SSPP ၸတ်းပၢင်ၵုမ် 6 လိူၼ်ၶွပ်ႈ ဢွၵ်ႇၶေႃႈပိုၼ်ၽၢဝ်ႇဝႃႈ တေၽေႃႇၼမ်ႉၼႄတူဝ် ၵၢၼ်ငမ်းယဵၼ် ႁဵတ်းသၢင်ႈၸွမ်း ၸုမ်းယိပ်းၵွင်ႈၵၢင်ႇ လုၵ်ႉၽိုၼ်ႉဢၼ်ၽဝမိူၼ်ၵၼ် ဝႃႈၼႆ။
ဝၼ်းတီႈ 22/7/2019 – 2/8/2019 ယူႇတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၸတ်းႁဵတ်းပၢင်ၵုမ်ႁူဝ် ႁုပ်ႈပၢတ်ႈ (6) တီႈငဝ်ႈငုၼ်းဝၢၼ်ႈႁႆး ၸႄႈဝဵင်းၵေးသီး ၼႂ်းပၢင်ၵုမ်ၼၼ်ႉ ႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ တင်းမူတ်း 7 ၶေႃႈ။
ၶေႃႈပိုၼ်ၽၢဝ်ႇ ထီႉ 6 ၼၼ်ႉ တႅမ်ႈဝႆႉဝႃႈ “ ၼင်ႇႁိုဝ် တေသိုပ်ႇၽေႃႇၼမ်ႉၼႄတူဝ်လႆႈ ၵၢၼ်ငမ်းယဵၼ်ဢၼ် ၵိုတ်းယင်ႉ ယူႇၼၼ်ႉ တေႁူမ်ႈႁွမ်းၵၼ်တင်းၸုမ်းၸၢဝ်းၶိူဝ်းယိပ်းၵွင်ႈၵၢင်ႇလုၵ်ႉၽိုၼ်ႉ ဢၼ်ၽဝမိူၼ်ၵၼ်သေ ႁဵတ်း သၢင်ႈၵႂႃႇ” ဝႃႈၼႆ။
လိူဝ်ၼၼ်ႉ ၼႂ်းၶေႃႈ 7 ၵေႃႈ လၢတ်ႈပႃးဝႆႉဝႃႈ “ တွၼ်ႈတႃႇၵေႃႇသၢင်ႈမိူင်းႁူမ်ႈတုမ်ၾႅတ်ႊၻရႄႊၸိုၼ်ႈၸၢင်ႇ ဢၼ်ၵူႈ ၸိူဝ်ႉၸၢတ်ႈၸၢဝ်းၶိူဝ်းမုင်ႈမွင်းၶႂ်ႈလႆႈၶႂ်ႈပဵၼ်ၼၼ်ႉ တေၶတ်းၸႂ်ႁူမ်ႈမိုဝ်းၵၼ်တင်းၵူႈၸိူဝ်ႉၸၢတ်ႈၸၢဝ်းၶိူဝ်း ၼႂ်းမိူင်း ႁူမ်ႈတုမ် လႄႈ တေဢဝ်လၢႆးသဵၼ်ႈတၢင်းငမ်းယဵၼ်ႁူပ်ႉထူပ်းဢုပ်ႇဢူဝ်းသေ ၶတ်းၸႂ်ၵေႃႇသၢင်းၵႂႃႇ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းသိုပ်ႇၸူး SSPP ၵေႃႈ ၵပ်းသိုပ်ႇတိတ်းတေႃႇဢမ်ႇလႆႈ။
ပၢင်ၵုမ်ၵေႃႇမတီႇငဝ်ႈငုၼ်းၸေးၸုမ်ႇ ႁူဝ်ႁုပ်ႈပၢတ်ႈ(6) လိူၼ် SSPP/SSA ဢၼ်ၸႂ်ႉႁဵတ်းၵႂႃႇၶၢဝ်းတၢင်း 10 ဝၼ်းပၢႆ ၼၼ်ႉ မီးၽူႈၼမ်းၼႃႈ 1 ၸွမ်သိုၵ်းလူင်သိူဝ်ထႅၼ်ႈ ပဵၼ်ၽူႈၼင်ႈၸိုင်ႈသေ ၽူႈၶဝ်ႈၵေႃႇမတီႇငဝ်ႈငုၼ်းလႄႈ ၵႅမ်ၽူႈၶဝ်ႈ ၵေႃႇမတီႇငဝ်ႈငုၼ်း ႁူမ်ႈၵၼ် 37 ၵေႃႉ ၶိုၼ်ႈႁွတ်ႈဢုပ်ႇဢူဝ်းၵၼ်တၢင်ႇၼႄ ၵၢၼ်ငၢၼ်းၸိူဝ်းဢၼ်လႆႈႁဵတ်း သၢင်ႈမႃး ၶၢဝ်းတၢင်း 6 လိူၼ်။
လိူဝ်ၼၼ်ႉ ထတ်းသၢင်လွင်ႈၶိုပ်ႈၼႃႈ၊ ယူပ်ႈယွမ်း ဢိၵ်ႇပႃးငဝ်းလၢႆးပိူင်ပဵၼ်ပိူင်မီး ၵႂၢင်ႈၶႂၢင်သေယဝ်ႉ သိုပ်ႇတမ်းဝၢင်းၼႃႈ ၵၢၼ် တႃႇႁဵတ်းသၢင်ႈၵႂႃႇမိူဝ်းၼႃႈထႅင်ႈ ၸဵမ်ၸိူဝ်းၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ