ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၸတ်းႁဵတ်းပၢင်ၵုမ် 6 လိူၼ်ၶွပ်ႈ တီႈငဝ်ႈၸိုင်ႈလွႆတႆးလႅင်း ဢွၵ်ႇၶေႃႈပိုၼ်ၽၢဝ်ႇလၢႆၶေႃႈ ၼႂ်းၼၼ်ႉတူၵ်ႇတၵ်ႉပႃး တေၸတ်းႁဵတ်းပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈတႆး။
ပၢင်ၵုမ်ၼၼ်ႉ ၸတ်းႁဵတ်း 21-23/7/2019 ၶၢဝ်းတၢင်း 3 ဝၼ်း၊ ဝၢႆးပၢင်ၵုမ်ယဝ်ႉ ဢွၵ်ႇၶေႃႈပိုၼ်ၽၢဝ်ႇ 7 ၶေႃႈ။ ၼႂ်းၼၼ်ႉ တႃႇၶေႃႈၼိုင်ႈတႅမ်ႈဝႆႉဝႃႈ “ သင်ဝႃႈ တေၸတ်းႁဵတ်း ပၢင်ၵုမ်လူင်ပၢင်လူင်ႁူဝ်ပၢၵ်ႇပီ 21 ပွၵ်ႈၵမ်း 4 ၵႂႃႇယူႇၼႆၸိုင် တေ ၶတ်းၸႂ် ၸတ်းႁဵတ်း ပၢင်ၵုမ်ဢုပ်ႇဢူဝ်း ၵၢၼ်မိူင်းၸၼ်ႉၸိူဝ်ႉၸၢတ်ႈၸိူဝ်ႉၶိူဝ်းတႆးၵႂႃႇယူႇ” – ဝႃႈၼႆ။
မိူဝ်ႈပီ 2017 ၼၼ်ႉ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ဢွၼ်ၼမ်း တူဝ်တႅၼ်း လူင်းပိုၼ်ႉတီႈ သပ်းလႅင်း တွင်ႈထၢမ် ၵၢင်ၸႂ်ၵူၼ်းမိူင်း ငဝ်းလၢႆးၵၢၼ်မိူင်းလႄႈလွင်ႈၶႂ်ႈၸတ်းႁဵတ်းပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး၊ ဢၼ်တႆးထုၵ်ႇလႆႈ ဢၼ်တႆးၶႂ်ႈလႆႈၶႂ်ႈပဵၼ် ၸိူဝ်းၼၼ်ႉ ၺႃးတပ်ႉသိုၵ်းလူင်ပွင်ၸိုင်ႈမၢၼ်ႈ သူင်ႇႁႅင်းသိုၵ်းႁႄႉႁၢမ်ႈ။
ယိင်းႁၢၼ်ၾႃႉ ၽူႈတူင်ႉၼိုင်တူင်ႇဝူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “လွင်ႈတေၸတ်းႁဵတ်းပၢင်ၵုမ်လူင်ၵၢၼ် မိူင်းၸၼ်ႉ
ၸိူဝ်ႉၸၢတ်ႈတႆးၼႆႉ ဢမ်ႇၶႂ်ႈႁႂ်ႈ RCSS ဢၼ်လဵဝ်ၵူၺ်း ၸတ်းႁဵတ်း သင်ပဵၼ်လႆႈ ယူႇတီႈ CSSU သေ ၸတ်းႁဵတ်းၼႆ ယိုင်ႈၶႅၼ်းလီ ၵွပ်ႈပိူဝ်ႈဝႃႈ ၼႂ်း CSSU ၼႆႉ မၼ်းမီးဝႆႉ ပႃႇတီႇ၊ တပ်ႉသိုၵ်း၊ တူင်ႇဝူင်းၵူၼ်း၊ ၵူၼ်းၼုမ်ႇ ၸဵမ်ၸိူဝ်းၼႆႉဝႆႉ” – ဝႃႈၼႆ။
ပၢင်ၵုမ်လူင်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆးၼႆႉ CSSU ၶႂ်ႈဢွၼ်ၼမ်း ၸတ်းႁဵတ်းတီႈ ဝဵင်းလူင်တူၼ်ႈတီး ဢၼ်ပဵၼ် ငဝ်ႈဝဵင်းၸိုင်ႈတႆး၊ ဢမ်ႇၼၼ် ၸတ်းႁဵတ်းတီႈ ဝဵင်းပၢင်လူင် တီႈၾင်ႁူၵ်ႉႁႄႇ မိူင်းႁူမ်ႈတုမ်။ ၵူၺ်းၵႃႈ ၾၢႆႇသိုၵ်းလူင်ပွင် ၸိုင်ႈမၢၼ်ႈ ဢမ်ႇၽွမ်ႉၸွမ်း။
ၸၢႆးလဵၵ်ႉ ၽူႈၶၢၼ်ပၢၵ်ႇ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU လၢတ်ႈဝႃႈ – “ယူႇတီႈ RCSS တင်း NRPC တူၵ်းလူင်းလႆႈ ၸႂ်ၵၼ်ယဝ်ႉ မၼ်းၵေႃႈႁဵတ်းလႆႈၵႂႃႇယူႇ။ ၵူၺ်းၵႃႈ ႁဝ်းလီၾၢင်ႉဢၼ်ၼိုင်ႈတႄႉ ပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈ ၸၢဝ်းၶိူဝ်းတႆး ဢၼ်ဝႃႈၼၼ်ႉ ယူႇတီႈ RCSS ၶွင်ႇသီႇ ဢဝ်ၶိုၼ်းၸိုင်ႈတႆး ၸုမ်းလဵဝ်ၵူၺ်း တေႁူမ်ႇလႆႈတင်းမူတ်း ဢၼ်ဝႃႈၼၼ်ႉတႄႉ ၽႂ်ၵေႃႈတေဢမ်ႇၸၢင်ႈမႃး ႁပ်ႉပၢၵ်ႇ (အာမခံ) ပၼ်လႆႈ” ဝႃႈၼႆ။
ၸဝ်ႈသိုၵ်း ၸၢႆးဢူး တႄႉလၢတ်ႈဝႃႈ – ယူႇတီႈ RCSS တႄႉ ၶႂ်ႈႁႂ်ႈ CSSU လႄႈသင်၊ ပႃႇတီႇၵၢၼ်မိူင်းလႄႈသင် သင်ပဵၼ် လႆႈ ႁဝ်းႁူမ်ႈၵၼ်သေ ႁဵတ်းတင်းမူတ်းၼႆ ယိုင်ႈၶႅၼ်းလီ။ လိူဝ်ၼၼ်ႉ ၶႂ်ႈဝႃႈတႄႉ ထိူၼ်ႇၵေႃႈ ယႃႇႁႂ်ႈလႅဝ် – ပၢင်တၢႆးၵေႃႈ ႁႂ်ႈလႆႈ မၢႆၵႂၢမ်းဝႃႈတႄႉ တႃႇၸိူဝ်ႉၶိူဝ်းႁဝ်းၵေႃႈႁႂ်ႈမၼ်းသၢင်ႇထုၵ်ႇ – ၸွမ်းၼင်ႇ သဵၼ်ႈတၢင်းငမ်းယဵၼ်ၵေႃႈ ႁႂ်ႈမၼ်းၵႂႃႇ လႆႈ” ဝႃႈၼႆ။
မိူဝ်ႈပီ 2017-18 ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး ယူႇတီႈလူင်ပွင်ၸိုင်ႈ တင်း တပ်ႉသိုၵ်းမၢၼ်ႈ ဢမ်ႇယွမ်းပၼ် ၸတ်းႁဵတ်းတီႈဝဵင်းလူင်တူၼ်ႈတီး တင်း ဝဵင်းပၢင်လူင်၊ ၽွမ်ႉၸွမ်းႁႂ်ႈၸတ်းႁဵတ်းတီႈ ဝဵင်းမိူင်းပၼ်ႇ ဢမ်ႇၼၼ် ဝဵင်း လၢင်းၶိူဝ်း ၊ ၵူၼ်းၶဝ်ႈႁူမ်ႈပၢင်ၵုမ်ၵေႃႈ တေဢမ်ႇႁႂ်ႈလိူဝ် 500 ၵေႃႉ။
ၵဵဝ်ႇၵပ်းလွင်ႈၼႆႉ ၼႂ်းၸုမ်းၼမ်းၵၢၼ်မိူင်းတႆးၵေႃႈ မိူၼ်တႅၵ်ႇငၢၵ်ႈဝႆႉသွင်ၾၢႆႇ။ ၾၢႆႇၼိုင်ႈသွၼ်ႇဝႃႈ တူၼ်ႈတီးၼႆႉ ပဵၼ် ငဝ်ႈၸိုင်ႈမိူင်းတႆး ပဵၼ်ၼႃႈတႃတႆးလႄႈ တိုၼ်းထုၵ်ႇလႆႈႁဵတ်းတီႈဝဵင်းတူၼ်ႈတီး။ တိူၵ်ႈတီႈသုတ်း ဢမ်ႇလႆႈႁဵတ်းတီႈဝဵင်း တူၼ်ႈတီးၵေႃႈ ႁႂ်ႈလႆႈၸတ်းတီႈဝဵင်းပၢင်လူင် တီႈၵိူတ်ႇပဵၼ်မႃး လိၵ်ႈႁူမ်ႈမၢႆ ပၢင်လူင် 1947 ။ ပေႃးဝူၼ်ႉဝႃႈ သွၼ်ႇႁႂ်ႈ ပဵၼ်ၵၢၼ်ၵူၺ်းတႄႉ ၵႂႃႇႁဵတ်းတီႈလွႆတႆးလႅင်းၶႅၼ်းလီ ဢမ်ႇတၢပ်ႈလူဝ်ႇတူၺ်းၼႃႈ ၽႂ်ဝႃႈၼႆ။
ၵူၺ်းၵႃႈ ၾၢႆႇၼိုင်ႈၵေႃႈ သမ်ႉဝႃႈ ႁဵတ်းတီႈ မိူင်းပၼ်ႇ ဢမ်ႇၼၼ် လၢင်းၶိူဝ်းၵေႃႈၸၢင်ႈပဵၼ်သင်၊ လူဝ်ႇႁဵတ်းႁႂ်ႈပဵၼ် ၵၢၼ်ငမ်းယဵၼ်ၵႂႃႇၵူၺ်းဝႃႈၼႆ ၸဵမ်ၽွင်းၼၼ်ႉ ပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈတႆး ဢၼ်ဢၢင်ႈၸတ်းႁဵတ်း ၽွင်းပီ 2017-18 ၼၼ်ႉ ၾၢႆႇလူင်ပွင်ၸိုင်ႈမၢၼ်ႈ သိုၵ်းမၢၼ်ႈ ၶတ်းၶႂၢင်ဝႆႉ လၢႆးၼိုင်ႈသေ ဢမ်ႇၵႃး ၼႂ်းတႆးၵေႃႈ ၸတ်ႉၵၼ်မႃး ၸဵမ်ၽွင်းၼၼ်ႉၼႆ ၸၢႆးၶမ်း ၵူၼ်းၼုမ်ႇတႆး ဢၼ်ၶဝ်ႈပႃး တူင်ႉၼိုင်ၸွမ်းၽွင်းၼၼ်ႉလၢတ်ႈၼင်ႇၼႆ။
