ၽူႈတႅၼ်းမိူင်းၼၢႆး ဢွၼ်ၵေႃႇသၢင်ႈႁူင်းႁေႃတႃႇ ပၢႆးပၺ်ၺႃလႄႈ ႁူင်းပၢင်သွၼ် လွၵ်းလၢႆးၸႂ်ႉယႃႈၶႃႈမူင်းမႅင်း

ၽူႈတႅၼ်းသၽႃးမိူင်းၼၢႆး ၶတ်းၸႂ်တႃႇၵေႃႇသၢင်ႈႁူင်းႁေႃၾိုၵ်းသွၼ်ပၼ် လုၵ်ႈဢွၼ်ႇႁႂ်ႈလႆႈႁဵၼ်းႁူႉပၢႆးပၺ်ၺႃလႄႈ ႁူင်းပၼ်ပၢင်သွၼ် ၸဝ်ႈႁႆႈ/ၼႃး လၢႆးၸႂ်ႉယႃႈၶႃႈမူင်ႈမႅင်း ၸိူဝ်းၼႆႉ ဝႃႈၼႆ။

ၽူႈတႅၼ်းပႃႇတီႇႁူဝ်သိူဝ် SNLD မိူင်းၼၢႆး ၼမ်းဢဝ်ငိုၼ်းသၽႃးၵမ်ႉၸွႆႈၼၼ်ႉပဵၼ်လၵ်းသေ ၵေႃႇသၢင်ႈပၼ် ႁူင်းႁေႃ 2 ၸၼ်ႉ တီႈၼႂ်းၼွင်ၼမ်ႉ ပွၵ်ႉ လွႆဝႄႈ ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ တႄႇၵေႃႇသၢင်ႈမႃး မိူဝ်ႈဝၼ်းတီႈ 29/6/2019 လၢမ်းၶၢတ်ႈဝႆႉ တေၸႂ်ႉငိုၼ်း တႃႇၵေႃႇသၢင်ႈ ၼိုင်ႈႁဵင်ပႅတ်ႇသႅၼ်ပျႃး။

ၸၢႆးမွၼ်းလိူၼ် ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ႁဝ်းၶႃႈ ၵေႃႇသၢင်ႈၶိုၼ်ႈမႃး ႁူင်းႁေႃ 2 ၸၼ်ႉ။ ၼႂ်း 2 ၸၼ်ႉၼၼ်ႉ တႃႇၸၼ်ႉၼိူဝ် ႁဝ်းၶႃႈ တေပိုတ်ႇႁူင်းႁဵၼ်းၸၼ်ႉ ဢွၼ်ႁဵၼ်း(မူကြို)။ ၸၼ်ႉတႂ်ႈသမ်ႉ တေပဵၼ်ပၢင်သွၼ် ၵူႈဢၼ်ဢၼ်။ ဢၼ်လမ်ႇလွင်ႈလူဝ်ႇသွၼ်ပၼ်တေႃႈလဵဝ်တႄႉ လွၵ်းလၢႆးၸႂ်ႉယႃႈၶႃႈမူင်းမႅင်း။ လွင်ႈၼႆႉ လမ်ႇလွင်ႈတီႈသုတ်းၶႃႈ။ ႁူင်းႁေႃၼႆႉ တေဢၢၼ်းယဝ်ႉမိူဝ်ႈလႂ် ဢၼ်ဝႃႈ ၼၼ်ႉ မၼ်းယူႇတီႈပေႃႈမႄႈပီႈၼွင်ႉႁဝ်းၶႃႈ ၵမ်ႉၸွႆႈမႃးၶႃႈ”ဝႃႈၼႆ။

ၼင်ႇႁိုဝ် လုၵ်ႈဢွၼ်ႇၸိူဝ်းယူႇၸွမ်းဝၢၼ်ႈၼွၵ်ႈၼႃးပၢင်ႇတေဢမ်ႇၶၢတ်ႇႁူင်းႁဵၼ်းလႄႈသင်၊ ၼင်ႇႁိုဝ် ပေႃးတေမႃး ၶိုၼ်ႈႁဵၼ်းၾိုၵ်းသွၼ်ဢဝ်ၵႂႃႇၼၼ်ႉ သင်ဝႃႈ ၵေႃႇသၢင်ႈႁူင်းႁေႃယဝ်ႉၵႂႃႇၸိုင် တေႁွင်ႉၶူးသွၼ်သေ ပိုတ်ႇပၢင်သွၼ်ပၼ် ဝႃႈၼႆ။

ၸၢႆးမွၼ်းလိူၼ် လၢတ်ႈဝႃႈ “ ႁဝ်းၶႃႈလႆႈငိုၼ်းမႃးတီႈလူင်ပွင်ၸိုင်ႈမိူင်းတႆး 50 သႅၼ်သေ တႄႇၵေႃႇသၢင်ႈႁဵတ်းမႃးယဝ်ႉ။ ၵူၺ်းၵႃႈ တေယဝ်ႉမိူဝ်ႈလႂ် ဢၼ်ဝႃႈၼၼ်ႉ ဢမ်ႇပႆႇၸၢင်ႈဝႃႈ ငိုၼ်းတႄႉ တေဢမ်ႇပေႃး။ သင်ဝႃႈ ႁူင်းႁေႃယဝ်ႉၵႂႃႇၸိုင် ႁဝ်းၶႃႈ တေႁွင်ႉဢဝ်လုၵ်ႈဢွၼ်ႇ ၸိူဝ်းဢၼ်ၶၢတ်ႇႁဵၼ်းၼၼ်ႉ မႃးၽိုၵ်းႁဵၼ်းသွၼ်ၶႃႈ” ဝႃႈၼႆ။

လိူဝ်ၼၼ်ႉ ပၼ်ႁႃ ဢၼ်ၸဝ်ႈႁႆႈ/ၼႃး ၼႂ်းၸႄႈဝဵင်းမိူင်းၼၢႆး ထူပ်းၺႃးတေႃႈလဵဝ်ၼႆႉ ပဵၼ်ပၼ်ႁႃလွင်ႈၸႂ်ႉ ယႃႈၶႃႈမူင်ႈ မႅင်း။ ယွၼ်ႉၸႂ်ႉယႃႈၶႃႈမူင်းမႅင်းဢမ်ႇထုၵ်ႇလၢႆးတၢင်းလႄႈ ၸဝ်ႈၼႃးဢၼ်လႆႈလူႉသဵင်ႈသၢႆၸႂ်ၵႂႃႇၵေႃႈမီး၊ တၢႆၽၢၵ်ႇ၊ မဝ်း မိင်း၊ ႁႅင်းဢူၼ်ႈလႂ် ၸိူဝ်းၼႆႉၵေႃႈ လႆႈပဵၼ်မႃး ဝႃႈၼႆ။

ၸၢႆးမွၼ်းလိူၼ် သိုပ်ႇလၢတ်ႈဝႃႈ “တေႃႈလဵဝ်ၼႆႉ ၸဝ်ႈႁႆႈ/ၼႃးႁဝ်း ဢမ်ႇႁူႉလွၵ်းလၢႆးၸႂ်ႉတိုဝ်းမၼ်းသေလႄႈ ႁဝ်းၶႃႈ တေႁွင်ႉၸဝ်ႈႁႆႈ/ၼႃးႁဝ်း မႃးၽိုၵ်းႁဵၼ်းသွၼ်ၵၼ်တီႈၼႆႈသေႁႂ်ႈမေႃလၢႆးၸႂ်ႉတိုဝ်းယႃႈယႃၶႃႈမႅင်း၊ တေလႆႈၸႂ်ႉတိုဝ်းၸိူင်ႉ ႁိုဝ်၊ တေႁဵတ်းႁိုဝ်ႁႄႉၵင်ႈ ၸဵမ်ၸိူဝ်းၼႆႉ”။

“သင်ပဵၼ်လႆႈ ၶႂ်ႈႁႂ်ႈလူင်ပွင်ၸိုင်ႈ ႁၢမ်ႈဢဝ်ယႃႈၶႃႈမႅင်းၼွၵ်ႈမိူင်း မႃးၶၢႆပၼ်ၸဝ်ႈႁႆႈ/ၼႃး။ ပိၵ်ႉဝႆႉသေၵမ်းၼိုင်ႈၼႆ တေ လီယူႇ။ ၶႂ်ႈႁႂ်ႈလူင်ပွင်ၸိုင်ႈၶဝ် လဵပ်ႈႁဵၼ်းၶူၼ်ႉၶႂႃႉလီလီယဝ်ႉ ပၼ်ပၢင်သွၼ်ၸဝ်ႈႁႆႈ/ၼႃးသေ ပေႃးဝႃႈ ၸဝ်ႈႁႆႈ/ ၼႃး ႁဝ်း ၶႃႈႁူႉယဝ်ႉ မေႃၸႂ်ႉယဝ်ႉ ၸင်ႇတေပၼ်ဢဝ်ၶဝ်ႈမႃးၶၢႆၼႆ ၸင်ႇတေလီၶႃႈယဝ်ႉ ယႃႈယႃၶႃႈမူင်ႈမႅင်းၼႆႉ” ဝႃႈၼႆ။

ႁူင်းႁေႃ ဢၼ်ၵေႃႇသၢင်ႈဝႆႉတီႈၼွင်ၼမ်ႉ ပွၵ်ႉလွႆဝႄႈၼႆႉ တေၵေႃႇသၢင်ႈၼႃႈၵႂၢင်ႈ 82 ထတ်း(ပေႇ)လႄႈ ၼႃႈယၢဝ်း 36 ထတ်း(ပေႇ) ဝႃႈၼႆ။ ငိုၼ်းဢၼ်လူဝ်ႇထႅင်ႈၼၼ်ႉၵေႃႈ တိုၵ်ႉႁပ်ႉလွင်ႈၵမ်ႉၸွႆႈတီႈပီႈၼွင်ႉၽူႈမီးၸႂ်ၸေႇတၼႃႇ တီႈၸမ် တီႈၵႆလူႇတၢၼ်းမႃးယူႇ ဝႃႈၼႆ။