ၶုၼ်သိုၵ်းလူင် ၶုၼ်သၢင်ႇ ႁၢမ်းငၢႆး လူႉသဵင်ႈသုတ်းမုၼ် တီႈဝဵင်းၵဵင်းမႆႇ ၸိုင်ႈထႆး။

ဝၼ်းတီႈ 23/7/2019 ယၢမ်းၵၢင်ၼႂ် 4 မူင်း ၶုၼ်သိုၵ်းလူင် ၶုၼ်သၢင်ႇ ႁၢမ်းငၢႆး ၵူၼ်းသိုၵ်းပၢၼ် SURA လူႉသဵင်ႈလူၺ်ႈ တၢင်းပဵၼ် ၵူၼ်းထဝ်ႈ ၽွင်းဢႃယု လႆႈ 69 ပီ တီႈၵဵင်းမႆႇ ၸိုင်ႈထႆး။

ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းလုမ်း PI လၢတ်ႈတီႈၽူႈတွႆႇႁွၵ်ႈဝႃႈ“ မၼ်းၸဝ်ႈၼႆႉ ပဵၼ်ၵူၼ်းသိုၵ်းပၢၼ် SURA။ မၼ်း ၸဝ်ႈမႃးယူတ်းယႃတူဝ်တီႈၵဵင်းမႆႇသေ ဝၢႆးၼၼ်ႉ မၼ်းၸဝ်ႈႁပ်ႉပုၼ်ႈၽွၼ်း ယူႇဝႆႉတီႈၵဵင်းမႆႇ ၸွႆႈတူၺ်းပၼ် ၸိူဝ်းပဵၼ် မေးၵူၼ်းသိုၵ်း ဢၼ်ၵႂႃႇၵိူတ်ႇလုၵ်ႈတီႈႁူင်းယႃၵဵင်းမႆႇၼၼ်ႉ မၼ်းၸဝ်ႈလႆႈၵႂႃႇႁပ်ႉႁွင်း ပဵၼ်ပေႃႈတႅၼ်းသေ ၸွႆႈတူၺ်း လုမ်းလႃးပၼ် တေႃႇထိုင်မေးသိုၵ်း ပေႃးပွၵ်ႈႁိူၼ်းၼၼ်ႉယဝ်ႉ။ တေလႆႈဝႃႈ မၼ်းၸဝ်ႈၼႆႉ မီးၼမ်ႉၸႂ် ႁၵ်ႉၸိူဝ်ႉၸၢတ်ႈ တႄႉတႄႉယဝ်ႉ ၵၢၼ်သိုၵ်းၵေႃႈမၼ်းၸဝ်ႈႁဵတ်းသၢင်ႈမႃး”ဝႃႈၼႆ။

ၶုၼ်သိုၵ်းလူင် ၶုၼ်သၢင်ႇ ႁၢမ်းငၢႆးၼႆႉ ပဵၼ်တၢင်းပဵၼ်တၢႆၽၢၵ်ႇသေ လႆႈလူႉသုတ်းမုၼ်ၵႂႃႇ မိူဝ်ႈဝၼ်းတီႈ 23/7/2019 လိူၼ် ပႅတ်ႇလွင်ႈ 7 ၶမ်ႈ။

ထိုင်မႃး ဝၼ်းတီႈ 26/7/2019 ယၢမ်းဝၢႆးဝၼ်း ယူႇတီႈလုၵ်ႈလၢင်းၼၢင်းမေးလႄႈ ၸိူဝ်ႉၶိူဝ်းပီႈၼွင်ႉတီႈၸမ်ၵႆ ဢွၼ်ၵၼ် ပူၼ်ႉၶၢပ်ႈတူဝ် ၶုၼ်သိုၵ်းလူင် ၶုၼ်သၢင်ႇ ႁၢမ်းငၢႆး တီႈပႃႇၸႃႉ/ သၢင်းၶႅင်း သၼ်ၵူႇလဵၵ်း ၸႄႈဝဵင်းၵဵင်းမႆႇ ၸိုင်ႈထႆး။

ပိုၼ်းၵႅပ်ႈၶုၼ်သိုၵ်းလူင် ၶုၼ်သၢင်ႇ ႁၢမ်းငၢႆး –
ၸိုဝ်ႈ ၶုၼ်သိုၵ်းလူင် ၶုၼ်သၢင်ႇ ႁၢမ်းငၢႆး

ၸိုဝ်ႈမိူဝ်ႈလဵၵ်ႉ ၸၢႆးတူဝ်း

ၵိူတ်ႇမိူဝ်ႈ 22/01/1950

တီႈၵိူတ်ႇ ဝၢၼ်ႈၸၢမ်ပွင်ႇ ဢိူင်ႇႁၢမ်းငၢႆး ၸႄႈဝဵင်းမိူင်းၵိုင်

ပေႃႈ/ မႄႈ လုင်းႁဵင်သေႃး + ပႃႈထွၼ်း

ပီ 1960 ဢႃယုလႆႈ 10 ပီ ၶၢမ်ႇသၢင်ႇၼုင်ႈလိူင်သေ ႁဵၼ်းလိၵ်ႈတီႈၵျွင်းလွႆၸွၵ်ႈ ႁၢမ်းငၢႆး။

ပီ 1961 ဢႃယုလႆႈ 11 ပီ ထၢၵ်ႈလူင်းၵျွင်းသေ မိူဝ်းယူႇႁိူၼ်းလႆႈ 2 ပီ။

ပီ 1963 ဢႃယုလႆႈ 13 ပီ ၶဝ်ႈႁၢပ်ႇထၢမ်းၵၢၼ်သိုၵ်း ယူႇၸွမ်း ၸဝ်ႈပူဝ်ႇသၢင်ႇႁၢႆႉ။

ပီ 1972 ဢႃယုလႆႈ 22 တႄႇၼႃႈႁိူၼ်းတင်း ၼၢင်းဢွင်ႇ ၵူၼ်းဝၢၼ်ႈႁူၺ်ႈၸု မီးလုၵ်ႈယိင်းႁူမ်ႈၵၼ် 2 ၵေႃႉ။ 1) ၼၢင်းၸၢမ်၊ 2) ၼၢင်းဢုင်ႇ။

ၵဵဝ်ႇလူၺ်ႈၵၢၼ်သိုၵ်းသေ ၵႆႉလႆႈဢွၵ်ႇၶၢဝ်းတၢင်းမေးၼၢင်းၵေႃႈဢမ်ႇၸၢင်ႈၸွမ်းၵႂႃႇၸွမ်းပႆလႆႈလႄႈ လႆႈၽၢတ်ႇယၢၼ် ၵၼ်။

ၶၢဝ်းတၢင်းၸူဝ်ႈပၢၼ် လႄႈ ၵၢၼ်ၸိူဝ်ႉၸၢတ်ႈ
ပၢၼ်ႁၢပ်ႇထၢမ်းၵၢၼ်သိုၵ်းယူႇၼၼ်ႉ လႆႈယူႇသဝ်းႁဵတ်းၵၢၼ်ၸွမ်းၵူၼ်းလူင်လၢႆလၢႆၸဝ်ႈ မိူၼ်ၼင်ႇ ၸဝ်ႈပူဝ်ႇသၢင်ႇႁၢႆႉ၊ ၸဝ်ႈပၢႆးမိူင်း၊ ၸဝ်ႈၵၼ်းၸဵတ်း၊ ၸဝ်ႈသိုၵ်းသၢင်ႇမူၼ်း၊ ၸဝ်ႈၶုၼ်ၵူႇ၊ ၸဝ်ႈဢွင်ႇပႃႉ (ၸဝ်ႈလၢဝ်းသႃႇ) ၸိူဝ်းၼႆႉ။

ၽွင်းယိပ်းၵွင်ႈၵၢင်ႇတူင်ႉၼိုင်ယူႇၼၼ်ႉ လႆႈၶဝ်ႈပၢင်တိုၵ်းမႃး (43) ပၢင် မိူၼ်ၼင်ႇ ၸုမ်းလႃႉထူၺ်း ၶွမ်ႇမိဝ်ႇၼိတ်ႉမိူင်း မၢၼ်ႈ၊ ၸုမ်း ရလလၽ တိထုၼ်း၊ ၸုမ်းတႃႇၶႄးလိူဝ်ႇ (ပဢူဝ်း)၊ ၸုမ်းရလလၽ ပူဝ်ႇၶျူၵ်ႈ ၸၢၼ်ႇတဵင်း၊ ၸုမ်းၶုၼ်သႃႇ လွႆ မေႃႇ (SUA)၊ ၸုမ်းသိုၵ်းမၢၼ်ႈ ၸိူဝ်းၼႆႉ။

ပီ 1977 လႆႈတိူဝ်ႉမၢတ်ႇၸဵပ်းပွၵ်ႈၵမ်းၼိုင်ႈ တီႈမိုဝ်းၾၢႆႇၶႂႃ။

ပီ 1979 ၶွတ်ႇၽွတ်ႈငႃးသိုၵ်းဢွင်ႇပေႉသိုၵ်း ၸဝ်ႈဢွင်ႇပႃႉ ဢွၼ်ႁူဝ် ၸဝ်ႈၶုၼ်သၢင်ႇ ပဵၼ်ၵႅမ် လႆႈပဵၼ်ပၢင်တိုၵ်းၵၼ် တင်းၸုမ်းၶွမ်ႇမိဝ်ႇၼိတ်ႉ (ဝႃႉလႅင်) တီႈဝၢၼ်ႈႁူၺ်ႈဢုတ်ႇ။

ပီ 1979 လိူၼ်သီႇလွင်ႈ 6 ၶမ်ႈ ပဵၼ်ပၢင်တိုၵ်းၵၼ်တင်းၸုမ်းပူဝ်ႇတိုၵ်းမိူင်း တႄႇယၢမ်းၵၢင်ၼႂ် 9 မူင်း တေႃႇထိုင် ဝၢႆးဝၼ်း 2 မူင်း လႆႈတိူဝ်ႉမၢတ်ႇၸဵပ်းပွၵ်ႈၵမ်းသွင် တိူဝ်ႉတီႈတိၼ်လႄႈ ပဵၼ်ၶႃၶႄႉမႃး။

ပီ 1985 လႆႈၶိုၼ်ႈၸၼ်ႉပဵၼ် ၶုၼ်သိုၵ်းလူင်သေ ဢဝ်ပုၼ်ႈၽွၼ်းတူၺ်းလွမ်ၵုမ်းၵၢၼ်ႁိူၼ်းႁပ်ႉၶႅၵ်ႇတပ်ႉသိုၵ်းတီႈၵဵင်းမႆႇ ၸင်ႇလႆႈတႄႇၼႃႈႁိူၼ်းတင်းၼၢင်းဢူ မီးလုၵ်ႈလၢင်းႁူမ်ႈၵၼ် 2 ၵေႃႉ။ 1) ၼၢင်းၼူႉ၊ 2) ၸၢႆးဝူင်း။

ပီ 1996 ၶုၼ်သႃႇ ဢွၼ်တပ်ႉသိုၵ်းမိူင်းတႆး ဝၢင်းၶိူင်ႈယဝ်ႉ၊ ၸဝ်ႈယွတ်ႈသိုၵ်းၶိုၼ်းတႄႇတင်ႈၸုမ်းမႂ်ႇလႄႈ ႁွင်ႉၸဝ်ႈၶုၼ် သၢင်ႇၶဝ်ႈႁူမ်ႈၸွမ်းယူႇ ၵူၺ်းၵႃႈ ယွၼ်ႉဢႃယုၵေႃႈယႂ်ႇယဝ်ႉ တိၼ်ဢမ်ႇလီၵေႃႈပိူင်ၼိုင်ႈ ၸင်ႇဢမ်ႇလႆႈၶဝ်ႈႁူမ်ႈသေ ယူႇ ႁိူၼ်းၸွမ်းလုၵ်ႈမေး။