ၵူၼ်းၼုမ်ႇထုင်ႉမိူင်းၶိူဝ်း သၢၼ်မိုဝ်းၵၼ်သေ ၸတ်းပၢင်ယုၵ်ႉမုၼ်းၽိူမ်ႉထႅမ်ၼမ်ႉၵတ်ႉ ပွၵ်ႈၵမ်း 5 ၵႂႃႇ ၶၢဝ်းတၢင်း 6 ဝၼ်း။
ၵေႃပွင်ၵၢၼ် ၵေႃႁူမ်ႈသၢင်ႈၵူၼ်းၼုမ်ႇတႆး ထုင်ႉမိူင်းၶိူဝ်း ဢွၼ်ႁူဝ်ၸတ်းႁဵတ်းပၢင်ယုၵ်ႉမုၼ်းၽိူမ်ႉထႅမ်ၼမ်ႉၵတ်ႉ ၵူၼ်း ၼုမ်ႇ လႅၼ်တွၼ်ႈမိူင်းၶိူဝ်း ပတ်းပိုၼ်ႉသီႇဢိူင်ႇ တႄႇဝၼ်း 10-15/8/2019 တီႈႁွင်ႈလုမ်း တပ်ႉၸုမ်းမၢႆ 3 တပ်ႉသိုၵ်းၵူၼ်း မိူင်းတႆး ဢိူင်ႇမိူင်းၶိူဝ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ယိူင်းဢၢၼ်းႁႂ်ႈၵူၼ်းၼုမ်ႇပိုၼ်ႉ တီႈၶိုတ်းတၼ်းလွင်ႈလႅၵ်ႈ လၢႆႈၵၢၼ်မိူင်း၊ ၵၢၼ်ပၢႆးမၢၵ်ႈမီး ဝၼ်းမိူဝ်ႈၼႆႉ။
လုင်းၸၢႆးႁၵ်ႉ ၽူႈဢွၼ်ႁူဝ်ၵူၼ်းၼုမ်ႇထုင်ႉမိူင်းၶိူဝ်းလၢတ်ႈဝႃႈ “ ပေႃးၵူၼ်းၼုမ်ႇႁဝ်းၶဝ် လဵပ်ႈႁဵၼ်းႁူႉမေႃယဝ်ႉၼႆ ႁႂ်ႈမေႃ ၶိုၼ်းမိူဝ်းတေႃႉတႆႇၶႆႈၼႄပူင်သွၼ်ပၼ်ၶိုၼ်းၼႂ်းထုင်ႉၽႂ်မၼ်း” ဝႃႈၼႆ။
ဝၼ်းတီႈ 10/8/2019 ယၢမ်းၵၢင်ၼႂ် 9 မူင်း လႆႈပိုတ်ႇပၢင်သွၼ်ၵႂႃႇတီႈႁွင်ႈလုမ်းၸဝ်ႈ သိူဝ်ၶၢၼ်ႇၾႃႉ လင်ၵဝ်ႇ ၼႂ်းတပ်ႉ သဝ်း တပ်ႉၸုမ်း 3 တပ်ႉသိုၵ်းၵူၼ်းမိူင်းတႆး မိူင်းၶိူဝ်း မီးၽူႈၶဝ်ႈႁူမ်ႈ 60 ပၢႆ ဢိၵ်ႇပႃးၽူႈယႂ်ႇၵူၼ်းလူင်ၼႂ်းပွၵ်ႉ/ ဝၢၼ်ႈ။
ၸဝ်ႈႁၢၼ်ၸူမ်းၶိူဝ်း ၽူႈၵွၼ်းၼႃႈလိၼ်တွၼ်ႈမိူင်းၶိူဝ်း မွၵ်ႇလၢတ်ႈၶေႃႈၵႂၢမ်းၵႂႃႇဝႃႈ “ ၵူၼ်းၼုမ်ႇတႆးႁဝ်း ႁႂ်ႈၶိုတ်းတၼ်း ၸၼ်ႉပူၵ်းပွင်ႁဵတ်းသၢင်ႈလႆႈမိူၼ်ၼင်ႇ တၢင်ႇၸၢဝ်းၶိူဝ်းၶဝ် ႁႂ်ႈမေႃႁူႉပုၼ်ႈၽွၼ်းလႄႈ ၼႃႈၵၢၼ်ၵူၼ်း လူင်ၵႂႃႇဝၼ်းမိူဝ်း ၼႃႈ” ဝႃႈၼႆ။
ၽူႈၶဝ်ႈႁူမ်ႈပၢင်သွၼ် ပဵၼ်ၵူၼ်းၼုမ်ႇထုင်ႉမိူင်းၶိူဝ်း သီႇဢိူင်ႇ မိူၼ်ၼင်ႇ ဢိူင်ႇမိူင်းၶိူဝ်း၊ ဢိူင်ႇ သီႇထွၵ်ႈ၊ ဢိူင်ႇၼွင်ဝၼ်း လႄႈ ဢိူင်ႇၼွင်ၵေႃႈ။ ၼိုင်ႈဢိူင်ႇလႂ်မႃးၶဝ်ႈႁူမ်ႈလဵပ်ႈႁဵၼ်း 10 ၵေႃႉ။ ပူင်သွၼ်ပၼ် ပၢႆးမၢၵ်ႈမီး၊ ပၢႆးပူၵ်းပွင်တူင်ႇၵူၼ်း၊ ပၢႆး ထိင်းသိမ်းသိင်ႇဝႅတ်ႉလွမ်ႉလႄႈ ပၢႆး IT ၸိူဝ်းၼႆႉ။ ၶူးပူင်သွၼ်မီး 4 ၵေႃႉ လုၵ်ႈႁဵၼ်း မီး 40 ပၢႆ။
ၼႂ်းပိုၼ်ႉတီႈလႅၼ်တွၼ်ႈမိူင်းၶိူဝ်းၼႆႉ ၸတ်းႁဵတ်းပၢင်ယုၵ်ႉမုၼ်းၽိူမ်ႉထႅမ်ၼမ်ႉၵတ်ႉ ၵူၼ်းၼုမ်ႇတႆး ပွၵ်ႈၵမ်းၼႆႉ ပဵၼ် ပွၵ်ႈၵမ်း 5 ယဝ်ႉ ဝႃႈၼႆ။
ယေႈသႅင်ၵေႃႇ – သူင်ႇၶၢဝ်ႇ
