ၵူၼ်းဝၢၼ်ႈဢၼ်ပၢႆႈၽေးမႃးသွၼ်ႈဝႆႉၸွမ်းဝတ်ႉဝႃး တီႈတၢင်ႉယၢၼ်း ႁူဝ်ၵူၼ်း မွၵ်ႈ 490 ၵေႃႉ ယွၼ်ႉပၢင်တိုၵ်းၼၼ်ႉ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းယဝ်ႉ ဝႃႈၼႆ။
ဝၼ်းတီႈ 11/8/2019 ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉလူင်မူႉ၊ ဝတ်ႉႁူဝ်မင်း၊ ဝတ်ႉၼမ်ႉပိုင်ႈလႄႈ ဝတ်ႉ တေႃလွၵ်ႇ ၼႂ်းၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇၼၼ်ႉ ၶိုၼ်းဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းမူတ်းယဝ်ႉ။
ၽူႈဢွၼ်ႁူဝ်တူင်ႉၼိုင် ၼႂ်းၸုမ်းၵူၼ်းၼုမ်ႇ တၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ “ ဢွၼ်ၵၼ်ပွၵ်ႈမိူဝ်းၶိုၼ်းႁိူၼ်းၽႂ် မၼ်းမူတ်းယဝ်ႉ။ ဢွၼ်ၵၼ်ပွၵ်ႈမိူဝ်း မိူဝ်ႈဝၼ်းတီႈ 11 ၼၼ်ႉၶႃႈ။ လႆႈငိၼ်းဝႃႈတႄႉ သိုၵ်းမၢၼ်ႈ ၶၢႆႉၵႂႃႇတၢင်းလွႆၸေး ပၢင်မွင်ၸိူဝ်းၼၼ်ႉ” ဝႃႈၼႆ။
မိူဝ်ႈဝၼ်းတီႈ 6/8/2019 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ တင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA ပဵၼ်ပၢင်တိုၵ်းၵၼ် ၼႂ်းၵႄႈ ဝၢၼ်ႈၼႃးပဵင်းလႄႈ ဝၢၼ်ႈၵုၼ်ဝႅတ်ႈ။ သိုၵ်းမၢၼ်ႈၼႄးဝႃႈ သိုၵ်းတႆး ၵဵပ်းသိုၵ်းမႂ်ႇ ၼႆသေ ႁႅၼ်းသိုၵ်းလေႃႇယိုဝ်းသိုၵ်းတႆး ဢဵၼ်ႁႅင်း ႁိမ်း 200 ၵေႃႉ ဝႃႈၼႆ။
ၵူၼ်းပၢႆႈၽေးသိုၵ်း တီႈဝတ်ႉလူင်မူႉ ၵေႃႉၼိုင်ႈ လၢတ်ႈဝႃႈ “ တၢင်းပွတ်းတွၼ်ႈဢၼ်ၶဝ်ပဵၼ်ပၢင်တိုၵ်းၵၼ်ၼၼ်ႉ မၼ်း ပဵၼ်တီႈယူႇ SSPP ယူႇသဝ်းတူင်ႉၼိုင်ဝႆႉ” ဝႃႈၼႆ။
မိူဝ်ႈဝၼ်းတီႈ 6/8/2019 ၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၵူတ်ႇထတ်းၵူၼ်းမိူင်း ၸႅတ်ႈယဵဝ်ႈသေ တီႉလႆႈၵူၼ်းမိူင်း 29 ၵေႃႉ။ ၵဵဝ်ႇၵပ်းလွင်ႈၼႆႉ သိုၵ်းမၢၼ်ႈဝႃႈ ၵဵပ်းသိုၵ်းမႂ်ႇၼႆသေ ႁႅၼ်းသိုၵ်းလေႃႇယိုဝ်း သိုၵ်းတႆး SSPP ဝႃႈၼႆ။
ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ မိူဝ်ႈ 21/12/2018 ၼၼ်ႉဝႃႈ ၵိုတ်းတိုၵ်းၾၢႆႇလဵဝ် ၶၢဝ်းတၢင်း 4 လိူၼ်၊ ထိုင်လိူၼ်ဢေႊပရိူဝ်ႊ ယိုတ်ႈထႅင်ႈ 2 လိူၼ် လိူၼ်ၵျုၼ်ႊသဵင်ႈယိုတ်ႈထႅင်ႈ 2 လိူၼ် တေႃႇလိူၼ်ဢေႃႊၵတ်ႊသ်သဵင်ႈ ပဵၼ် ၵႂႃႇ 8 လိူၼ်။ ပိုၼ်ၽၢဝ်ႇၸီႉသင်ႇဝႆႉၼႂ်း 5 တိူင်းသိုၵ်း မိူၼ်ၼင်ႇ တိူင်းသိုၵ်းပွတ်းႁွင်ႇ(ၸေႊၼႃး)၊ တိူင်းသိုၵ်းၸဵင်ႇႁွင်ႇ ဝၼ်းဢွၵ်ႇ (လႃႈသဵဝ်ႈ)၊ တိူင်းသိုၵ်းဝၼ်းဢွၵ်ႇ(တူၼ်ႈတီး)၊ တိူင်း သိုၵ်းဝၼ်းဢွၵ်ႇၵၢင် (ၶူဝ်လမ်) လႄႈ တိူင်းသိုၵ်းသၢမ် ၸဵင်ႇ (ၵဵင်းတုင်) ၸိူဝ်းၼႆႉ။
