ၵူၼ်းမိူင်းၵိုင် ပွၵ်ႉၼိုင်ႈ ႁူမ်ႈၵၼ် ပူၵ်းပၢႆႉသဵၼ်ႈတႃႈသၢႆတၢင်း ဢၼ်ပႃးတူဝ်လိၵ်ႈတႆး တင်းလိၵ်ႈမၢၼ်ႈ သွင်ၽႃသႃ ၸွမ်း ပွၵ်ႉ/ ၵိဝ်ႇ လႄႈ ယုၵ်ႉယွင်ႈသႂ်ႇပႃးၸိုဝ်ႈသဵင် ၽူႈမီးၼမ်ႉၵတ်ႉ ၸွမ်းၼႂ်းပွၵ်ႉလႄႈ မိူဝ်ႈပၢၼ်ၸဝ်ႈၾႃႉ ၸိူဝ်းၼႆႉ။
ဝၼ်းတီႈ 5/8/2019 ၸၢႆးသႅင်ႁၢၼ် ၽူႈၵွၼ်းပွၵ်ႉၼိုင်ႈ ၸႄႈဝဵင်းမိူင်းၵိုင် ဢွၼ်ႁူဝ်သေ ပူၵ်းပၢႆႉသဵၼ်ႈတႃႈသၢႆတၢင်း ဢၼ် ပႃးလိၵ်ႈတႆး တင်းလိၵ်ႈမၢၼ်ႈ ၸွမ်းၼႂ်းပွၵ်ႉၼိုင်ႈ တႃႇ 21 လၵ်းသဝ်။ ၵူၺ်းၵႃႈ လႆႈပူၵ်းၵႂႃႇယဝ်ႉ 9 သဝ်၊ ၵိုတ်း 12 သဝ် တိုၵ်ႉ တေသိုပ်ႇပူၵ်းၵႂႃႇထႅင်ႈႁႂ်ႈယဝ်ႉ။
ၸၢႆးသႅင်ႁၢၼ် ၽူႈၵွၼ်းပွၵ်ႉၼိုင်ႈ ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ပဵၼ်ဝၼ်းလီလႄႈ ႁဝ်းၶႃႈ တင်း ၵူၼ်းၼႂ်းပွၵ်ႉႁဝ်းသေ ႁူမ်ႈၵၼ် ပူၵ်းပၢႆႉၵႂႃႇ တင်းမူတ်း 9 သဝ်။ ၵိုတ်း 12 သဝ်တႄႉ တေသိုပ်ႇပူၵ်းၵႂႃႇႁႂ်ႈယဝ်ႉ။ ႁဝ်းၶႃႈ သႂ်ႇ လိၵ်ႈဝႆႉ 2 ၽႃသႃ လိၵ်ႈတႆး တင်း လိၵ်ႈမၢၼ်ႈ။ မႄးပူၵ်းသႂ်ႇၶိုၼ်းၸိုဝ်ႈသဵင် ဢၼ်ယၢမ်ႈမီးဝႆႉၼၼ်ႉသေ ယဝ်ႉၵေႃႈ မၢင် ၵိဝ်ႇၼႆႉ သႂ်ႇပႃးၸိုဝ်ႈသဵင် ယုၵ်ႉယွင်ႈၽူႈၵတ်ႉၶႅၼ်ႇလိုဝ်ႈလင် ၼႂ်းပွၵ်ႉႁဝ်း မိူဝ်ႈပၢၼ်ၸဝ်ႈၾႃႉၸိူဝ်းၼၼ်ႉ” ဝႃႈၼႆ။
လၵ်းသဝ်ပၢႆႉ ဢၼ်ပူၵ်းၸွမ်းၼႂ်းပွၵ်ႉ/ ၵိဝ်ႇ တီႈပွၵ်ႉၼိုင်ႈ တႃႇ 21 သဝ်ၼႆႉ ယူႇတီႈၵူၼ်းၼႂ်းပွၵ်ႉၼိုင်ႈ ၵဵပ်းငိုၼ်းၵၼ်သေ ႁဵတ်းသၢင်ႈၶိုၼ်ႈမႃးႁင်းၵူၺ်း ဝႃႈၼႆ။
ၸၢႆးသႅင်ႁၢၼ် လၢတ်ႈဝႃႈ “ ဢၼ်ႁဝ်းၶႃႈ ႁဵတ်းပၢႆႉၼႆႉ ပဵၼ်ငိုၼ်းၵူၼ်းၼႂ်းပွၵ်ႉၼိုင်ႈႁဝ်းၶႃႈလႄႈ ငိုၼ်းၵွင်ၵၢင်ၼႂ်းပွၵ်ႉ ႁဝ်းၶႃႈသေ ႁူမ်ႈၵၼ် ႁဵတ်းမႃး။ ၸူးၸႂ်တႄႉ ၶႂ်ႈႁဵတ်းပၢႆႉသဝ်သတီး/ လၵ်းသတီးၼၼ်ႉယဝ်ႉ ၵူၺ်းၵႃႈ ႁႅင်းငိုၼ်းဢမ်ႇၼမ် လႄႈ ၼိုင်ႈသဝ်သမ်ႉ 7 မိုၼ်ႇပၢႆသေ ႁဝ်းၶႃႈၵေႃႈ ၸင်ႇဝႃႈ ဢဝ်သဝ်လဵၵ်းၼႆႉၵွၼ်ႇ ၼိုင်ႈသဝ်လႂ် တေတူၵ်းယူႇ 2 မိုၼ်ႇပၢႆ” ဝႃႈၼႆ။
ၸၢႆးသႅင်မိူင်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၶႃႈႁဝ်း တႅၼ်းၽွင်းၵူၼ်း မိူင်းၵိုင်ၵေႃႉၼိုင်ႈသေ ၵဵဝ်ႇၵပ်းလူၺ်ႈလွင်ႈသဵၼ်ႈတႃႈသၢႆတၢင်းၼႆႉ ၸွႆႈထႅမ်၊ ပၼ်ႁႅင်း၊ ဢုပ်ႇဢူဝ်းၸွမ်း။ လွင်ႈ ဢၼ်ဝႃႈ တေႁဵတ်းသၢင်ႈၵႂႃႇၼၼ်ႉတႄႉ ပေႃးဝႃႈ မၼ်းယူႇတီႈၾၢႆႇလိူမ်ႇလႆႇၵေႃႈ ၶဝ်ဢမ်ႇမီးငိုၼ်းၵွင်တိုၼ်းမၼ်း ဢၼ်လႆႈၶွၼ်ႇ ၼႂ်းမိူင်းၵေႃႈဢေႇၼႃႇ တႃႇၶဝ်တေႁဵတ်းပၼ်ႁဝ်း ၵူႈသဵၼ်ႈတၢင်းၼၼ်ႉ မၼ်းတေဢမ်ႇပဵၼ်လႆႈ။ ဢၼ်ပွၵ်ႉၼိုင်ႈၶဝ် ႁဵတ်းယူႇယၢမ်းလဵဝ်ၼႆႉ ယွၼ်ႉပိူဝ်ႈဝႃႈ ပဵၼ်ငိုၼ်းသုၼ်ႇတူဝ်ၽႂ်မၼ်းသေ ဢိင်ၼိူဝ်ၼမ်ႉၸႂ်ၸေႇတၼႃႇ ၼႂ်းပွၵ်ႉ/ ယွမ်ႇ သေ ဢွၼ်ၵၼ်ၶတ်းၸႂ်သေလုၵ်ႉႁဵတ်းမႃး” ဝႃႈၼႆ။
သိုပ်ႇလၢတ်ႈဝႃႈ “ ပေႃးဝႃႈယူႇတီႈတႅၼ်းၽွင်း တေၶပ်းၶိုင်ႁႃလၢႆးတၢင်းသေႁဵတ်း ပေႃးတေလႆႈပၢႆႉၵႂႃႇတင်းဝၢၼ်ႈတင်းမိူင်း လွင်ႈၼႆႉတႄႉ ႁူႉၵႃႈတေယၢပ်ႇယူႇ ယူႇတီႇႁဝ်းၶႃႈတႄႉ တိုၵ်းသူၼ်းပၼ်လႆႈၵူၺ်း။ ၵူၺ်းၵႃႈ ပဵၼ်ႁိုဝ်ၵေႃႈလီ ယုမ်ႇယမ် ဝႃႈ ယူႇတီႈဢဵၼ်ႁႅင်း ၵူၼ်းၼႂ်းပွၵ်ႉၼႂ်းယွမ်ႇ ႁူႉပုၼ်ႈၽွၼ်းလႄႈ ႁၵ်ႉသႃပႂ်ႉပႃးလိၵ်ႈလၢႆးႁဝ်း၊ ပိုၼ်းႁဝ်းသေ ဢမ်ႇယွမ်း ပႂ်ႉၽႂ်ယဝ်ႉ ပေႃးပႂ်ႉတိၵ်းတိၵ်းၵေႃႈ မၼ်းဢမ်ႇငၢႆႈ ၵွပ်ႈၸိူင်ႉၼၼ်လႄႈ ၵူၼ်းၼႂ်းပွၵ်ႉ/ ဢိူင်ႇၵေႃႈ ႁူႉပုၼ်ႈၽွၼ်းသေ ဢဝ်ဢဵၼ်ႁႅင်းပွင်ပဵၼ်လႆႈၵႃႈႁိုဝ်ၵေႃႈႁဵတ်းသၢင်ႈၵႂႃႇ ယုမ်ႇယမ်ဝႃႈ ဢမ်ႇဝႃႈပွၵ်ႉၼိုင်ႈၵူၺ်း တေႃႇထိုင် ပွၵ်ႉ 4 ၸိူဝ်းၼႆႉ ယုမ်ႇယမ်ဝႃႈ တေဢွၼ်ၵၼ်ပူၵ်းတင်ႈၵႂႃႇ ၵူႈပွၵ်ႈယူႇ” ဝႃႈၼႆ။
ၵွပ်ႈပိူဝ်ႈၸိူင်ႉၼႆ တႃႇတေပဵၼ်မႃး သဵၼ်ႈတႃႈသၢႆတၢင်း လႆႈၸိုဝ်ႈသဵၼ်ႈတႃႈသၢႆတၢင်း ဢၼ်မၢၼ်ႇမႅၼ်ႈ ဢၼ်ၵူၼ်းမိူင်း လႆႈၸႂ်ၼၼ်ႉ မိူဝ်ႈဝၼ်းတီႈ 7/1/2019 ၼၼ်ႉ သင်ၶၸဝ်ႈ၊ ၽူႈတႅၼ်းသၽႃး၊ ၽူႈၵွၼ်းပွၵ်ႉလႄႈ ႁွင်ႈ ၵၢၼ်ၾၢႆႇလိူမ်ႈလႆႇ လႆႈဢုပ်ႇဢူဝ်းၵၼ် ပွၵ်ႈၵမ်းၼိုင်ႈ။ ထိုင်မႃး ဝၼ်းတီႈ 14/7/2019 သမ်ႉ လႆႈဢုပ်ႇဢူဝ်းၵၼ် တီႈၵျွင်း ၵၢင်မိူင်း ထႅင်ႈပွၵ်ႈ ၼိုင်ႈသေ ၸင်ႇမၵ်းမၼ်ႈပၼ်သဵၼ်ႈတၢင်း ၸိူဝ်းဢၼ်ၶူၼ်ႉႁႃဝႆႉၸိုဝ်ႈသဵင်ၼၼ်ႉ ဝႃႈၼႆ။