ၸဝ်ႈႁႆႈ/ ၼႃး ၼႂ်းၸႄႈဝဵင်းမိူင်းၼၢႆး မႆႈၸႂ်ၵူဝ်ထူပ်းၽေး လွင်ႈၵၢၼ်ၸႂ်ႉတိုဝ်းယႃႈၶႃႈမူင်ႈမႅင်း ယႃႈယႃ ဢၼ်လုၵ်ႉတၢင်း မိူင်းၶႄႇ၊ မိူင်းထႆး ဢဝ်ၶဝ်ႈမႃးၶၢႆၵူၼ်းမိူင်းတႆး ၸႂ်ႉတိုဝ်းၼႂ်းသူၼ် ၼႂ်းႁိူၵ်ႈ ၸဵမ်ၸိူဝ်းၼႆႉ။

ယႃႈၶႃႈမူင်ႈမႅင်း ဢၼ်လုၵ်ႉတၢင်းမိူင်းၶႄႇ၊ မိူင်းထႆး ၼမ်းၶဝ်ႈမႃးၶၢႆ တေႃႇၸဝ်ႈႁႆႈ/ ၼႃး ၼႂ်းၸႄႈမိူင်းတႆးၼႆႉ ယွၼ်ႉ ၸဝ်ႈႁႆႈ/ ၼႃး ဢမ်ႇပေႃးႁူႉလွၵ်းလၢႆးၵၢၼ်ၸႂ်ႉတိုဝ်းမၼ်းလီလီလႄႈ ထိုင်တီႈလႆႈထူပ်းၽေး လူႉတၢႆ၊ တၢႆၽၢၵ်ႇ၊ လႆႈတႅပ်း ပႅတ်ႈၶႃ၊ မဝ်းမိင်း၊ ႁႅင်းဢူၼ်ႈ ၸဵမ်ၸိူဝ်းၼႆႉၵေႃႈ မီးမႃး ဝႃႈၼႆ။

ၸၢႆးမွၼ်းလိူၼ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ (1) ၸႄႈဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈႁႆႈ ၸဝ်ႈၼႃးႁဝ်း ဢမ်ႇႁူႉလွၵ်းလၢႆးၸႂ်ႉတိုဝ်းလွင်ႈယႃၶႃႈမူင်းမႅင်းၼႆႉလီလီ မိူဝ်ႈၽွင်းလေႃးယႃလႄႈသင်၊ သိတ်ႇႁူတ်း ယႃႈ ယႃမၼ်းလႄႈသင် ယွၼ်ႉဢမ်ႇမီးလွင်ႈႁႄႉၵင်ႈသင် ၵမ်းလိုၼ်းမႃးလႆႈလူႉတၢႆၵေႃႈယၢမ်ႈမီးမႃးယဝ်ႉ ” ဝႃႈၼႆ။

ၸၢႆးဢွၼ်ႇ ၸဝ်ႈႁႆႈၸဝ်ႈၼႃး ၸႄႈဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ ယႃႈၶႃႈမူင်းမႅင်းၼႆႉ လုၵ်ႉတၢင်းမိူင်းၶႄႇသေ ၶဝ်ႈမႃးၶၢႆတင်းၼမ်ၶႃႈယဝ်ႉ။ ယွၼ်ႉဝႃႈ တီႈလိၵ်ႈၼၼ်ႉ တႅမ်ႈဝႆႉလိၵ်ႈၶႄႇလႄႈ ၸဝ်ႈႁႆႈ/ ၼႃးႁဝ်း ဢမ်ႇပွင်ႇၸႂ်ၵၼ်။ တေႃႈလဵဝ်ၼႆႉ ယႃႈၶႃႈမူင်းမႅင်းၼႆႉ သိုဝ်ႉၶၢႆလႆႈငၢႆႈၼႃႇ။ ၵူၺ်းၵႃႈ ဢမ်ႇႁူႉလွၵ်းလၢႆးၸႂ်ႉတိုဝ်းမၼ်း ဝႃႈတေၸႂ်ႉတိုဝ်း ၸိူင်ႉ ႁိုဝ်”ဝႃႈၼႆ။

ယႃႈၶႃႈမူင်ႈမႅင်းၼႆႉ လုၵ်ႉတၢင်းမိူင်းၶႄႇသေ ၼမ်းၶဝ်ႈမႃးၶၢႆၼႂ်းမိူင်းတႆး- မိူင်းႁူမ်ႈတုမ် ၵမ်ႈၼမ်။ ယွၼ်ႉဝႃႈ ၸဝ်ႈ ႁႆႈ/ၼႃး ဢမ်ႇႁူႉလိၵ်ႈလၢႆး ပွင်ႇၸႂ်ၵေႃႈပိူင်ၼိုင်ႈသေ သင်ပဵၼ်လႆႈ ယူႇတီႈလူင်ပွင်ၸိုင်ႈ ႁႂ်ႈၵူတ်ႇထတ်းယႃႈယႃၼၼ်ႉလီ ယဝ်ႉ ၸင်ႇတေၼမ်းဢဝ်ၶဝ်ႈမႃးၶၢႆ ပၼ်ၸဝ်ႈႁႆႈၸဝ်ႈၼႃး ၼႂ်းမိူင်းႁူမ်ႈတုမ် ဝႃႈၼႆ။

ယွၼ်ႉဝႃႈ ၸဝ်ႈႁႆႈၸဝ်ႈၼႃး ၸႄႈမိူင်းတႆးၼႆႉ ဢွၼ်ၵၼ်ၸႂ်ႉတိုဝ်းၵူႈဝၼ်းလႄႈ လႆႈထူပ်းၺႃးၽေးယႃႈၶႃႈမူင်ႈမႅင်း ယူႇတႃႇသေႇ။ ၸဝ်ႈႁႆႈ/ ၼႃး လႆႈၵဵပ်းႁွမ်တွမ်ငိုၼ်း မႃးၵူႈပီၼၼ်ႉ ပဵၼ်ငိုၼ်းၵႃႈယႃတူဝ် ဢၼ်လႆႈတုမ်ႉတိူဝ်ႉယႃႈမူင်ႈ မႅင်းၸိူဝ်းၼၼ်ႉၵူၺ်း ဝႃႈၼႆ။

ၸၢႆးမွၼ်းလိူၼ် ၽူႈတႅၼ်းသၽႃး ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမိူင်းၼၢႆး လၢတ်ႈဝႃႈ “ တေႃႈလဵဝ်ၼႆႉ ၵူၼ်းႁဵတ်းသူၼ် ႁဵတ်းႁႆႈ ႁဵတ်းၼႃးၼႆႉ ၵမ်ႈၼမ်ပဵၼ်ၵူၼ်းဢႃယုယႂ်ႇ။ ယွၼ်ႉၼၼ် ၵႆႉပဵၼ်လူမ်း/မဝ်းမိင်း၊ ဢမ်ႇမီးႁႅင်းၵမ်ႉတူဝ် ၸိူဝ်းၼႆႉ။ ယွၼ်ႉၼၼ်လႄႈ လႆႈၶဝ်ႈယူတ်းယႃတူဝ်ၵမ်ႈပႃႈၼမ်။ သင်ပဵၼ်လႆႈ ၶႂ်ႈႁႂ်ႈၾၢႆႇလူင်ပွင်ၸိုင်ႈၶဝ် ၶူၼ်ႉၶႂႃႉ လွင်ႈလွၵ်း လၢႆးၸႂ်ႉတိုဝ်းယႃႈယႃလီငၢမ်းယဝ်ႉသေ ၸင်ႇလူင်းပၼ်ပိုၼ်ႉႁူႉၵူၼ်းမိူင်းႁဝ်း သင်ဝႃႈ ၵူၼ်းမိူင်းႁဝ်း ႁူႉမေႃၸႂ်ႉလွၵ်းလၢႆး ႁႄႉၵင်ႈမၼ်းယဝ်ႉၼႆ ၸင်ႇႁႂ်ႈၼမ်းယႃႈယႃၶႃႈမူင်ႈမႅင်းၼၼ်ႉ မႃးၶၢႆ” ဝႃႈၼႆ။

“တွၼ်ႈတႃႇၸဝ်ႈႁႆႈၸဝ်ႈၼႃး ပေႃးတေလွတ်ႈၽေးၼၼ်ႉ မိူဝ်ႈၽွင်းၸႂ်ႉတိုဝ်ႉယႃႈယႃၼၼ်ႉ ႁႂ်ႈဢွၼ်ၵၼ် သႂ်ႇမၢၼ်ႇတႃ၊ တိုဝ်းမၢၵ်ႇႁူဝ်၊ ဢဝ်ၽႃႈပိၵ်ႉသူပ်း၊ သႂ်ႇထူင်သုပ်းမိုဝ်း၊ သႂ်ႇသိူဝ်ႈၶူဝ်းႁႄႉၵင်ႈတၢင်းတူဝ်လႄႈ သႂ်ႇသွၵ်းတိၼ် လူမ်ႈလူမ်ႈ ၸိူဝ်းၼႆႉ”။