မႆႉၺွင်ႇသၢမ်ၶႃ မိူင်းတူၼ် ၼႂ်းၵႂၢမ်းၸၢႆးမူးၼၼ်ႉ လူမ်ႉယဝ်ႉ

ၾူၼ်တူၵ်းထပ်းၵၼ် လၢႆလၢႆဝၼ်းသေ တူၼ်ႈမႆႉၺွင်ႇသၢမ်ၶႃ မိူင်းတူၼ် ဢၼ်ၸိုဝ်ႈသဵင်လိုဝ်းလင် ပႃးၼႂ်းၽဵင်းၵႂၢမ်းၸၢႆး မူးၼၼ်ႉ ၵူၼ်ႇလူမ်ႉယဝ်ႉ။

မိူဝ်ႈၼႆႉ ဝၼ်းတီႈ 5/8/2019 ယၢမ်းၵၢင်ၼႂ် မွၵ်ႈ 7 မူင်း တူၼ်ႈမႆႉၺွင်ႇ သၢမ်ၶႃ ဢၼ်မီးဝႆႉၼႂ်းဝၢင်းဝတ်ႉ/ ၵျွင်းၶမ်း ဝဵင်းမိူင်း တူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ၵူၼ်ႇလူမ်ႉ။ ပဵၼ်တူၼ်ႈမႆႉဢၼ်ၵိုၵ်းၵပ်းမိူင်းတူၼ်လႄႈ ၵူၼ်းမိူင်း တူၼ်ပဵၼ်ဢၼ်ၸႂ်ဢမ်ႇလီ။

ၸၢႆးၸိင်ႇ ၵူၼ်းမိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ “ တီႈမိူင်းတူၼ်ၼႆႉ ၾူၼ်တူၵ်းထပ်းၵၼ် 3-4 ဝၼ်းယဝ်ႉၶႃႈ။ ထႅင်ႈ လွင်ႈၼိုင်ႈၵေႃႈ တူၼ်ႈမႆႉၺွင်ႇသၢမ်ၶႃ တီႈၵျွင်းၶမ်းႁဝ်းၼႆႉၵေႃႈ တေလႆႈဝႃႈ ပဵၼ်တူၼ်ႈမႆႉဢႃယုယႂ်ႇ ၵႄႇယဝ်ႉၵေႃႈ တေပႃး။ ႁၢၵ်ႈတေႃမၼ်း ဢမ်ႇမီးႁႅင်း ယဝ်ႉၵေႃႈတေပႃးၶႃႈဢေႃႈ လူမ်ႉၵႂႃႇယဝ်ႉၶႃႈ” ဝႃႈၼႆ။

တူၼ်ႈမႆႉၺွင်ႇသၢမ်ၶႃ လူမ်ႉၽတ်ႉၺႃးထီးထၢတ်ႈ/ ၵွင်းမူး လူႉၵွႆၸွမ်း ဢိတ်းဢွတ်း ဝႃႈၼႆ။

ၸၢႆးၸိင်ႇ သိုပ်ႇလၢတ်ႈဝႃႈ “ ၽတ်ႉတိူဝ်ႉသႂ်ႇ ထီးၵွင်းမူး ၵွႆဢိတ်းၼိုင်ႈ။ ယဝ်ႉၵေႃႈ ၽတ်ႉတိူဝ်ႉသႂ်ႇ ၽြႃးသူႇလဵၵ်ႉ/ ၽြႃးၶၢဝ် ဢၼ်မီးဝႆႉႁိမ်းၼၼ်ႉ ဢိတ်းၼိုင်ႈ။ ၵဵဝ်ႇလူၺ်ႈလွင်ႈၵူၼ်းမၢတ်ႇၸဵပ်း လူႉတၢႆတႄႉ ဢမ်ႇမီး” ဝႃႈၼႆ။

တေႃႈလဵဝ် ယူႇတီႈသင်ၶၸဝ်ႈ၊ ၵူၼ်းမိူင်း၊ ၽူႈမီးပုၼ်ႈၽွၼ်းလႄႈ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ၸဵမ်ၸိူဝ်းၼႆႉ တိုၵ်ႉ ဢွၼ်ၵၼ် တတ်းၽဵဝ်ႈပႅတ်ႈၵိင်ႇမၼ်းယူႇ ဝႃႈၼႆ။

မႆႉၺွင်ႇသၢမ်ၶႃၼႆႉ မီးၼႂ်းဝၢင်းၵျွင်းၶမ်း ဝဵင်းမိူင်းတူၼ် မီးႁိမ်းသဵၼ်ႈတၢင်းလူင်ၵႂႃႇၸူးပုင်ႇပႃႇၶႅမ်။ ၸိုဝ်ႈသဵင်လိုဝ်းလင် ၸွမ်းၽဵင်းၵႂၢမ်းၸၢႆးမူး၊ ႁၢၵ်ႈမႆႉၺွင်ႇၽူးသုင်မွၵ်ႈၼိုင်ႈၸူဝ်ႈၵူၼ်းၸုၵ်း။ ပဵၼ်သၢမ်ၶႃ ယင်ႇတမ်းဝႆႉ ပဵၼ်တၢင်း ႁၢင်ႈလီ ဢၼ်ၼိုင်ႈလႄႈ ပီႈၼွင်ႉၶႅၵ်ႇဢၼ်လတ်းၵႂႃႇမႃးၼၼ်ႉၵႂႃႇဝႄႉထၢႆႇႁၢင်ႈၵိုၵ်းၵပ်းပဵၼ်တီႈမၢႆတွင်း။