ႁႅင်းၵၢၼ် တီႈဢွင်ႈတီႈလုၵ်ႈဢွၼ်ႇလဵၼ်ႈလႄႈ သူၼ်ၼမ်ႉ ဝဵင်းလႃႈသဵဝ်ႈ ႁူမ်ႈၵၼ်ပႆတၢင်း ဢွၵ်ႇၼႄၵၢင်ၸႂ်တေႃႇပေႃႈ လဵင်ႉ/ ၼၢႆးၸၢင်ႈ ယွၼ်ႉဢမ်ႇလႆႈၵႃႈႁႅင်း။
ဝၼ်းတီႈ 30/07/2019 ယၢမ်းၵၢင်ၼႂ် 9 မူင်းၶိုင်ႈၼၼ်ႉ ၵူၼ်းႁဵတ်းၵၢၼ်(ႁႅင်းၵၢၼ်) တီႈသူၼ်ၼမ်ႉ Gold Luck Water Park ႁူမ်ႈၵၼ်တႄႇ ပႆတၢင်းလုၵ်ႉဢဝ် တီႈ ပွၵ်ႉ(1) သေ ပႆထိုင်ၼႃႈႁူင်းႁေႃးၵၢင်ဝဵင်း ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ႁႅင်းၵၢၼ် ႁူမ်ႈၵၼ်ယိပ်းပၢႆႉသေ ႁွင်ႉပၢဝ်ႇၸွမ်းတၢင်း ႁႂ်ႈပေႃႉလဵင်ႉ ဢူးယေးၼၢႆႇ Gold Luck Water Park ၸၢႆႇပၼ်ငိုၼ်း ၵႃႈႁႅင်းၵူၼ်းႁဵတ်းၵၢၼ်ဝႆးဝႆး။ ႁႂ်ႈပွႆႇပၼ်ၵူၼ်းႁဵတ်းၵၢၼ် ဢၼ်ၺႃးပေႉၵိၼ်တဵၵ်းတဵင်ဝႆႉၸိူဝ်းၼၼ်ႉဝႆးဝႆး” ဝႃႈၼႆ။
ၵူဝ်ႇယေႃးႁၢၼ်ႇ ၽူႈဢွၼ်ႁူဝ်တူင်ႉၼိုင်ဢွၵ်ႇၼႄၵၢင်ၸႂ် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ၵူၼ်းႁဵတ်းၵၢၼ်တႃးသီ တင်းမူတ်း 15 ၵေႃႉ ပႆႇလႆႈငိုၼ်းၵႃႈႁႅင်း မွၵ်ႈ 130 သႅၼ်ပျႃး။ ႁဝ်းၶႃႈ လႆႈငိုၼ်းတေႃႇထိုင်လိူၼ်မတ်ႊၶျ် ပူၼ်ႉမႃးၼၼ်ႉ ၵူၺ်း။ ၵဵဝ်ႇၵပ်းလွင်ႈၸဝ်ႈသူၼ်မွၵ်ႇ ဢမ်ႇပႆႇပၼ်ငိုၼ်းၵႃႈႁႅင်းၼၼ်ႉၵေႃႈ မိူဝ်ႈ 22 ဝၼ်း လိူၼ်ၵျုႊလၢႆႊၼၼ်ႉ လႆႈတၢင်ႇ ထိုင်ၵႂႃႇတီႈၶွမ်ႊမတီႊငူပ်ႉငီႉဢုပ်ႇဢူဝ်းႁႅင်းၵၢၼ်ယဝ်ႉ” ဝႃႈၼႆ။
ၵူဝ်ႇယေႃးႁၢၼ်ႇ လၢတ်ႈဝႃႈ “ တွၼ်ႈတႃႇတေထူပ်းႁဝ်းၶႃႈၼႆႉ မၼ်းပိုၼ်ၽၢဝ်ႇဝႆႉၼႂ်းလိၵ်ႈပိုၼ်ၶၢဝ်ႇ။ ယွၼ်ႉဝႃႈ တွၼ်ႈတႃႇ လွင်ႈႁူမ်ႇလူမ်ႈႁဝ်းၶႃႈလႄႈ ႁဝ်းၶႃႈဢမ်ႇဢွၼ်ၵၼ်ၵႂႃႇ။ ၵွၼ်ႇၼႃႈၼၼ်ႉ ၽူႈသိုဝ်ႇၶၢဝ်ႇၵေႃႉၼိုင်ႈ ဢၼ်မႃးဢဝ်ၶၢဝ်ႇ ၼၼ်ႉ ၺႃးမၼ်းလွၵ်ႇငိုတ်ႈ ထိုင်တီႈၺႃးပလိၵ်ႈဢဝ်လိူင်ႈ။ ႁဝ်းၶႃႈၼႆႉ ၶႂ်ႈၵႄႈလိတ်ႈဢုပ်ႇဢူဝ်းၸွမ်းၶွမ်ႊမတီႊငူပ်ႉငီႉ ဢုပ်ႇဢူဝ်းႁႅင်းၵၢၼ်ၵူၺ်း” ဝႃႈၼႆ။
တွၼ်ႈတႃႇတေသပ်းၸႅင်ႈလွင်ႈသဵၼ်ႈသၢႆမၢႆ ငိုၼ်းတွင်းတႃႇၵူၼ်းႁဵတ်းၵၢၼ်တႃးသီၼၼ်ႉ ယူႇတီႈဢူးယေးၼၢႆႇ Gold Luck Water Park လူင်းၶၢဝ်ႇၵႂႃႇၼႂ်းမျၢၼ်ႇမႃႉဢလိၼ်းသေ ႁွင်ႉမႃးဢုပ်ႇၵၼ် ဝႃႈၼႆ။
ဢူးယေးၼၢႆႇ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈႁဝ်းၶႃႈသေ လႆႈပိုၼ်ၽၢဝ်ႇႁွင်ႉဢဝ် ၵူဝ်ႇယေႃးႁၢၼ်ႇ ႁပ်ႉမဝ် (ၵၼ်ႇထ ရႅၵ်ႉ) ၼၼ်ႉ မႃးဢုပ်ႇၵုမ်။ လွင်ႈဝႃႈဢၼ်ဢမ်ႇ သပ်းၸႅင်ႈၼႄၵၼ်ဢၼ်ဝႃႈ ၼၼ်ႉတႄႉ ဢမ်ႇၸႂ်ႈၶႃႈ။ လွင်ႈၼႆႉ ယွၼ်ႉ ဝႃႈမၼ်းမီးၼႂ်းၶၵ်ႉၵၢၼ်တီႈဢၼ်လႆႈတူၵ်းလူင်းၵၼ်ဝႆႉၼၼ်ႉ” ဝႃႈၼႆ။
တွၼ်ႈတႃႇတေဢဝ်ၶၢဝ်ႇလွင်ႈၵူၼ်းတႃးသီ ဢၼ်ဢမ်ႇလႆႈငိုၼ်းၵႃႈႁႅင်းၼၼ်ႉ ယူႇတီႈၶုၼ်ႇသေႃႇဢူး ၽူႈသိုဝ်ႇၶၢဝ်ႇ DVB လႄႈ မမျတ်ႉၼူဝ်းတူႇ ၽူႈသိုဝ်ႇၶၢဝ်ႇမျၢၼ်ႇမႃႇထၢႆးမ် လႆႈၵႂႃႇတွင်ႈထၢမ် ဢူးယေးၼၢႆႇ မိူဝ်ႈဝၼ်းတီႈ 22 လိူၼ်ၵျူႊလၢႆႊ။ ၽူႈသိုဝ်ႇၶၢဝ်ႇသွင်ၵေႃႉၺႃးလွၵ်ႇငိုတ်ႈသေ ဢမ်ႇၵႃးၺႃးဢဝ်လိူင်ႈပိုတ်ႇဢမုၶၻီးတေႃႇသိုဝ်ႇၶၢဝ်ႇ လူၺ်ႈတၢင်းၽိတ်း ႁေႃႈၵႃး ဢမ်ႇမီးၶွၼ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ