ၽူႈတႅၼ်းသၽႃးတပ်ႉသိုၵ်းလူင်ပွင်ၸိုင်ႈမၢၼ်ႈ ထွၼ်သဵၼ်ႈၸိုဝ်ႈဢွၵ်ႇပႅတ်ႈတင်းမူတ်း တႃႇတေမူၼ်ႉမႄးပိူင်ငဝ်ႈပိုင်း 2008 ၼၼ်ႉ။

တွၼ်ႈတႃႇတေဢုပ်ႇဢူဝ်း ၽိုၼ်လိၵ်ႈႁၢႆးငၢၼ်း ဢၼ်တေႁၢင်ႈႁႅၼ်းမူၼ်ႉမႄး ပိူင်ငဝ်ႈပိုင်းမိူင်း 2008 ၼၼ်ႉ ယူႇတီႈ တပ်ႉသိုၵ်း လူင်ပွင်ၸိုင်ႈမၢၼ်ႈ ပၼ်သဵၼ်ႈၸိုဝ်ႈဝႆႉ တင်းမူတ်း 78 ၵေႃႉၼၼ်ႉ ထိုင်မႃးဝၼ်းတီႈ 30/7/2019 ထွၼ်ၸိုဝ်ႈ ဢွၵ်ႇပႅတ်ႈတင်းမူတ်း ၼႂ်းပၢင်ၵုမ်သၽႃးမိူင်းႁူမ်ႈတုမ် ပွၵ်ႈၵမ်း 2 ၵမ်ႈထူၼ်ႈ 13 တီႈၼေႇပျီႇတေႃႇ။

ၵႅမ်ၸွမ်ႁၢၼ် မွင်ႇမွင်ႇ ၽူႈတႅၼ်းသၽႃးတပ်ႉသိုၵ်းလူင်ပွင်ၸိုင်ႈမၢၼ်ႈ လၢတ်ႈဝႃႈ “ ၸွမ်းၼင်ႇၶပ်ႉမၢႆ ၼႂ်းသၽႃးၵူၺ်း။ ႁဝ်းၶႃႈ တေသိုပ်ႇပႂ်ႉတူၺ်းၵႂႃႇထႅင်ႈယူႇ။ လွင်ႈတၢင်ႇဢၼ်တႄႉ ဢမ်ႇမီးသင်။ ႁဝ်းၶႃႈ တေႁဵတ်းၵႂႃႇၸွမ်းၶပ်ႉမၢႆႁဝ်းၶႃႈ ၵူၺ်း။ ႁဝ်းၶႃႈတႄႉတေဢမ်ႇဢုပ်ႇဢူဝ်းသင်ၸွမ်း မၼ်းပႃးဝႆႉၼႂ်းၶပ်ႉမၢႆမၼ်းယူႇ”ဝႃႈၼႆ။

ပိူင်ငဝ်ႈပိုင်းမိူင်း 2008 ဢၼ်တေမူၼ်ႉမႄးၼၼ်ႉ တေႁၢင်ႈႁႅၼ်းမူၼ်ႉမႄးၸွမ်းတွၼ်ႈၵၼ်မၼ်း၊ မိူၼ် ထွၼ်၊ တႅမ်ႈမႂ်ႇ၊ ၽိူမ်ႉထႅမ် ၸိူဝ်းၼႆႉ။ ယူႇတီႈၽူႈတႅၼ်းသၽႃးပႃႇတီႇၵၢၼ်မိူင်း သူၼ်ၸႂ်ၶဝ်ႈၸႂ်ၵၼ်ႁႅင်းသေ ၶဝ်ႈႁူမ်ႈတႃႇတေမူၼ်ႉမႄး ၵူၺ်းၵႃႈ ယူႇတီႈၽူႈတႅၼ်းသၽႃးတပ်ႉသိုၵ်းလူင်ပွင်ၸိုင်ႈမၢၼ်ႈသမ်ႉ ဢမ်ႇၶဝ်ႈႁူမ်ႈပႃးၸွမ်းသေၵေႃႉ ၸၢႆးဢူးၶမ်း ၽူႈ တႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီလၢတ်ႈ။

တွၼ်ႈတႃႇတေမူၼ်ႉမႄး ပိူင်ငဝ်ႈပိုင်းမိူင်း 2008 တွၼ်ႈ 12 ၼၼ်ႉ ယွၼ်ႉဢမ်ႇမႅၼ်ႈၸွမ်းပိူင်မၼ်းလႄႈ တင်ႈတႄႇတၢင်ႇ ထိုင်ၼႂ်းသၽႃးၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ယၢမ်ႈသၢၼ်ၶတ်းမႃးယဝ်ႉ။

ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီ လၢတ်ႈဝႃႈ “ ဢၼ်ၵူၼ်းမိူင်းႁဝ်းၶႃႈ မုင်ႈမွင်းမႃးၼႆႉ ၼင်ႇႁိုဝ် မိူင်းႁူမ်ႈတုမ် ပေႃးတေမီးလွင်ႈၽဵင်ႇပဵင်းလႄႈ ပဵၼ်မႃးမိူင်းႁူမ်ႈတုမ်ၸိုၼ်ႈၸၢင်ႇၾႅတ်ႊတရႄႊ၊ ယဝ်ႉၵေႃႈ မိူင်းၼိုင်ႈလုၵ်ႈ ၼႆႉ ၼင်ႇႁိုဝ် ပေႃးတေမုၼ်းလႅင်းၶိုၼ်ႈယႂ်ႇ ၶိုၵ်းတွၼ်းၼၼ်ႉ တေႃႈလဵဝ် မၼ်းႁွတ်ႈထိုင်မႃးၶၢဝ်းယၢမ်း ငဝ်းလၢႆးတႃႇတေ မူၼ်ႉမႄး ပိူင်ငဝ်ႈပိုင်းမိူင်း 2008။ တွၼ်ႈတႃႇတေပဵၼ်မႃးၾႅတ်ႊတရႄႊၻီႊမူဝ်ႊၶရေႇသီႊလႄႈ တေၵိုင်ႇငၢမ်ႇမႅၼ်ႈၸွမ်း ပိူင်ငဝ်ႈပိုင်းမိူင်းၼၼ်ႉ ပဵၼ်တၢင်းမုင်ႈမွင်းၸၢဝ်းၶိူဝ်းႁဝ်းၶႃႈယဝ်ႉ”ဝႃႈၼႆ။

တွၼ်ႈတႃႇတေမူၼ်ႉမႄးပိူင်ငဝ်ႈပိုင်းမိူင်း 2008 ၼႆႉ ယူႇတီႈၵူၼ်းမိူင်းႁၼ်ထိုင်ၼၼ်ႉတႄႉ ၼင်ႇႁိုဝ် တေပဵၼ်မႃးလွင်ႈ ငမ်းယဵၼ်ၼၼ်ႉယဝ်ႉ ဝႃႈၼႆ။

ၸၢႆးတၢၼ်ႉၸိၼ်ႇ ၽူႈတႅၼ်းသၽႃးၵူၼ်းမိူင်း သီႇပေႃႉ လၢတ်ႈဝႃႈ “ ၽိုၼ်ႁၢႆးငၢၼ်း ဢၼ်တၢင်ႇၶိုၼ်ႈမႃး တေမူၼ်ႉမႄး ၼၼ်ႉ ပဵၼ်ဢၼ်ၼမ်တႄႉ ပိုၼ်းဝၼ်းလင်ဢၼ်ပဵၼ်မႃးယူႇၶိူဝ်းၶိူဝ်းၼၼ်ႉ တွၼ်ႈတႃႇတေသိုပ်ႇႁၢပ်ႇၵႂႃႇၼၼ်ႉ ပဵၼ် ၸၢဝ်းၶိူဝ်းႁဝ်းၶႃႈယဝ်ႉ။ မၼ်းထိုင်ၶၢဝ်းယၢမ်း လူဝ်ႇဢွၼ်ၵၼ်ႁတ်းႁတ်းႁၢၼ်ႁၢၼ် ၵေႃႇသၢင်ႈမိူင်းႁူမ်ႈတုမ်ႁဝ်း ၵႂႃႇၶႃႈ ယဝ်ႉ။ မိူဝ်ႈၵူႈပွၵ်ႈတႄႉ ယွၼ်ႉၵူဝ်လႄႈ ဢမ်ႇၸၢင်ႈသိုပ်ႇၵႂႃႇလႆႈ။ တွၼ်ႈတႃႇႁဝ်းၶႃႈ ၸၢဝ်းၶိူဝ်းတႄႉ ဢမ်ႇၶႂ်ႈသိုပ်ႇၾၼ် ႁၢႆႉထႅင်ႈယဝ်ႉ” ဝႃႈၼႆ။

ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း သႅၼ်ဝီ တုၵ်းယွၼ်းလၢတ်ႈဝႃႈ “ တွၼ်ႈတႃႇမူၼ်ႉမႄး ပိူင်ငဝ်ႈပိုင်းမိူင်း 2008 ပေႃးတေဢွင်ႇမၢၼ်ၵႂႃႇၼၼ်ႉ ၼႂ်းသၽႃးမိူင်းႁူမ်ႈတုမ် ဢၼ်ပႃးၽူႈတႅၼ်းသၽႃးတပ်ႉသိုၵ်းလူင်ပွင်ၸိုင်ႈမၢၼ်ႈၼၼ်ႉ မၼ်းပဵၼ်ႁႅင်းယႂ်ႇလမ်ႇလွင်ႈဝႆႉလႄႈ ႁႂ်ႈယူႇတီႈတၢင်းၵူၼ်းမိူင်းသေ တူၺ်းတေႃႇၼႃႈၵူၼ်းမိူင်း ၼင်ႇႁိုဝ် ပေႃးတေပဵၼ် ၽွၼ်းလီၵႂႃႇၼၼ်ႉ ႁႂ်ႈလႆႈမီးၼမ်ႉၸႂ်ၸေႇတၼႃႇသေ ၶဝ်ႈႁူမ်ႈဢုပ်ႇဢူဝ်းၸွမ်းသေၵမ်း” ဝႃႈၼႆ။

ဢၼ်ပႃႇတီႇပၼ်တၢင်းႁၼ်ထိုင် ၽိုၼ်ႁၢႆးငၢၼ်း လွင်ႈတေမူၼ်ႉမႄးပိူင်ငဝ်ႈပိုင်းမိူင်း 2008 ၼႆႉ တင်းမူတ်း မီး 3,765 ၶေႃႈ။ ၼႂ်းၼၼ်ႉ ပႃႇတီႇႁူဝ်သိူဝ် SNLD ပၼ်ဝႆႉၼမ်တီႈသုတ်းမီး 1,112 ၶေႃႈ။