ႁႅင်းၵၢၼ်ယၢၼ်မိူင်းၵေႃႉၼိုင်ႈ ဢႃယု 41 ပီ ဢၼ်ယူႇၼႂ်းၸႄႈဝဵင်းႁၢင်ၻူင်း ၸႄႈတွၼ်ႈၵဵင်းမႆႇၼၼ်ႉ ၵႂႃႇႁႃသျွတ်ႉပႃသေ ၺႃးၾႆးသျွတ်ႉတၢႆ ၼႂ်းႁွင်ႈၼမ်ႉ သိုဝ်ႉၶၢဝ်ႇၵဵင်းမႆႇၼိဝ်းသ်ဢွၵ်ႇဝႆႉၼင်ႇၼႆ။

ဝၼ်းတီႈ 13/8/2019 ယၢမ်းဝၢႆးဝၼ်း 2 မူင်းၶိုင်ႈပၢႆၼၼ်ႉ ထူပ်းႁၼ်တူဝ်တၢႆ ႁႅင်းၵၢၼ်ယၢၼ်မိူင်း ၵေႃႉၼိုင်ႈ ၸိုဝ်ႈႁွင်ႉ ၸၢႆး တေႃးၼ ဢႃယု 41 ပီ တီႈၼႂ်းႁွင်ႈၼမ်ႉ ပွတ်းၸႄႈဝဵင်းႁၢင်ၻူင်း ၸႄႈတွၼ်ႈၵဵင်းမႆႇ ၸိုင်ႈထႆး။ ၸဝ်ႈၼႃႈတီႈပလိၵ်ႈၵူတ်ႇ ထတ်း ဢမ်ႇလႆႈထူပ်းႁၼ်ႁွႆးမၢတ်ႇၸဵပ်း ၸွမ်းတူဝ်။ ၵွပ်ႈၼၼ်လႄႈ ၸၢင်ႈပဵၼ်လႆႈတႄႉ ၾႆးၾႃႉသျွတ်ႉၺႃးတူဝ်ၵဝ်ႇ ၶိုၼ်း သိုဝ်ႇၶၢဝ်ႇၵဵင်းမႆႇ ၼိဝ်းသ်တႅမ်ႈဢွၵ်ႇဝႆႉ ၼင်ႇၼႆ။

ၾၢႆႇပလိၵ်ႈထႆး ၵဵင်းမႆႇ လၢတ်ႈဝႃႈ “ ၵူၼ်းဝၢၼ်ႈ မႃးလၢတ်ႈၼႄဝႃႈ မီးၵူၼ်းတၢႆၼႂ်းႁွင်ႈၼမ်ႉၵေႃႉၼိုင်ႈၼႆသေ ႁဝ်းၶႃႈ လႆႈၵႂႃႇတူၺ်း။ ၵူၺ်းဢမ်ႇမီးႁွႆးမၢတ်ႇၸဵပ်းသင်။ တီႈလင်ၵူၼ်းတၢႆၼၼ်ႉ လႆႈႁၼ်မေႃႈပႅတ်ႊတိူဝ်ႊရီႊဝႆႉ။ ထၢင်ႇတႄႉ လႅပ်ႈၺႃး ၾႆးသျွတ်ႉသေတၢႆ” ဝႃႈၼႆ။

ၶၢပ်ႈတူဝ်တၢႆ ၸၢႆးတေႃးၼ ၽူႈမီးပုၼ်ႈၽွၼ်းၾၢႆႇၸွႆႈထႅမ်လႆႈ ဢဝ်ၵႂႃႇဝႆႉတီႈႁူင်းယႃ ပီႈၼွင်ႉၸိူဝ်ႉၶိူဝ်း မၼ်းၸၢႆး လႆႈၵႂႃႇႁပ်ႉဢဝ်မႃးလုမ်းလႃးယဝ်ႉ ဝႃႈၼႆ။