈ လိူၼ်ဢေႃႊၵတ်ႊသ်ၼႆႉယဝ်ႉလႄႈ ယွၼ်ႉၼၼ် ႁႂ်ႈၸုမ်းယိပ်းၵွင်ႈၸၢဝ်းၶိူဝ်း ဢၼ်ပႆႇလူင်းလၢႆးမိုဝ်းၼၼ်ႉ ႁႂ်ႈသိုပ်ႇဢုပ်ႇ ဢူဝ်းငူပ်ႉငီႉၵၼ်ၵႂႃႇ ထိုင်တီႈထိုင်လႅၼ်။
ၼႂ်းလိၵ်ႈပိုၼ်ၽၢဝ်ႇ ၶွင်တပ်ႉသိုၵ်းလူင်ပွင်ၸိုင်ႈမၢၼ်ႈၼၼ်ႉ ဢွၵ်ႇဝႆႉဝႃႈ “ၸိူဝ်းပႆႇၵိုတ်းတိုၵ်း ႁႂ်ႈၸဵဝ်းဢုပ်ႇဢူဝ်းငူပ်ႉငီႉ ၵၼ်သေ ႁႃၶေႃႈတွပ်ႇ ႁႂ်ႈၶဝ်ႈမႃးၼႂ်းၶၵ်ႉၵၢၼ်လွင်ႈငမ်းယဵၼ်ၵႂႃႇ” ဝႃႈၼႆ။
ယူႇတီႈၾၢႆႇသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ်မႃးၼႆႉ တႄႇဢဝ် ဝၼ်းတီႈ 21 လိူၼ်ၻီႊသႅမ်ႊပိူဝ်ႊ 2018 ထိုင် ဝၼ်းတီႈ 30 လိူၼ်ဢေႊပရိူဝ်ႊ 2019 ၵမ်းၼိုင်ႈ၊ သိုပ်ႇယိုတ်ႈထႅင်ႈ တႄႇဢဝ် ဝၼ်းတီႈ 1 လိူၼ်မေႊ 2019 ထိုင် ဝၼ်းတီႈ 30 လိူၼ်ၵျူၼ်ႊ 2019 ထႅင်ႈၵမ်းၼိုင်ႈ။ လိူဝ်ၼၼ်ႉ သိုပ်ႇယိုတ်ႈထႅင်ႈ တႄႇဢဝ် ဝၼ်းတီႈ 1 လိူၼ်ၵျူႊ လၢႆႊ 2019 ထိုင် ဝၼ်းတီႈ 31 လိူၼ်ဢေႃႊၵတ်ႊသ်ၼႆႉ ထႅင်ႈၵမ်းၼိုင်ႈ တင်းမူတ်း ၵိုတ်းတိုၵ်း/ ယိုတ်ႈၶၢဝ်းယၢမ်းၵႂႃႇပဵၼ် 8 လိူၼ်။
ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၸီႉသင်ႇဝႆႉၵိုတ်းတိုၵ်း ၼႂ်းမိူင်းတႆး 4 တိူင်း၊ တိူင်းသိုၵ်းၸဵင်ႇႁွင်ႇ ဝၼ်းဢွၵ်ႇ (လႃႈသဵဝ်ႈ)၊ တိူင်းသိုၵ်းဝၼ်းဢွၵ်ႇ(တူၼ်ႈတီး)၊ တိူင်းသိုၵ်းဝၼ်းဢွၵ်ႇ ၵၢင် (ၶူဝ်လမ်) လႄႈ တိူင်းသိုၵ်းသၢမ် ၸဵင်ႇ (ၵဵင်းတုင်) တင်းတိူင်းသိုၵ်းပွတ်းႁွင်ႇ ရပၶ ၸေႈၼႃး(မျိတ်ႉၵျီးၼႃး)။
မိူဝ်ႈဝၼ်းတီႈ 12/8/2019 ၼၼ်ႉ ယူႇတီႈၸုမ်းဢူၺ်းလီပွတ်းႁွင်ႇ 3 ၸုမ်း တပ်ႉသိုၵ်းတဢၢင်း TNLA၊ ၵူဝ်းၵၢင်ႉ MNDAA လႄႈ ရၶႅင်ႇ AA ႁူမ်ႈၵၼ် လႆႈၸႂ် ဢွၵ်ႇၶေႃႈပိုၼ်ၽၢဝ်ႇမႃး ၼႂ်းၼၼ်ႉ လၢတ်ႈဝႆႉဝႃႈ ၽွင်းသိုၵ်းလူင်ပွင်ၸိုင်ႈ မၢၼ်ႈၵိုတ်း တိုၵ်းယူႇၼႆႉ ၸႂ်ႉလွၵ်းလၢႆး ၵူႈပိူင်ပိူင်သေ ထူဝ်းသိုၵ်းၽိုတ်ႉၶဝ်ႈၸူး ၸုမ်းယိပ်းၵွင်ႈၵၢင်ႇၸၢဝ်းၶိူဝ်းသေ ဢမ်ႇၵႃး ပဵၼ်ပၢင် တိုၵ်းၵၼ် ထႅင်ႈတင်းၼမ်လၢႆ။ သင်ဝႃႈ ပဵၼ်ပၼ်ႁႃလွင်ႈသင်မႃးၸိုင် ပဵၼ်ပုၼ်ႈၽွၼ်း တပ်ႉသိုၵ်းလူင် ပွင်ၸိုင်ႈမၢၼ်ႈၼႆ သေ ဝၼ်းတီႈ 15/8/2019 ၵၢင်ၼႂ်ၼႆႉ 3 ၸုမ်းႁူမ်ႈၵၼ်ၵႂႃႇလေႃႇၸၼ်ႉၸွမ်သိုၵ်း DSTA (မေႇမျဵူဝ်ႉ) ဢိၵ်ႇ 4 တီႈ ၼႂ်းၸႄႈ ဝဵင်းၼွင်ၶဵဝ် တင်းၵျွၵ်ႉမႄး။
လိူဝ်ၼၼ်ႉ ၼႂ်းလိူၼ်ဢေႃႊၵတ်ႊသ်ၼႆႉၵူၺ်း သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်တၢင်း ပွတ်းႁွင်ႇ ဢမ်ႇယွမ်း 14 ပွၵ်ႈ ႁွင်ႈၵၢၼ်ပိုၼ်ၽၢဝ်ႇတပ်ႉသိုၵ်းတဢၢင်းဢွၵ်ႇဝႆႉ မိူဝ်ႈဝၼ်းတီႈ 13/8/2019 ၼႆႉ။
ၼွၵ်ႈလိူဝ်ၼၼ်ႉ မိူဝ်ႈဝၼ်းတီႈ 6/8/2019 ယၢမ်းဝၢႆးဝၼ်း မွၵ်ႈ 2 မူင်းပၢႆၼၼ်ႉၵေႃႈ သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်း လေႃႇတိုၵ်းတပ်ႉ ပႃႇတီႇ မႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA တၢင်းပွတ်းၸႄႈဝဵင်းတၢင်ႉယၢၼ်း ၸိုင်ႈတႆး ပွတ်းႁွင်ႇ ၵူၼ်းမိူင်းၼပ်ႉႁူဝ်ပၢၵ်ႇၺႃးၽေးသိုၵ်း။
