ႁႅင်းၵၢၼ်ယၢၼ်မိူင်း တီႈၵဵင်းမႆႇ ႁူမ်ႈၵၼ် တုၵ်းယွၼ်းႁႂ်ႈထႆးလူတ်းယွၼ်ႇ ပၵ်းပိူင်မၢႆမီႈပၼ်ၽွင်ႈ

ႁႅင်းၵၢၼ်ယၢၼ်မိူင်းလႄႈ ၼၢႆးၸၢင်ႈ(ပေႃႈလဵင်ႉ) ႁူမ်ႈၵၼ် ယိုၼ်ႈလိၵ်ႈတုၵ်းယွၼ်းႁႂ်ႈလူင်ပွင်ၸိုင်ႈထႆးလူတ်းယွၼ်ႇပၵ်း ပိူင်မၢႆမီႈႁႅင်း ၵၢၼ်ပၼ် ၵမ်ႈၽွင်ႈ။

ဝၼ်းတီႈ 6/8/2019 ယၢမ်းဝၢႆးဝၼ်း 2 မူင်းၶိုင်ႈ ၸုမ်းၼႅင်ႈသၢၼ်ႁႅင်းၵၢၼ်ယၢၼ်မိူင်း ပွတ်းတွၼ်ႈၼိူဝ် ၸိုင်ႈထႆး တင်း ႁႅင်း ၵၢၼ်ယၢၼ်မိူင်း ဢိၵ်ႇပႃး ၼၢႆးၸၢင်ႈ (ပေႃႈလဵင်ႉ) ႁူမ်ႈၵၼ် ၵႂႃႇယိုၼ်ႈလိၵ်ႈ တီႈလုမ်းသၽႃးၵၢင် ၽူႈၵွၼ်းၸႄႈတွၼ်ႈ ၵဵင်းမႆႇ ၸိုင်ႈထႆး တုၵ်းယွၼ်းႁႂ်ႈလူင်ပွင်ၸိုင်ႈယွၼ်ႇယၢၼ်း ပၵ်းပိူင်မၢႆမီႈ ပၼ်ၽွင်ႈ ။

ထွင်းၶမ်း ၽူႈမီးပုၼ်ႈၽွၼ်းၸွႆႈထႅမ်ႁႅင်းၵၢၼ် မူလၼိထိမႅပ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁႅင်းၵၢၼ်ႁဝ်းၶႃႈ တုၵ်း ယွၼ်းတႄႉ တေမီး 3 ၶေႃႈ။ မိူၼ်ၸိူင်ႉၼင်ႇဝႃႈ – ႁႂ်ႈႁႅင်းၵၢၼ်ႁဝ်း လႆႈႁဵတ်းၵၢၼ်ၸွမ်းၼင်ႇဢၼ်တီႈ ႁဝ်းမီးၼမ်ႉၵတ်ႉ ၶွင်ႁဝ်း။ ႁႂ်ႈမူၼ်ႉမႄးပၼ်ပၵ်းပိူင်ၵမ်ႈၽွင်ႈလႄႈ ႁႂ်ႈမီးလွင်ႈၸႅင်ႈလႅင်းဝႃႈ ၵူၼ်းႁဵတ်းၵၢၼ်ပွင်ႇဝႃႈသင် သမ်ႉႁႂ်ႈႁဵတ်း သင် ၸိူင်ႉႁိုဝ်လၢႆလၢႆ ၸဵမ်ၸိူဝ်းၼႆႉ ပဵၼ်ပိူင်လူင်မၼ်း” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၽူႈၵွၼ်းၸႄႈတွၼ်ႈ ၵဵင်းမႆႇ လၢတ်ႈဝႃႈ “ တေၶတ်းၸႂ်သူင်ႇပၼ်တီႈတၢင်းၼိူဝ်ဝႆးဝႆးသေ တေ ပၼ်ၵႂၢမ်းတွပ်ႇၶိုၼ်း” ဝႃႈၼႆ။

ၵဵဝ်ႇလူၺ်ႈလွင်ႈႁႅင်းၵၢၼ်ယၢၼ်မိူင်း၊ ၼၢႆးၸၢင်ႈလႄႈ ၸုမ်းၼႅင်ႈသၢၼ်ႁႅင်းၵၢၼ်ယၢၼ်မိူင်း ပွတ်းတွၼ်ႈၼိူဝ် ၸိုင်ႈထႆး ၵႂႃႇယိုၼ်ႈလိၵ်ႈတုၵ်းယွၼ်း လွင်ႈယွၼ်ႇယၢၼ်းပၼ်ပၵ်းပိူင်မၢႆမီႈၵမ်ႈၽွင်ႈၼၼ်ႉ ယွၼ်ႉဝႃႈ ႁႅင်းၵၢၼ်ယၢၼ်မိူင်း ၺႃး ပလိၵ်ႈၾၢႆႇၵူတ်ႇထတ်းၵူၼ်းၶဝ်ႈမိူင်း လူင်းထတ်းႁႅင်းၵၢၼ် ၸွမ်းတီႈႁဵတ်းၵၢၼ်ၼၼ်ႉ မၢင်ၵေႃႉၺႃးပလိၵ်ႈတီႉၺွပ်း လူၺ်ႈ ဢမ်ႇတၼ်းႁူႉဝႃႈ ၸဝ်ႈၵဝ်ႇႁဵတ်းၵၢၼ်ၵေႃႇသၢင်ႈၼၼ်ႉ မၼ်းၽိတ်းလွင်ႈသင် ၸဵမ်ၸိူဝ်းၼႆႉ။

ထွင်းၶမ်း သိုပ်ႇလၢတ်ႈဝႃႈ “ ႁဝ်းၶႃႈ လႆႈငိၼ်းၶၢဝ်ႇတီႈႁႅင်းၵၢၼ် ၵပ်းသိုပ်ႇ မႃးၼမ်သေ မိူၼ်ၸိူင်ႉၼင်ႇဝႃႈ ႁႅင်းၵၢၼ်ႁဝ်း တူၵ်းတၢင်းယၢပ်ႇၽိုတ်ႇ မိူဝ်ႈၵႂႃႇႁဵတ်းၵၢၼ်ၵေႃႇသၢင်ႈၼၼ်ႉ ၺႃးတီႉ ၺွပ်း မၢပ်ႇမႂ်ငိုၼ်းတင်းၼမ်ၸိူဝ်းၼႆႉ မိူၼ်ၸိူင်ႉဝႃႈ သၢပ်ႇပုၼ်ဢမ်ႇလႆႈ ယိပ်းမႆႉထတ်း၊ သၢႆတႅၵ်ႈ၊ သၢမ်လႅမ်ႇၸိူဝ်းၼႆႉ ဢမ်ႇ လႆႈ မၼ်းဢမ်ႇၸႂ်ႈၵၢၼ် ႁႅင်းၵၢၼ် ၸိူဝ်းၼႆႉသေ ၺႃးတီႉ ၸဵမ်ၸိူဝ်းၼႆႉ။ ၵမ်းၼႆႉ ၸဝ်ႈၼႃႈတီႈ ၾၢႆႇၵူတ်ႇထတ်း ၵူၼ်းၶဝ်ႈ မိူင်းဝႃႈ ၵၢၼ်ႁႅင်းၼႆႉ ပဵၼ်တႃႇမႅၵ်ႇႁၢမ်ဢၼ် လဵဝ်ၵူၺ်း။ တေဢမ်ႇလႆႈၸႂ်ႉပၢႆးဝူၼ်ႉပႃး မိူၼ်ၸိူင်ႉၼင်ႇ သၢႆးၼႆႉတေသႂ်ႇလၢႆပုင်း၊ ပုၼ်တေသႂ်ႇလၢႆထူင် ၸိူဝ်းၼႆႉ မၼ်း လႆႈၸႂ်ႉဢွၵ်းဢေႃပႃးလႄႈ မၼ်းဢမ်ႇၸႂ်ႈၵၢၼ် တႃႇႁႅင်းၵၢၼ်” ဝႃႈၼႆ။

ႁႅင်းၵၢၼ်ယၢၼ်မိူင်း ဢၼ်ႁဵတ်းၵၢၼ်ၼႂ်းမိူင်းထႆးၼႆႉ ၵမ်ႈၼမ်ပဵၼ်ၵူၼ်း မိူင်းလၢဝ်း၊ မိူင်းၵမ်ႇပူးၶျႃးလႄႈ မိူင်းႁူမ်ႈတုမ် မျၢၼ်ႇမႃႇ၊ တင်းမူတ်းမီးႁူဝ်ၵူၼ်း 2,950,684 ၵေႃႉ။ ႁႅင်းၵၢၼ်ဢၼ်လုၵ်ႉမႃးတီႈမိူင်းႁူမ်ႈတုမ်မျၢၼ်ႇမႃႇၵူၺ်း တင်းမူတ်းမီး လၢၼ်ႉပၢႆ ၶေႃႈမုလ်းႁွင်ႈ ၵၢၼ်ၾၢႆႇၸတ်းၵၢၼ်ႁႃငၢၼ်း ဢွၵ်ႇဝႆႉၼင်ႇၼႆ။