သိုၵ်းမၢၼ်ႈမိူင်းပဵင်း လၢတ်ႈဝႃႈ ၶေႃႈၸီႉသင်ႇပိဝ်ႇႁႃႇၼႆသေ တီႉၺွပ်းၵူၼ်းဝၢၼ်ႈၼႄးဝႃႈပဵၼ်ၵူၼ်း RCSS။ ၵုမ်းၶင်ဝႆႉ 10 ဝၼ်းယဝ်ႉ ၸင်ႇမွပ်ႈပၼ်ပလိၵ်ႈပိုတ်ႇလိူင်ႈလူၺ်ႈတၢင်းၽိတ်းယႃႈမဝ်းၵမ်။

ဝၼ်းတီႈ 28/7/2019 ယၢမ်းၵၢင်ၶမ်ႈ မွၵ်ႈ 8 မူင်း 45 မိၼိတ်ႉ လုင်းၼၼ်ႇတိယ ၵူၼ်းဝၢၼ်ႈၼႂ်းဢိူင်ႇမိူင်းပူးဢွၼ်ႇ ၸႄႈ ဝဵင်းမိူင်းပဵင်း ဢၼ်ၺႃးသိုၵ်းလူင်ပွင်ၸိုင်ႈမၢၼ်ႈ တပ်ႉပိဝ်ႇႁႃႇ မိူင်းပဵင်း ၵုမ်းၶင်တူဝ်ဝႆႉၼၼ်ႉ ၾၢႆႇသိုၵ်းမၢၼ်ႈ ဢဝ်ၵႂႃႇမွပ်ႈ ပၼ် ပလိၵ်ႈမိူင်းပဵင်း ႁႂ်ႈဢဝ်လိူင်ႈလူၺ်ႈတၢင်းၽိတ်းယႃႈမဝ်းၵမ်။

ၵူၼ်းမိူင်းပဵင်းၸဝ်ႈၼႃး ဢႃယု မွၵ်ႈ 50 ပီပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လုင်းၼၼ်ႇတိယၼႆႉ ပဵၼ်ၵူၼ်းၼႂ်း ပိုၼ်ႉတီႈတႄႉတႄႉ ဢမ်ႇၸႂ်ႈၵူၼ်းသိုၵ်းၸုမ်းလႂ်။ မၼ်းၸၢႆးၼႆႉ ယင်းပဵၼ်ၵူၼ်းဢမ်ႇပေႃးၶႂ်ႈတဵမ်(ယွင်ႇယီႈယွင်ႇယႅင်ႇ) ဝႆႉၼႄႈ။ တင်ႈတႄႇသိုၵ်းမၢၼ်ႈတီႉၺွပ်းဢဝ်တူဝ်မၼ်းၸၢႆးၵႂႃႇတေႃႇထိုင်တေႃႈလဵဝ် ပႆႇငိၼ်းဝႃႈသင် ပွႆႇ/ ဢမ်ႇပွႆႇဢၼ် ဝႃႈၼၼ်ႉ” ဝႃႈၼႆ။

လုင်းၼၼ်ႇတိယၼႆႉ ဢႃယု တေမီးမွၵ်ႈ 50 ပီပၢႆ ၺႃးသိုၵ်းလူင်ပွင်ၸိုင်ႈမၢၼ်ႈ တပ်ႉပိဝ်ႇႁႃႇ မိူင်းပဵင်း တီႉၺွပ်းၵုမ်းၶင် တူဝ်မၼ်းၸၢႆးၵႂႃႇ ႁိုင်မွၵ်ႈ 2 ဝူင်ႈပၢႆယဝ်ႉ ၸင်ႇမွပ်ႈဢၢပ်ႈပၼ်ၾၢႆႇပလိၵ်ႈ ႁႂ်ႈၸွႆးတြႃးၵႂႃႇ ဝႃႈၼႆ။

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ လုမ်းၵပ်းသၢၼ် RCSS တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ပေႃးဢဝ်တၢင်း ၼႂ်းလိုၵ်ႉလိုၵ်ႉဝႃႈတႄႉ ၶဝ်ၶႂ်ႈႁႂ်ႈႁဝ်းၵၢၼ်ယုင်ႈၵၢၼ်သုၵ်ႉၸွမ်းလွင်ႈၸိူဝ်းၼၼ်ႉ။ ထႅင်ႈလွင်ႈၼိုင်ႈ ႁဵတ်းႁႂ်ႈလွင်ႈယုမ်ႇ ယမ်ၵူၼ်းမိူင်းတေဢေႇလူင်းသေဢမ်ႇၵႃး တေဢမ်ႇႁတ်းၶဝ်ႈဢွၵ်ႇတၢင်းၸုမ်းႁဝ်း။ ၶဝ်ၼႆႉ ႁႃႁူးႁႃႁွႆး ႁႃ ဢပႅတ်ႈ တၢင်းၽိတ်းသေ ပူဝ်ႉသႂ်ႇႁဝ်းၵူၺ်း” ဝႃႈၼႆ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်း NCA ၸွမ်း လူင်ပွင်ၸိုင်ႈမၢၼ်ႈ ၸုမ်းၼိုင်ႈ။ ၼႂ်းလိၵ်ႈၵိၼ်ၵႅၼ်ႇ NCA ၼၼ်ႉ ပႃးဝႆႉဝႃႈ တပ်ႉသိုၵ်း တင်းသွင်ၾၢႆႇ တေဢမ်ႇပၼ် တၢင်းယၢပ်ႇၽိုတ်ႇၵူၼ်းမိူင်း၊ ပေႃးဝႃႈတေၵႂႃႇၼႂ်းပိုၼ်ႉတီႈၵၼ်ၸိူဝ်းၼႆႉ ပေႃးဢမ်ႇပႃးၵွင်ႈၵၢင်ႇၵႂႃႇမႃး လႆႈလွတ်ႈလႅဝ်ႈ တေဢမ်ႇဢဝ်လိူင်ႈၵၼ် ၸဵမ်ၸိူဝ်းၼႆႉ။

ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈလူင်ပွင်ၸိုင်ႈ ၵေႃႈလီ၊ တပ်ႉသိုၵ်းမၢၼ်ႈၵေႃႈလီ ဢမ်ႇထုၵ်ႇလီႁဵတ်းၸိူင်ႉၼႆ ပေႃးယင်းမီးၵၢင်ၸႂ်လွင်ႈငမ်းယဵၼ်တႄႉတႄႉ ၶႂ်ႈႁႂ်ႈဝၢၼ်ႈ မိူင်းၵတ်းယဵၼ်တႄႉတႄႉ၊ ၶႂ်ႈႁႂ်ႈၵူၼ်းဝၢၼ်ၵူၼ်းသူၼ် လႆႈယူႇပျေႃႇယူႇသႃႇတႄႉတႄႉၸိုင် လွင်ႈထၢင်ႇထိူမ်၊ လွင်ႈသွၵ်ႈ တဝ် လွင်ႈတီႉၺွပ်းၸိူဝ်းၼႆႉ မၼ်းဢမ်ႇထုၵ်ႇလီမီး၊ လူဝ်ႇၵိုတ်းယင်ႉယဝ်ႉ” ဝႃႈၼႆ။

ႁွင်ႈၵၢၼ်ၶၢဝ်ႇ သူၺ်ႇတရိၵၢၼ်ႇတေႇတ ဢွၵ်ႇဝႆႉဝႃႈ “ သိုၵ်းလူင်ပွင်ၸိုင်ႈမၢၼ်ႈၼႄးဝႃႈ လုင်းၼၼ်ႇတိယၼႆႉ ပဵၼ်ၵူၼ်း သိုၵ်း RCSS ၼႆသေ ယူႇတီႈ ၸဝ်ႈသိုၵ်းပၺႃးဝိၼ်း တပ်ႉပိဝ်ႇႁႃ မိူင်းပဵင်း တီႉၺွပ်းၵုမ်းၶင်တူဝ်မၼ်းၸၢႆး တီႈႁိမ်းၼမ်ႉ ပဵင်း ၼႂ်းဢိူင်ႇယၢင်းၶမ်း။ ဢဝ်ၵႂႃႇ ၵုမ်းၶင်တူဝ်ထဵတ်ႈထၢမ် ႁိုင်ၶၢဝ်းတၢင်း 2 ဝူင်ႈပၢႆ။ ၽွင်းမိူဝ်ႈထဵတ်ႈထၢမ်ၼၼ်ႉ ထူပ်း ႁၼ်ပႃးယႃႈမႃႉ195 မဵတ်ႉဝႃႈၼႆသေ သူင်ႇတူဝ်ပၼ်တီႈႁူင်းပလိၵ်ႈမိူင်းပဵင်း ပိုတ်ႇလိူင်ႈႁႂ်ႈၸွႆးတြႃး” ဝႃႈၼႆ။

မိူဝ်ႈဝၼ်းတီႈ 6/7/2019 ၼၼ်ႉၵေႃႈ သိုၵ်းလူင်ပွင်ၸိုင်ႈမၢၼ်ႈတပ်ႉၶမယ 579 တီႉၺွပ်းၵူၼ်းဝၢၼ်ႈၸႄႈဝဵင်းမိူင်းပဵင်း ၵေႃႉၼိုင်ႈၼင်ႇၵဝ်ႇ။ ၼႄးဝႃႈမၼ်းၸၢႆးၵႂႃႇသိုဝ်ႉၶဝ်ႈသၢၼ်ပၼ် သိုၵ်းတႆး RCSS ၼႆသေ ပေႃႉထုပ်ႉ ဝႃႈၼႆ။