ႁၢင်ႇၵၼ်မွၵ်ႈ 20 မိၼိတ်ႉၵူၺ်း မၢၵ်ႇတႅၵ်ႇ ၼႂ်းဝဵင်းလူင်ၵုင်းထဵပ်ႈ(မိူင်းၵွၵ်ႇ) ၸိုင်ႈထႆး 3 ဢွင်ႈတီႈ 3 လုၵ်ႈ။ ဢွင်ႈတီႈ ၵူၼ်းၵိုၼ်းၶွၼ်ႈၼမ်၊ မီးၵူၼ်းမၢတ်ႇ ၸဵပ်းၸွမ်း ဝႃႈၼႆ။
ဝၼ်းတီႈ 2/8/2019 ယၢမ်းၵၢင်ၼႂ် 8:10 ထိုင် 8:30 မူင်း မၢၵ်ႇတႅၵ်ႇတီႈတၢင်းၼႃႈႁူင်းႁေႃ မႁႃၼၶွၼ်း (Mahanakorn) လႄႈ တီႈႁိမ်းတႃႈရူတ်ႉၾႆး ၶျွင်ႉၼူၼ်းသီး (Chong Non Si) တီႈၼိုင်ႈလႄႈ တႂ်ႈၶူဝ်ၶၢမ်ႈတၢင်းတီႈၼိုင်ႈ။ ယၢမ်းၵၢင်ၼႂ် 9:30 မူင်း မၢၵ်ႇတႅၵ်ႇထႅင်ႈ တီႈၼႂ်းဝၢင်းႁိမ်းႁွမ်း လူင်ပွင်ၸိုင်ႈထႆး ၸဵင်ႇဝတ်ႉထၼႃႉ 1 တီႈ (Cheangwattana Government) သိုဝ်ႇၶၢဝ်ႇ Thai PBS လၢႆးငၢၼ်းဝႆႉၼင်ႇၼႆ။
ၵဵဝ်ႇလူၺ်ႈလွင်ႈမၢၵ်ႇတႅၵ်ႇၼႆႉသေ ၵူၼ်းမိူင်းလႆႈမၢတ်ႇၸဵပ်း 2 ၵေႃႉ၊ တႃႇၵေႃႉၼိုင်ႈ လႆႈသူင်ႇႁူင်းယႃ။ ထႅင်ႈၵေႃႉၼိုင်ႈ ပႆႇလႆႈႁူႉ လွင်ႈမၢတ်ႇၸဵပ်းႁူဝ်ယွႆႈမၼ်း ဝႃႈၼႆ။
ၵဵဝ်ႇလူၺ်ႈမၢၵ်ႇတႅၵ်ႇပွၵ်ႈၼႆႉသေ ယူႇတီႈႁွင်ႈၵၢၼ်ၾၢႆႇပလိၵ်ႈထႆး ပၼ်ၾၢင်ႉ ႁႂ်ႈၵူၼ်းမိူင်းၾၢင်ႉတူဝ်ၵႂႃႇမႃး ဝႃႈၼႆ။
မိူင်းထႆးၼႆႉ ပဵၼ်တီႈၵူၼ်းၼွၵ်ႈမိူင်းမႃးဢႅဝ်ႇယဵမ်ႈလႄႇ ၼမ်တီႈသုတ်း မိူင်းၼိုင်ႈ။ တီႈဢၼ်ၵူၼ်းၵိုၼ်းမိူၼ်ၼင်ႇတီႈ Baiyoke Suite လႄႈ ၽၵ်းတူၼမ်ႉ ၸိူဝ်းၼႆႉၵေႃႈ ယူႇတီႈၾၢႆႇလူင်ပွင်ၸိုင်ႈထႆးဝႃႈ ပဵၼ်ဢွင်ႈတီႈဢၼ်လီၾၢင်ႉသတိ တီႈၼိုင်ႈ ဝႃႈၼႆ။
