ၵူၼ်းမိူင်းၼမ်ႉလၼ်ႈ ႁူမ်ႈၵၼ်ပူၵ်းပၢႆႉ ၸိုဝ်ႈသဵၼ်ႈတၢင်းလူင်လႄႈ ၵိဝ်ႇ ဢၼ်ပႃးလိၵ်ႈတႆး

ၵူၼ်းမိူင်းၼမ်ႉလၼ်ႈ ႁူမ်ႈၵၼ် ပူၵ်းပၢႆႉ ဢၼ်ပႃးတူဝ်လိၵ်ႈတႆး၊ လိၵ်ႈမၢၼ်ႈလႄႈ လိၵ်ႈဢင်းၵိတ်း သၢမ်ၽႃသႃ ၸွမ်း သဵၼ်ႈ တၢင်းလူင်လႄႈ ၸွမ်းၵိဝ်ႇပွၵ်ႉ။

ဝၼ်းတီႈ 30-31/7/2019 ၸုမ်းတူင်ႉၼိုင်တူင်ႇဝူင်းတႆးၼႂ်းၼမ်ႉလၼ်ႈ ၵူႈၸုမ်းၸုမ်း၊ ၽူႈတႅၼ်းသၽႃး၊ ပႃႇတီႇၵၢၼ်မိူင်း၊ ႁွင်ႈၵၢၼ်လူင် ပွင်ၸိုင်ႈမၢၼ်ႈ လၢႆလၢႆႁွင်ႈၵၢၼ် ႁူမ်ႈၵၼ် ပူၵ်းပၢႆႉ ၸွမ်းသဵၼ်ႈတၢင်းလူင်၊ ၸွမ်းၼႂ်းၵိဝ်ႇပွၵ်ႉ။ ၼႂ်းၶၢဝ်း တၢင်း 2 ဝၼ်းၼႆႉ ပူၵ်းပၢႆႉၸိုဝ်ႈသဵၼ်ႈတၢင်းယဝ်ႉ 72 ဢၼ် ဝႃႈၼႆ။

ၽူႈဢွၼ်ႁူဝ်တူင်ႉၼိုင် ၸုမ်းၵူၼ်းၼုမ်ႇတႆး ၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ တီႈၼမ်ႉလၼ်ႈႁဝ်းၶႃႈၼႆႉ သဵၼ်ႈ တၢင်းလူင်၊ သဵၼ်ႈတၢင်းၸွမ်းၼႂ်းပွၵ်ႉ၊ ၸွမ်းမူႇဝၢၼ်ႈ။ သဵၼ်ႈတၢင်းယႂ်ႇ၊ တၢင်းႁၢတ်ႈလႄႈ တၢင်းဢွၼ်ႇ တင်းမူတ်းတေမီး 202 သဵၼ်ႈ။ ၼႂ်းၶၢဝ်းတၢင်း 2 ဝၼ်းၼႆႉ သႂ်ႇယဝ်ႉၵႂႃႇ 71 ဢၼ်။ ဢၼ်ၵိုတ်းထႅင်ႈၸိူဝ်းၼၼ်ႉတႄႉ တေၶတ်းၸႂ်သႂ်ႇႁႂ်ႈ ယဝ်ႉၶႃႈ” ဝႃႈၼႆ။

ပၢႆႉဢၼ်ပူၵ်းၸွမ်းသဵၼ်ႈတၢင်းၼႂ်းၼမ်ႉလၼ်ႈၼႆႉ တႅမ်ႈသႂ်ႇဝႆႉ တူဝ်လိၵ်ႈ 3 ၽႃသႃ မိူၼ်ၼင်ႇ လိၵ်ႈတႆး၊ လိၵ်ႈမၢၼ်ႈလႄႈ လိၵ်ႈဢိင်းၵလဵတ်ႈ။ လၵ်းသဝ်လႄႈ ပၢႆႉတူဝ်လိၵ်ႈ ၼိုင်ႈၵူႈၼႆႉ တူၵ်းမႅၼ်ႈငိုၼ်မၢၼ်ႈယူႇ 75,000 ပျႃး ဝႃႈၼႆ။

“မိူဝ်ႈဝႃးတႄႉ ႁဝ်းၶႃႈ ပိုတ်ႇပၢႆႉမင်ၵလႃႇသေ ဢွၼ်ၵၼ်သႂ်ႇမႃး။ မိူဝ်ႈၼႆႉၶိုၼ်းသိုပ်ႇသႂ်ႇထႅင်ႈ။ ငိုၼ်းဢၼ်ႁဵတ်းပၢႆႉ တူဝ် လိၵ်ႈၼႆႉ ၵၢင်ႉၵႄႇ ၼႂ်းပွၵ်ႉဢိူင်ႇဝၢၼ်ႈၽႂ်မၼ်း ႁူမ်ႈၵၼ်သေ ႁဵတ်းပၢႆႉသႂ်ႇၶႃႈ ၼင်ႇႁိုဝ် ႁႂ်ႈမၼ်းပေႃးတေပဵၼ်ၽွၼ်းလီတႃႇၵူၼ်းတင်းၼမ်” ၵူၼ်းၼႂ်းပိုၼ်ႉတီႈ ၼမ်ႉလၼ်ႈ ၵေႃႉၼိုင်ႈလၢတ်ႈၼႄၼင်ႇၼႆ။

မိူဝ်ႈပီ 2017 ၼၼ်ႉ ၽွင်းလူင်ၾၢႆႇလိူမ်ႈလႆႇ လူင်ပွင်ၸိုင်ႈမိူင်းတႆး ပၼ်ဢၼုၺၢတ်ႈဝႆႉဝႃႈ ပၢႆႉၸိုဝ်ႈဝဵင်း၊ ၸိုဝ်ႈတၢင်းၼၼ်ႉ တႅမ်ႈပႃးတူဝ်လိၵ်ႈၸၢဝ်းၶိူဝ်းပိုၼ်ႉတီႈၽႂ်မၼ်းလႆႈယူႇ ဝႃႈၼႆဝႆႉ။