ၾႆးမႆႈ ဝတ်ႉဝိႁၢရ် လွႆႁိၼ်သႅင် ၵျွၵ်ႉမႄး လင်ၼိုင်ႈ လႄႈ ႁိူၼ်းၵူၼ်းဝၢၼ်ႈၼွင်သိၵ်းၵျႃး သီႇပေႃႉ လင်ၼိုင်ႈ ၼႂ်း ဝၼ်းလဵဝ်ၵၼ်။

ဝၼ်းတီႈ 11/8/2019 ယၢမ်းၵၢင်ၼႂ် မွၵ်ႈ 8 မူင်းၼၼ်ႉ ၾႆးမႆႈဝတ်ႉဝိႁၢရ်လူင် လွႆႁိၼ်သႅင် ပွၵ်ႉ 3 ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ။ ပဵၼ်ယွၼ်ႉသၢႆၾႆးၾႃႉသျွတ်ႉ လွင်ႈၵူၼ်းလူႉတၢႆမၢတ်ႇၸဵပ်းဢမ်ႇမီး ဝႃႈၼႆ။

ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်သၢႆ ၾႆးၾႃႉသျွတ်ႉ။ မႆႈတၢင်းၼႂ်းၵျွင်းမူတ်း ၶူဝ်းၶွင်တႄႉဢမ်ႇတၼ်းလႆႈသင် မႆႈႁႅင်းဝႆႉဢေႃႈ။ ပဵၼ်ၵျွင်း 2 ၸၼ်ႉ။ ၵျွင်းၵေႃႇ ဢုတ်ႇၶႃႈ။ လွင်ႈမၢတ်ႇၸဵပ်းလူႉတၢႆတႄႉ ဢမ်ႇမီး” ဝႃႈၼႆ။

လိူဝ်ၼၼ်ႉ ၼႂ်းဝၼ်းလဵဝ်ၵၼ် ယၢမ်းၵၢင်ဝၼ်း 11 မူင်းၶိုင်ႈၼၼ်ႉ ၾႆးမႆႈႁိူၼ်း ၵူၼ်းဝၢၼ်ႈလင်ၼိုင်ႈ ၼႂ်းဝၢၼ်ႈၼွင်သိၵ်း ၵျႃး ဢိူင်ႇတႃႈတေႈ ၸႄႈဝဵင်းသီႇပေႃႉ။ ၾႆးမႆႈတင်းလင် ဢမ်ႇတၼ်းလႆႈၶူဝ်းၶွင်သင် ဝႃႈၼႆ။

ၸၢႆးဝိၼ်းဢွင်ႇ ၸဝ်ႈႁိူၼ်း လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မိူဝ်ႈၽွင်းၾႆးမႆႈၼၼ်ႉ ဢမ်ႇမီးၵူၼ်းယူႇႁိူၼ်းသေ ၵေႃႉ။ ၶႃႈသမ်ႉ မႃးမီးဝႆႉတၢင်းၼမ်ႉလၼ်ႈ ယူႇၵႆဝႆႉ မိူဝ်ႈၽွင်းၼၼ်ႉ ၶႃႈၵပ်းၾူၼ်းႁႃ ၾၢႆႇၶႄၾႆးၶဝ် တီႈသီႇပေႃႉသေ ႁႂ်ႈ ၼႅတ်ႈဢွၼ်ၵၼ်ၵႂႃႇၸွႆႈႁူတ်းပၼ်ၽွင်ႈၼႆၶႃႈ။ ယွၼ်ႉၶႃႈၵူဝ်ၾႆးလၢမ်းမႆႈပႃးႁိူၼ်းႁိမ်းႁွမ်းၸိူဝ်းၼၼ်ႉ။ တင်းမူတ်း တေ သုမ်းမွၵ်ႈ 10 သႅၼ်ပၢႆ။ ၵဵဝ်ႇလူၺ်ႈ လွင်ႈၾႆးမႆႈၼႆႉ ပဵၼ်ယွၼ်ႉသင်တႄႉတႄႉ ဢၼ်ဝႃႈၼၼ်ႉ ႁဝ်းၶႃႈ ဢမ်ႇလႆႈႁူႉလွင်ႈ တၢင်းမၼ်းလီလီ။ ပဵၼ်ၾႆး ၽိုၼ်းဢၼ်ႁဝ်းသႂ်ႇဝႆႉၼၼ်ႉႁႃႉ၊ ဢမ်ႇၼၼ် ၾႆးသႅင်လႅတ်ႇႁႃႉ ဢၼ်ဝႃႈၼၼ်ႉ” ဝႃႈၼႆ။

ၵဵဝ်ႇလူၺ်ႈလွင်ႈၾႆးမႆႈၼႆႉ လွင်ႈၵူၼ်းမၢတ်ႇၸဵပ်းလူႉတၢႆဢမ်ႇမီး ၵူၺ်းၵႃႈ လွင်ႈၶူဝ်းၶွင်ႁိူၼ်းယေးတႄႉ ဢမ်ႇတၼ်းလႆႈ သင်။ လိူဝ်ၼၼ်ႉ ဝၢၼ်ႈၼွင်သိၵ်းၵျႃး တင်း ဝဵင်းသီႇပေႃႉၼႆႉ ယၢၼ်ၵႆၵၼ် မွၵ်ႈ 7 လၵ်း ဝႃႈၼႆ။