PPST ၸုမ်းဢွၼ်ႁူဝ်ဢုပ်ႇဢူဝ်းၶၵ်ႉၵၢၼ်လွင်ႈငမ်းယဵၼ် တေဢၢၼ်းၸတ်းႁဵတ်းပၢင်ၵုမ် ၼႂ်းႁူဝ်လိူၼ်ဢေႃႊၵတ်ႊသ် ၼႆႉ သေတႃႉ KNU တေၶဝ်ႈပႃးၼႆလႄႈ သုတ်ႉၶၢႆႉဝၼ်းၵႂႃႇပဵၼ်ႁၢင်လိူၼ်ဢေႃႊၵတ်ႊသ်။
ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း 2 လႄႈ ၽူႈၶၢၼ်ပၢၵ်ႇ RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ၵုမ်ဢၼ်တေ ၸတ်းႁဵတ်းၼႆႉ ပဵၼ်ပၢင်ၵုမ် PPST ။ တေဢုပ်ႇဢူဝ်းၵၼ် တႃႇၶၢမ်ႈပူၼ်ႉလွင်ႈၶွင်ႉၶမ် ၶၵ်ႉၵၢၼ်ငမ်းယဵၼ်လႄႈ လွင်ႈ ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၸွင်ႇတေလီၸတ်း ၼႂ်း 2019 ၼႆႉႁိုဝ် ဢမ်ႇလီၸတ်း ၸဵမ်ၸိူဝ်းၼႆႉ။ ပိူင်လူင်မၼ်း တေဢုပ်ႇဢူဝ်းၵၼ်သွင်လွင်ႈၼႆႉ” ဝႃႈၼႆ။
ပၢင်ၵုမ် PPST ၼႆႉ တေၸတ်းႁဵတ်း ၼႂ်းဝၼ်းတီႈ 21-24/8/2019 တီႈ ဝဵင်းၵဵင်းမႆႇ ၸိုင်ႈထႆး။
ဢိင်ၼိူဝ်လွင်ႈလႆႈၶၢႆႉသုတ်ႉဝၼ်းပၢင်ၵုမ်ၼႆႉသေ တီႈသိုဝ်ႇၶၢဝ်ႇ 7 Day ဢွၵ်ႇဝႆႉဝႃႈ “ KNU ၵေႃႈတေၶဝ်ႈပႃး၊ ၵူၺ်းၵႃႈ ယၢမ်းလဵဝ် KNU သမ်ႉ ဢမ်ႇပႆႇတူဝ်ႈတၼ်း တိုၵ်ႉမီးပၢင်ၵုမ်လူင်ၶဝ်ဝႆႉလႄႈ ၶဝ်တုၵ်းယွၼ်း PPST ႁႂ်ႈသုတ်ႉၶၢႆႉဝၼ်းမၼ်း ပၼ်” ဝႃႈၼႆ။
ၸဝ်ႈသိုၵ်းလူင် ၸၢႆးငိုၼ်း လၢတ်ႈဝႃႈ “ မိူဝ်ႈတႄႇမၼ်းတႄႉ တေၸတ်းႁဵတ်းၼႂ်းဝၼ်းတီႈ 5-8/8/2019 ၵူၺ်းၵႃႈ ၸုမ်းပႆႇ ၸေးလႄႈ လႆႈသုတ်ႉၶၢႆႉဝၼ်းပၢင်ၵုမ် ပဵၼ်ၵႂႃႇ ဝၼ်းတီႈ 21-24/8/2019 ႁၢင်လိူၼ်ၼႆႉ” ဝႃႈၼႆ။
ၸဝ်ႈၶိုၼ်းသႂ် ၸႂ်ယဵၼ် ၽူႈၵိူဝ်းၵုမ် PPST ၵေႃႈလၢတ်ႈတီႈသိုဝ်ႇၶၢဝ်ႈၶဝ်ဝႃႈ “ ယွၼ်ႉဝႃႈ ပၢင်ၵုမ်ၽူႈၼမ်းၼႂ်းငဝ်ႈငုၼ်း KNU ပႆႇယဝ်ႉလႄႈ ယူႇ တီႈ တၢင်း KNU တုၵ်းယွၼ်းမႃး ႁႂ်ႈၶၢႆႉသုတ်ႉဝၼ်းပၼ်။ ယွၼ်ႉၼၼ်လႄႈ ယူႇတီႈၽူႈ ဢွၼ်ႁူဝ် ၸုမ်း PPST လႆႈ တိူင်ႇပၢင်ႇဢုပ်ႇဢူဝ်းၵၼ်သေ ၸင်ႇၶၢႆႉသုတ်ႉဝၼ်းၵႂႃႇ ပဵၼ်ႁၢင်လိူၼ်ဢေႃႊၵတ်ႊသ်ၼႆႉ” ဝႃႈၼႆ။
PPST ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA တင်းမူတ်း 8 ၸုမ်း။ ႁူမ်ႈၵၼ် ၶွတ်ႇၽွတ်ႈ ၸုမ်းဢွၼ်ႁူဝ်ဢုပ်ႇဢူဝ်းၶၵ်ႉၵၢၼ်လွင်ႈငမ်းယဵၼ် PPST မိူဝ်ႈလိူၼ်မၢတ်ႉၶျ်ပီ 2016။
ၼႂ်းလုၵ်ႈၸုမ်း PPST 8 ၸုမ်းၼႆႉ မိူၼ်ၼင်ႇ ၶွင်ႇသီႇဢဝ် ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)၊ ၸုမ်းပူတ်း ပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်း ႁူမ်ႈၸိူဝ်ႉၸၢတ်ႈ ၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်း မၢၼ်ႈပတ်းပိုၼ်ႉ (ABSDF)၊ ႁူမ်ႈတုမ် ၸိူဝ်ႉၸၢတ်ႈယၢင်း ၽိူၵ်ႇ (KNU)၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA)၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP) ၸဵမ်ၸိူဝ်းၼႆႉ။
ပၢင်ၵုမ် PPST ပွၵ်ႈၵမ်းၼႆႉ ၸုမ်းလႃးႁူႇတီႇမူဝ်ႊၶရႅတ်ႉတိၵ်ႉ LDU လႄႈ ၸုမ်းပႃႇတီႇမိူင်းမွၼ်းမႂ်ႇ NMSP ၵေႃႈတေၶဝ်ႈ ပႃး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ