ၵူၼ်းၼုမ်ႇ ၵေႃႉၼိုင်ႈ ဢႃယု 26 ပီ ၵႂႃႇႁဵတ်းၵၢၼ်သူၼ်ၼႃးပွၵ်ႈမႃး သိူဝ်ႈၶူဝ်းယမ်း မႃးသဵပ်ႇပလၵ်ႉၾႆး ၺႃးၾႆးၾႃႉလုတ်ႇ သေ လူႉတၢႆ။
ဝၼ်းတီႈ 30/7/2019 ယၢမ်းဝၢႆးဝၼ်း ၸၢႆးၼုမ်ႇ ဢႃယု 26 ပီ ၵႂႃႇႁဵတ်းၵၢၼ်သူၼ်ႁႆႈၼႃးသေ ပွၵ်ႈမႃးႁိူၼ်းၶိုၼ်းၼၼ်ႉ မႃးသဵပ်ႇပလၵ်ႉထႅမ်ႁႅင်းၾူၼ်း ၺႃးၾႆးၾႃႉသျွတ်ႉသေ လႆႈလူႉတၢႆၵႂႃႇတီႈႁိူၼ်းမၼ်းၸၢႆး တီႈဝၢၼ်ႈၼႃးၶၢၼ် ဢိူင်ႇၼႃး ၶၢၼ် ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ မိူဝ်ႈၽွင်းမၼ်းၸၢႆးၵႂႃႇ သဵပ်ႇပလၵ်ႉၾႆးထႅမ်ႁႅင်း ၾူၼ်းၼၼ်ႉ သိူဝ်ၶူဝ်းမၼ်းၸၢႆး ယမ်းၼမ်ႉၾူၼ်ဝႆႉလႄႈ ၾႆးၾႃႉလုတ်ႇထိုင်တၢႆ ဝႃႈၼႆ။
ၸၢႆးဢွၼ်ႇ ၽူႈၵွၼ်းဢိူင်ႇၼႃးၶၢၼ် လၢတ်ႈတီႈၽူႈတွႆႇႁွၵ်ႈဝႃႈ “ သိူဝ်ႈၶူဝ်းယမ်း၊ တိၼ်မိုဝ်းယမ်းသေ ဢမ်ႇပုတ်ႈလၢႆႈၶူဝ်း၊ သမ်ႉမႃးယိပ်းပလၵ်ႉၾႆးၵေႃႈ ၺႃးၾႆးသျွတ်ႉ။ မိူဝ်ႈၼၼ်ႉ ဢူၺ်းၵေႃႉမၼ်း ၸၢႆးဢွင်ႇသမ်ႉ ၶဝ်ႈမႃးႁၼ်သေ တၼ်းၼႅတ်ႈ ၵႂႃႇၸၼ်ပလၵ်ႉၾႆးၼၼ်ႉ ဢွၵ်ႇပႅတ်ႈ ၸၢႆးဢွင်ႇၵေႃႈ ၺႃးသျွတ်ႉၸွမ်းဢိတ်းၼိုင်ႈ ၵူၺ်းၵႃႈ ဢမ်ႇတၼ်းပဵၼ်သင်။ ၸၢႆး ၼုမ်ႇသမ်ႉ ၺႃးၾႆးၾႃႉသျွတ်ႉယဝ်ႉ ဢမ်ႇတၢႆၵမ်းလဵဝ်။ မၼ်းယင်းၶၢင်းၸဵပ်းယူႇၵမ်းၼိုင်ႈ။ ဝၢႆးၼၼ်ႉၸင်ႇပိၼ်ႈလူမ်ႉၵႂႃႇ။ ၵူၼ်းႁိမ်းႁွမ်းပီႈၼွင်ႉမၼ်းၸၢႆး ၵမ်ႈၽွင်ႈဢဝ်မၢၵ်ႇၽႃႈမႃးပၼ်ၵိၼ် ၵမ်ႈၽွင်ႈၵႂႃႇႁွင်ႉရူတ်ႉတေၵႂႃႇသူင်ႇႁူင်းယႃ။ ၵူၺ်း ၵႃႈ မၼ်းၸၢႆးတႄႉ လႆႈလူတၢႆပႅတ်ႈတီႈႁိူၼ်းၼၼ်ႉယဝ်ႉ” ဝႃႈၼႆ။
ၵဵဝ်ႇၵပ်းလူၺ်ႈ လွင်ႈပိုၼ်ႉႁူႉၽေးၾႆးၾႃႉၼႆႉသေ မၼ်းၸၢႆးၸီႉၸမ်ႈဝႃႈ ၵူၼ်းမိူင်းတႆး ၵမ်ႈၼမ် ဢမ်ႇပေႃးလႆႈႁူႉ ဝႃႈႈမၼ်းပဵၼ်ၽေးတႃႇသၢႆၸႂ်ၵူၼ်းမွၵ်ႈၵႃႈႁိုဝ် ဝႃႈၼႆ။
ၸၢႆးမွၼ်းလိူၼ် ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈ မၢႆ (1) မိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၶႃႈဝႃႈ တႄႉ မၼ်း လူဝ်ႇလႆႈယူႇတီႈၾၢႆႇၾႆးၾႃႉၶဝ်သေ သပ်းလႅင်းၼႄၵူၼ်းမိူင်းႁဝ်းလီလီ၊ ႁႂ်ႈသပ်းလႅင်းထိုင်ၵႃႈႁိုဝ်ဢၼ်ဝႃႈ ၼၼ်ႉ ၸဵမ်ဢဝ်လွင်ႈမေႃႈၾႆး Meter Box ၾႆးၾႃႉလႄႈသင်၊ ၼိုင်ႈယူႇၼိတ်ႉသမ်ႉ သဵင်ႈငိုၼ်းၵႃႈႁိုဝ်၊ ပေႃးႁဝ်းသႂ်ႇလွတ်ႇ ၾႆး 4 ပေႇ(ထတ်း) သမ်ႉ မၼ်းတေသဵင်ႈငိုၼ်းၵႃႈႁိုဝ် ၸိူဝ်းၼႆႉၶဝ်လူဝ်ႇလူင်းသပ်းလႅင်းလၢတ်ႈၼႄလီလီ။ ယဝ်ႉၵေႃႈ လၢႆးၸႂ်ႉၾႆးၾႃႉၼႆႉ တေလႆႈၸႂ်ႉႁဵတ်းႁိုဝ်၊ တေလႆႈၾၢင်ႉၸိူင်ႉႁိုဝ် ၼႆၸိူဝ်းၼႆႉ” ဝႃႈၼႆ။
ၸၢႆးၼုမ်ႇ ဢႃယု 26 ပီၼႆႉ ပဵၼ်လုၵ်ႈၸၢႆးလုင်းသၢင်ႇလႅင်းလႄႈ ပႃႈတႅင်ႉ ပဵၼ်ၵူၼ်းဝၢၼ်ႈၼႃးၶၢၼ် ဢိူင်ႇၼႃးၶၢၼ် ၸႄႈ ဝဵင်းမိူင်းၼၢႆး ဝႃႈၼႆ။
မိူဝ်ႈပီၵၢႆ ပူၼ်ႉမႃးၼၼ်ႉၵေႃႈ ၵူၼ်းမႄးၾႆးၾႃႉၵေႃႉၼိုင်ႈတီႈဝဵင်းမိူင်းၼၢႆး ၶိုၼ်ႈမႄးၾႆးတီႈၼိူဝ် သဝ် လၵ်းၾႆးၾႃႉသေ ၺႃးၾႆးၾႃႉသျွတ်ႉ လႆႈလူႉတၢႆမႃးၵေႃႉၼိုင်ႈယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ