ၵႃးတၢင်ႇႁႅင်းၵၢၼ် မိူင်းႁူမ်ႈတုမ်မျၢၼ်ႇမႃႇ ၽႃႇၺႃးတူၼ်ႈမႆႉ ၼႂ်းၸႄႈတွၼ်ႈလမ်းပၢင်းၸိုင်ႈထႆး မီးၵူၼ်းလူႉတၢႆၸွမ်း 2 ၵေႃႉ၊ မၢတ်ႇၸဵပ်း 8 ၵေႃႉ ဝႃႈၼႆ။

မိူဝ်ႈၼႆႉ ဝၼ်းတီႈ 6/8/2019 ယၢမ်းၵၢင်ၼႂ် 4 မူင်း ၵႃး(ရူတ်ႉတူႈ) တၢင်ႇႁႅင်းၵၢၼ် လုၵ်ႉတၢင်းၸႄႈတွၼ်ႈတၢၵ်ႇသေ တေ သူင်ႇႁႅင်းၵၢၼ် ပွၵ်ႈတၢင်းမႄႈသၢႆ – တႃႈၶီႈလဵၵ်းၼၼ်ႉ မႃးၽႃႇၺႃး တူၼ်ႈမႆႉ ဢၼ်မီးႁိမ်းၶၢင်ႈတၢင်း ၼႂ်းၸႄႈတွၼ်ႈ လမ်းပၢင်း ၸိုင်ႈထႆးပွတ်းႁွင်ႇ။

ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈၼႃႈတီႈပလိၵ်ႈထႆးလႆႈထဵတ်ႈထၢမ် ၵူၼ်းႁေႃႈၵႃးသေ လႆႈႁူႉဝႃႈ ၵူၼ်းႁေႃႈၵႃးငဝ်ၼွၼ်း လႄႈရူတ်ႉၵႃးၸင်ႇလႆႈၽႃႇ တူၼ်ႈမႆႉဢၼ်မီးႁိမ်းၶၢင်ႈတၢင်းၼၼ်ႉ” ဝႃႈၼႆ။

ႁႅင်းၵၢၼ် မိူင်းႁူမ်ႈတုမ်မျၢၼ်ႇမႃႇ ဢၼ်ၶီႇမႃးၸွမ်းၵၼ်ၼႂ်းၵႃးၼၼ်ႉ လူႉတၢႆ 2 ၵေႃႉ မၢတ်ႇၸဵပ်း ပႃးၵူၼ်းႁေႃႈၵႃး တင်း မူတ်း 9 ၵေႃႉ။

ႁႅင်းၵၢၼ်ၼႆႉ လုၵ်ႉတီႈၸႄႈတွၼ်ႈတၢၵ်ႇ ၸိုင်ႈထႆးသေ တေၵႂႃႇမႃးတၢင်းၾင်ႇတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ဝႃႈ ၼႆ။

ႁႅင်းၵၢၼ်ဢၼ်လႆႈလူႉတၢႆၵႂႃႇ 2 ၵေႃႉၼၼ်ႉ ပဵၼ်မဵဝ်းၼၢႆႇ ဢႃယု 44 ပီ၊ မိၼ်းဝူၺ်ႇ ဢႃယု 49 ပီ။ ၵူၼ်းဢၼ်လႆႈမၢတ်ႇ ၸဵပ်း သမ်ႉ ၸဝ်ႈၵႃး ၼၢႆးၽိတ်ႉသၼူႉ သဵၵ်ႇသူမ်ငၢမ်း ဢႃယု 36 ပီ။ ႁႅင်းၵၢၼ် ဢွင်ႇတူႇ ဢႃယု 32 ပီ၊ ဢွင်ႇမဵဝ်း ဢႃယု 36 ပီ၊ သေႃႇဝိၼ်းၼၢႆႇ ဢႃယု 33 ပီ၊ ဢွင်ႇထုၼ်း ဢႃယု 41 ပီ၊ ဢွင်ႇတႅၵ်ႉ ဢႃယု 19 ပီ၊ ဢွင်ႇဝိၼ်းဢူး ဢႃယု 39 ပီလႄႈ မထေးထေး ဢႃယု 32 ပီ ၸိူဝ်းၼႆႉ။