ၵူၼ်းၼမ်ႉတူႈ ၵေႃႉၼိုင်ႈ ဢႃယု 36 ပီ ယဵပ်ႇၺႃးမၢၵ်ႇမႅင်းၾင်လိၼ် ၽွင်းၵႂႃႇတူၺ်းသူၼ် တေႃႈလဵဝ် လႆႈသူင်ႇယူတ်း ယႃဝႆႉတီႈလႃႈသဵဝ်ႈ။
ဝၼ်းတီႈ 4/8/2019 ယၢမ်းဝၢႆးဝၼ်း 1 မူင်းပၢႆၼၼ်ႉ ၵူၼ်းၼမ်ႉတူႈ ၸိုဝ်ႈႁွင်ႉ ၵူဝ်ႇသူးၵျေး ဢႃယု 36 ပီ ၵႂႃႇ တူၺ်းသူၼ် ဢၼ်မီးဝႆႉတီႈႁိမ်းႁွမ်းဝၢၼ်ႈၼွင်ၵၢၼ်ႇ ဢိူင်ႇမၢၼ်ႈၸၢမ် ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇၼၼ်ႉ ယဵပ်ႇၺႃးမၢၵ်ႇ ၾင်လိၼ် တႅၵ်ႇတိူဝ်ႉသႂ်ႇသေ လႆႈမၢတ်ႇၸဵပ်းႁၢဝ်ႈႁႅင်း။
ၵူၼ်းဝၢၼ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မီးၵူၼ်းယဵပ်ႇၺႃးမၢၵ်ႇ ပဵၼ်ၽူႈၸၢႆး ၸိုဝ်ႈႁွင်ႉ ၵူဝ်ႇသူး ၵျေး မၼ်းၸၢႆးၵႂႃႇတူၺ်းသူၼ်သေ ယဵပ်ႇၺႃးမၢၵ်ႇ ရူတ်ႉၶိူင်ႈမၼ်းၸၢႆးတႄႉ လႅဝ်မူတ်းၶႃႈယဝ်ႉ။ မၢၵ်ႇၼၼ်ႉ တႅၵ်ႇတိူဝ်ႉ သႂ်ႇ ၸွမ်းၶႃမၼ်းၸၢႆး။ တီႈၶႃမၼ်းၸၢႆးၾၢႆႇၶႂႃ တိူဝ်ႉၺႃးမၢၵ်ႇ တီႈႁူဝ်ၶဝ်ႇ 3 ႁွႆး။ ၶႃၾၢႆႇသၢႆႉတႄႉ တိူဝ်ႉၺႃးတီႈ ႁူဝ်မႄႈ တိၼ် ၸဵမ်ၸိူဝ်းၼႆႉ။ သင်ဢမ်ႇမီးရူတ်ႉၶိူင်ႈမၼ်းႁႄႉပၼ်တႄႉ လႅပ်ႈထိုင်တီႈၶႃပုတ်းၵေႃႈၸၢင်ႈပဵၼ်လႆႈၶႃႈ”ဝႃႈၼႆ။
မိူဝ်ႈၽွင်းမၢၵ်ႇတႅၵ်ႇၼၼ်ႉ ၵူၼ်းဝၢၼ်ႈ ၵူၼ်းသူၼ်ဢၼ်ယူႇၸွမ်းႁိမ်းႁွမ်းၼၼ်ႉ ၼႅတ်ႈဢွၼ်ၵၼ်မႃးၸွႆႈဢဝ်သေ သူင်ႇ ႁူင်းယႃ မၢၼ်ႈၸၢမ်။ လုၵ်ႉတီႈႁူင်းယႃမၢၼ်ႈၸၢမ်သေ သူင်ႇၵႂႃႇယူတ်းယႃတီႈႁူင်းယႃလႃႈသဵဝ်ႈ ၼႂ်းဝၼ်းတီႈ 4 ၼၼ်ႉ ၵမ်းလဵဝ်။
ၼၢင်းၸၢမ်ႁွမ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၼႆႉ မၼ်းၸၢႆးလႆႈသူင်ႇယူတ်းယႃဝႆႉတီႈႁူင်းယႃ လႃႈသဵဝ်ႈယဝ်ႉ။ မၢၵ်ႇဢၼ်တႅၵ်ႇသႂ်ႇမၼ်းၸၢႆးၼၼ်ႉ လႅပ်ႈပဵၼ်မၢၵ်ႇ ၾင် လိၼ် တေဢမ်ႇၸႂ်ႈမၢၵ်ႇဢဝ်ၸိူၵ်ႈသေ ႁၢင်ႈၵၢင်ဝႆႉ။ ပဵၼ်မၢၵ်ႇၽႂ်/ ၸုမ်းလႂ်ႁၢင်ႈၵၢင်ဝႆႉတႄႉ ဢမ်ႇႁူႉ” ဝႃႈၼႆ။
မၼ်းၼၢင်းမွၵ်ႇလၢတ်ႈပၼ်ၾၢင်ႉၵူၼ်းမိူင်းဝႃႈ ႁႂ်ႈၾၢင်ႉၵႂႃႇမႃးၸွမ်းထိူၼ်ႇၸွမ်းလွႆ၊ ပေႃးႁူပ်ႉထူပ်းၸိူင်ႉၼႆ၊ ႁႂ်ႈပွင်ႇၶၢဝ်ႇ ၸူး ၸဝ်ႈၼႃႈတီႈ ဝႃႈၼႆ။
မၼ်းၼၢင်းလၢတ်ႈထႅင်ႈဝႃႈ “ တီႈၵေႃႉဢၼ်မႃးႁၢင်ႈၵၢင်မၢၵ်ႇၼၼ်ႉၵေႃႈ ၶႂ်ႈတုၵ်းယွၼ်းဝႃႈ ႁႂ်ႈဝႄႈပၼ်တီႈဢၼ်ၵူၼ်းမိူင်း ၵႂႃႇမႃးႁႃၵိၼ်လဵင်ႉတွင်ႉ တၢင်းၵႂႃႇသူၼ်ၵႂႃႇႁိူၵ်ႈ ၸိူဝ်းၼႆႉ ယႃႇပေၾင်မၢၵ်ႇဝႆႉသေၵမ်း” ဝႃႈၼႆ။
ၵူဝ်ႇသူးၵျေး ဢႃယု 36 ပီၼႆႉ ပဵၼ်ၵူၼ်းမၢၼ်ႈၸၢမ် ပွၵ်ႉ 7 ႁူဝ်ၸၢင်ႉ မီးလုၵ်ႈဢွၼ်ႇဝႆႉ ၵေႃႉၼိုင်ႈ ဢႃယု တိုၵ်ႉမီး 3 ၶူပ်ႇ ပၢႆ။
ဢွင်ႈတီႈမၢၵ်ႇတႅၵ်ႇၼၼ်ႉ မိူဝ်ႈလိူၼ်ၵျူႊလၢႆႊ 2019 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း ယၢမ်ႈ ပဵၼ်ပၢင်တိုၵ်းၵၼ်မႃး။ လိူဝ်ၼၼ်ႉ တီႈႁိမ်းဝၢၼ်ႈၼွင်ၵၢၼ်ႇၼႆႉၵူၺ်းၼင်ႇၵဝ်ႇ မိူဝ်ႈလိူၼ်ဢေႊပရိူဝ်ႊ 2019 ၼၼ်ႉ ဝူဝ်း မွၵ်ႈ 8 တူဝ်ယဵပ်ႇၺႃးမၢၵ်ႇသေ တၢႆထင်တီႈ တင်းၾုင် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ