သၢဝ်ႁၢင်ႈလီ ဝဵင်းၼမ်ႉၶမ်း တၢင်တူဝ် မိူင်းႁူမ်ႈတုမ်သေ ၵႂႃႇၶႅင်ႇ ၼၢင်းငၢမ်းဢူၺ်းလီၸၼ်ႉၸိုင်ႈမိူင်း တီႈမိူင်းၶႄႇသေ လႆႈႁပ်ႉသူး Miss congeniality ( သူးထုၵ်ႇၸႂ်ၽူႈပၼ်ႁႅင်း)။
ဝၼ်းတီႈ 17 – 27 /07/2019 တီႈဝဵင်းၶျိူင်တူး ဝဵင်းလူင်မၢႆ 4 ၶွင်ၸိုင်ႈမိူင်းၶႄႇ ၸတ်းႁဵတ်းပၢင်ၶႅင်ႇ ၼၢင်းငၢမ်းဢူၺ်းလီၸၼ်ႉၸိုင်ႈမိူင်း Miss Friendship International 2019 ။ မီးၼၢင်းႁၢင်ႈ လီတူဝ်ႈလုမ်ႈၾႃႉ 60 မိူင်း ၶဝ်ႈၶႅင်ႇ ။ ၼႂ်းၼၼ်ႉ ၼၢင်းမူၺ်ၶမ်း သၢဝ်ႁၢင်ႈလီဝဵင်းၼမ်ႉၶမ်း ထုၵ်ႇလိူၵ်ႈပဵၼ် တူဝ်တႅၼ်းမိူင်းႁူမ်ႈတုမ်မျႅၼ်ႇမႃႇသေ ၶဝ်ႈၶႅင်ႇ။ ဢၼ်လႆႈသူးတီႈ 1 ၵႂႃႇ ပဵၼ် Emilia Dobreva ၸၢဝ်းသႃႊပီႊယႃႊ။
ၼၢင်းမူၺ်ၶမ်းတႄႉ လႆႈႁပ်ႉသူး Miss congeniality ( သူးထုၵ်ႇၸႂ်ၽူႈပၼ်ႁႅင်း) ပဵၼ်သူးဢၼ် မီးၵူၼ်းပၼ်ႁႅင်း Votes ၼမ်လိူဝ်သေပိူၼ်ႈၼႆယဝ်ႉ။
ၼၢင်းမူၺ်ၶမ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ -“ ယွၼ်ႉပီႈၼွင်ႉႁဝ်းၶႃႈၸွႆႈပၼ်ႁႅင်း Vote ပၼ်ၶႃႈလႄႈ ၶႃႈၸင်ႇလႆႈႁပ်ႉသူးဢၼ်ၼႆႉၶႃႈဢေႃႈ ။ ယိၼ်းၸူမ်းယႂ်ႇၼမ်တႄႉတႄႉၶႃႈ ” ဝႃႈၼႆ။
ၼၢင်းမူၺ်ၶမ်း ၼၢင်းငၢမ်းၼမ်ႉၶမ်းၼႆႉ မိူဝ်ႈဝၼ်းတီႈ 09/07/2017 လႆႈၶႅင်ႇပေႉမိူင်း တႆးပွတ်းႁွင်ႇတင်းသဵင်ႈ သေလႆႈ ႁပ်ႉသူး Miss Golden Land Shan State North သိုပ်ႇၼၼ်ႉ လႆႈၵႂႃႇၶႅင်ႇ တီႈပၢင်ၶႅင်ႇ Miss Golden Land Myanmar တီႈဝဵင်း လူင်တႃႈၵုင်ႈ မိူဝ်ႈဝၼ်းတီႈ 13/10/2017 ၼၼ်ႉသေ မၼ်းၼၢင်းလႆႈႁပ်ႉလိူၵ်ႈပဵၼ် Miss All Nation Myanmar 2017။
မိူဝ်ႈဝၼ်းတီႈ 29/12/2017 ၼၼ်ႉသမ်ႉ လႆႈၵႂႃႇၶႅင်ႇ Miss All Nation 2017-2018 တီႈဝဵင်းယၢၼ်ႇၵျိၼ်း ၸိုင်ႈမိူင်းၶႄႇသေ မၼ်းၼၢင်း လႆႈသူးရၢင်းဝလ်း Miaoya Title ။
ၼၢင်းမူၺ်ၶမ်းၼႆႉ ပဵၼ်လုၵ်ႈယိင်းလူင် ၸၢႆးလႃႉၵျေႃႇလႄႈ ၼၢင်းသႅင်သႃႇ ပွၵ်ႉႁူဝ်ၵၢတ်ႇ၊ ဝဵင်းၼမ်ႉၶမ်း။ ယဝ်ႉႁူင်းႁဵၼ်း လႆႈႁပ်ႉၸုမ်ႈၶူး BA History ပၢႆးပိုၼ်း မိူဝ်ႈပီ 2013 ။ ယၢမ်းလဵဝ်ပိုတ်ႇႁၢၼ်ႉၶူဝ်းတႆး ယဵပ်ႉၶူဝ်းတႆး ဝႆႉတီႈႁိူၼ်း ဝဵင်းၼမ်ႉၶမ်း ဝႃႈၼႆ။
