ၽူႈႁွင်ႉၽဵင်းၵႂၢမ်းတႆး တေႁူပ်ႉဢုပ်ႇၵၼ် တႃႇၶွတ်ႇၽွတ်ႈ ၸုမ်းပၢႆးမွၼ်းတႆး တီႈဝဵင်းလၢႆးၶႃႈ တႃႇၶၢဝ်းတၢင်း 2 ဝၼ်း။
ဝၼ်းတီႈ 17-18/8/2019 ယၢမ်းၵၢင်ၼႂ် 9 မူင်း ထိုင် ဝၢႆးဝၼ်း 3 မူင်း ယူႇတီႈၸဝ်းပၢႆးမွၼ်းၽဵင်းၵႂၢမ်းတႆး လၢႆလၢႆၵေႃႉ ဢွၼ် ႁူဝ်သေ ၸတ်းႁဵတ်းပၢင်ဢုပ်ႇၵုမ် ၸဝ်ႈပၢႆးမွၼ်းၽဵင်းၵႂၢမ်းတႆးတႃႇ ၶွတ်ႇၽွတ်ႈ ၸုမ်းပၢႆးမွၼ်းတႆး။ ဢွင်ႈတီႈ ပၢင်ဢုပ်ႇ ဢူဝ်းၵၼ်ၼႆႉ တေၸတ်းႁဵတ်းတီႈ ႁူင်းလုၵ်း ၼွင်ၶမ်း ပွၵ်ႉ 1 ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၸၢႆးယွတ်ႈၽိူဝ်ၼုမ်ႇ ၸုမ်းတႆးၵေႃႉလီ ၽူႈၶပ်းၶိုင်ၸွႆႈၸတ်း ပၢင်ဢုပ်ႇၵုမ် လၢတ်ႈတီႈၽူႈတွႆႇႁွၵ်ႈဝႃႈ “ ပိူင်လူင် မၼ်း တႄႉၵေႃႈ တႃႇတေသိုပ်ႇႁဵတ်းၵၢၼ်ၽဵင်းၵႂၢမ်းတႆးႁဝ်းၶႃႈ ႁႂ်ႈမၼ်းပေႃးသိုပ်ႇၵႂႃႇၼႃႈလႆႈၼၼ်ႉ ႁဝ်း ဝႃႈ မိူဝ်ႈပၢၼ်ၶႅပ်း ၸၢၵ်ႈႁိူင်းၵေႃႈပဵၼ်ပိူင်ၼိုင်ႈ၊ ၶႅပ်း CD ႁိူင်းၵေႃႈပဵၼ်ပိူင်ၼိုင်ႈ။ မိူဝ်ႈလဵဝ် ၶႅပ်း CD ၵေႃႈ ဢမ်ႇၶၢႆလႆႈယဝ်ႉ ၸဝ်ႈပၢႆးမွၼ်း ၶဝ် ဢမ်ႇ ၸၢင်ႈၸႂ်ယႂ်ႇၶႅပ်းၸိူဝ်းၼၼ်ႉယဝ်ႉ။ ၵမ်းၼႆႉတေလႆႈၸႂ်ယႂ်ႇတီႈၼိူဝ် Youtube ။ ၵွပ်ႈၼႆလႄႈၼင်ႇႁိုဝ် တေႁဵတ်း ၼိူဝ် Youtube ၼႆႉ ၼင်ႇႁိုဝ်ပိူၼ်ႈတေဢမ်ႇလူလၢႆလႆႈ၊ ၼင်ႇႁိုဝ်ပိူၼ်ႈတေဢမ်ႇဢဝ်ၵႂႃႇၵိၼ်လၢႆလႆႈၸိူဝ်းၼႆႉ တေႁဵတ်း ႁိုဝ် တေဢုပ်ႇၵၼ်ၸဵမ်ၸိူဝ်းၼႆႉ” ဝႃႈၼႆ။
တွၼ်ႈတႃႇၶွတ်ႇၽွတ်ႈ ၸုမ်းပၢႆးမွၼ်းတႆးၼႆႉ ၼင်ႇႁိုဝ် တေပွင်သၢင်ႈလႆႈၼႃႈၵၢၼ်တႃႈငၢၼ်း ပၢႆးမွၼ်းၽဵင်းၵႂၢမ်းတႆး ၸွမ်း ၵၢပ်ႈၸွမ်းပၢၼ်၊ ၼင်ႇႁိုဝ် တေႁူမ်ႈႁွမ်းႁၵ်ႉသႃ လုမ်းလႃးပၢႆးမွၼ်းၽဵင်းၵႂၢမ်းတႆး သိုပ်ႇၵႂႃႇလႆႈမိူဝ်းၼႃႈလႄႈ ၼင်ႇႁိုဝ် ၸဝ်ႈပၢႆးမွၼ်းၽဵင်ႈၵႂၢမ်းတႆး တေမိုတ်ႈၵိုဝ်းၸမ်ၸႂ်တိူဝ်းတွၼ်းၵႂႃႇမိူဝ်းၼႃႈ ၸဵမ်ၸိူဝ်းၼႆႉ။
ၸၢႆးယွတ်ႈၽိူဝ်ႇၼုမ်ႇ လၢတ်ႈဝႃႈ “ ပၢင်ၵုမ်ပွၵ်ႈၵမ်းၼိုင်ႈၼႆႉ တေႁူပ်ႉၵၼ်ပဵၼ်ပွၵ်ႈၵမ်းႁႅၵ်ႈ။ တေမႃးၸၼ်ယူင်ႉ ၵၢၼ် မၼ်း တေဝၢင်းၽႅၼ်ၸိူင်ႉႁိုဝ်၊ ပေႃး ဝႃႈႁဝ်းလႆႈယူင်ႉၵၢၼ်မၼ်းယဝ်ႉၵေႃႈ၊ ပၢင်ၵုမ်ပွၵ်ႈၵမ်းသွင်သမ်ႉ တေဢဝ်ၶေႃႈတႅပ်း တတ်း ပွၵ်ႈၵမ်းၼိုင်ႈၼၼ်ႉ ၵႂႃႇ ယိုၼ်ႈလၢတ်ႈတီႈၼႂ်းပၢင်ၵုမ်ပွၵ်ႈၵမ်းသွင်၊ ယဝ်ႉၵေႃႈ ဢဝ်ၵူၼ်းတင်းၼမ် ၼႂ်းပွၵ်ႈၵမ်း သွင်ၼၼ်ႉ တႅပ်းတတ်းဝႃႈ ၵႂႃႇဢုပ်ႇၵုမ်တႅပ်းတတ်းသေ တေမၵ်းမၼ်ႈ ၽူႈဢွၼ်ႁူဝ်။ ပေႃးလႆႈ ၸုမ်းၽူႈဢွၼ်ႁူဝ်ယဝ်ႉ ၶဝ်ၸဝ်ႈၸင်ႇသိုပ်ႇ ႁဵတ်းပၢင်ၵုမ်ပွၵ်ႈသၢမ်” ဝႃႈၼႆ။
ဝၢႆးသေဢုပ်ႇဢူဝ်းၵၼ်ယဝ်ႉ ၸင်ႇတေၶွတ်ႇၽွတ်ႈတႃႇၵေႃႁူမ်ႈသၢင်ႈပၢႆးမွၼ်းတႆးမႃး ဝႃႈၼႆ။
တွၼ်ႈတႃႇတေပဵၼ်မႃး ပၢင်ဢုပ်ႇၵုမ် ၸဝ်ႈပၢႆးမွၼ်းတႆး တီႈဝဵင်းလၢႆးၶႃႈၼႆႉ ယူႇတီႈတပ်ႉသိုၵ်းၵူၼ်းမိူင်း 758 ၼမ်ႉႁူး ဝၢၼ်ႈပၢင်ႇ ႁပ်ႉပဵၼ်ၸဝ်ႈတႃႇၼ။ ပၢင်ႁူပ်ႉထူပ်းၼႆႉ တေမီးၸဝ်ႈပၢႆးမွၼ်းတႆး မွၵ်ႈ 40 ပၢႆ မႃးၶိုၼ်ႈႁွတ်ႈ ဝႃႈၼႆ။
