ၵၢၼ်ၵေႃႇသၢင်ႈလွင်ႈႁူမ်ႈ ဢၼ်လၢႆလၢႆၸုမ်းတႆးၼႂ်းၵဵင်းမႆႇ ၸတ်းပၢင်ႁူပ်ႉထူပ်းဢုပ်ႇၵိူဝ်းၵုမ်ၵၼ် လႆႈၸႂ်ၵေႃႇ တင်ႈ “ၵေႃႁူမ်ႈသၢင်ႈၸိူဝ်ႉၸၢတ်ႈတႆး” မိူဝ်ႈႁူပ်ႉၵၼ် ၵမ်းတီႈ 2 ၼႂ်းၸိူဝ်းႁူဝ်ၼႃႈလၢႆၸုမ်းၶဝ်ႈႁူမ်ႈ။

ဝၼ်းတီႈ 17/12/2017 (မိူဝ်ႈဝႃးၼႆႉ) ႁူဝ်ၼႃႈလႄႈလုၵ်ႈၸုမ်းလၢႆလၢႆၸုမ်း ႁူပ်ႉထူပ်းဢုပ်ႇၵုမ်ၵၼ် တီႈ ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ ပိူဝ်ႈၶဵၼ်ႇသၢင်ႈပၵ်းပိူင် တႃႇၵူႈမူႇၵူႈၸုမ်းလႆႈတိုဝ်းၵမ် တင်ႈတႄႇ 10.00 မူင်း တေႃႇထိုင်ၶၢဝ်းယၢမ်း 16.00 မူင်းသေတႃႉ တိုၵ်ႉလႆႈၸႂ်ၵၼ် ၼိူဝ်ၶေႃႈဢဵၼ်းဢၢၼ်းၸိူင်ႉၼင်ႇ – တႃႇၶဵၼ်ႇတႅမ်ႈပၵ်းပိူင်ၵေႃႁူမ်ႈသၢင်ႈၸိူတ်ႉၸၢတ်ႈတႆး – ၵမ်ႉထႅမ်ယုၵ်ႉယွင်ႈၾိင်ႈငႄႈလိၵ်ႈလၢႆး ပၢႆးပိုၼ်းတႆး ၵူႈပၢႆးပၢႆး – ၵမ်ႉထႅမ်ပၼ်ႁႅင်းလူၺ်ႈလၢႆးၽွင်းငမ်းၻီႊမွၵ်ႉၶရေႊၸီႇလႄႈမိူင်းႁူမ်ႈတုမ်ၸိုၼ်ႈၸၢင်ႇ – ၵမ်ႉထႅမ် ပၼ်ႁႅင်းၸွႆႈၸိူဝ်ႉၸၢတ်ႈ ၸိူဝ်းၼႆႉ။ လိူဝ်ၼၼ်ႉတွၼ်ႈၵၢၼ်ဢၼ်ဝႃႈ “လူလွမ်တူၺ်းထိုင်ပီႈၼွင်ႉႁႅင်းၵၢၼ်တႆး” ၼႆၼၼ်ႉ တေဝွၵ်ႇၸိူၼ်းၸုမ်းဢၼ်ၵဵဝ်ႇၶွင်ႈလႄႈႁူႉလွင်ႈၾၢႆႇႁႅင်းၵၢၼ်မႃးၸွႆႈဢွၼ်ၶပ်းၶိုင်-ဝႃႈၼႆ။

ၵဵဝ်ႇလူၺ်ႈလွင်ႈၵၢၼ်ငိုၼ်းၼၼ်ႉ လိူဝ်သေၾၢႆႇယိပ်းငိုၼ်း သၢႆမၢႆငိုၼ်း ႁပ်ႉငိုၼ်းၶဝ်ႈ ငိုၼ်းဢွၵ်ႇ ၵၢၼ်ၸႂ်ႉၸၢႆႇ ၸိူဝ်းၼၼ်ႉ 1 ၸုမ်းၶဝ်ႈပႃးၼႂ်းၼႃႈၵၢၼ်ၾၢႆႇလႂ် 1 ၵေႃႉ ။ လိူဝ်ၼၼ်ႉ ၸုမ်းၸိူဝ်းပဵၼ်ၸုမ်း တၵ်းတေလႆႈသႂ်ႇ ငိုၼ်းၵမ်ႉၸွႆႈၼႂ်းၵွင်ၵၢင် 1 ၸုမ်း 1000 ဝၢတ်ႇတေႃႇလိူၼ်လႄႈသူၼ်ႇၿုၵ်ႉၵလ(သူၼ်ႇတူဝ်) 1 ၵေႃႉ 360 ဝၢတ်ႇတေႃႇပီ။

ၵဵဝ်ႇၵပ်းၼႃႈတီႈပုၼ်ႈၽွၼ်းသမ်ႉ တင်းသူၼ်ႇၸုမ်းလႄႈသူၼ်ႇတူဝ် ၶဝ်ႈပႃးမီးသူၼ်ႇႁူမ်ႈႁဵတ်းသၢင်ႈလႄႈ လဝ်ႈယိုၼ်ႈပၢႆးဝူၼ်ႉ ဢိၵ်ႇတင်း ၵၢၼ်ထတ်းသၢင်လႆႈတဵမ်ထူၼ်ႈ။ ၵူၺ်းၵႃႈ ၸုမ်းမီးသူၼ်ႇဢွၵ်ႇသဵင်လႆႈ 1 ၸုမ်း 1 သဵင်။ ၿုၵ်ႉၵလ (သူၼ်ႇတူဝ်) ဢမ်ႇမီးသူၼ်ႇဢွၵ်ႇသဵင်။

ၵဵဝ်ႇၵပ်းလွင်ႈတႃႇၶဵၼ်ႇတႅမ်ႈပၵ်းပိူင်ၼၼ်ႉ ၼင်ႇႁိုဝ်တေၶိုၵ်ႉၶႅမ်ႉလႅပ်ႈၵိုင်ႇတၢင်းၼႃႈၵၢၼ်တေႁဵတ်းလႆႈၵေႃႈ ထုၵ်ႇလီလႆႈဝူၼ်ႉထတ်းထီႇထူၼ်ႈလႄႈ လဵပ်ႈႁဵၼ်းပၵ်းပိူင် လၢႆးတႅမ်ႈလၢႆးႁဵတ်းလၢႆလၢႆတီႈသေ ၸင်ႇမႃး ၶဵၼ်ႇတႅမ်ႈ တေလီၼႆယဝ်ႉ။

ၵေႃႁူမ်ႈသၢင်ႈၸိူဝ်ႉၸၢတ်ႈတႆးၼႆႉလႆႈတႄႇႁဵတ်းပၢင်ဢုပ်ႇၵိူဝ်းၵုမ်ၵၼ်မႃးမိူဝ်ႈၸုမ်းၸၢဝ်းၶိူဝ်းတႆးတင်းၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ ၸတ်းႁဵတ်းမိူဝ်ႈဝၼ်းတီႈ 22/10/2017 တီႈၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇသေ ဝၼ်းတီႈ 26/11/2017 ႁူဝ်ၼႃႈၸုမ်းၵူႈၸုမ်းၸုမ်း ၶိုတ်းၽတ်းၼတ်ႉမႃးဢုပ်ႇၵိူဝ်းၵုမ်ၵၼ်ယဝ်ႉ လႆႈၸႂ်တင်ႈၸိုဝ်ႈ ၾၢႆႇတႆး “ၵေႃႁူမ်ႈသၢင်ႈၸိူဝ်ႉၸၢတ်ႈတႆး (ၵသၸတ)”” ၾၢႆႇထႆး “เครือข่ายสร้างสรรค์ชนชาติไตย (คสชต)” ဢင်းၵိတ်း ” Tai National Partnership Constructive Engagement(TNPCE)” လႄႈၶိုၼ်းၽတ်းၼတ်ႉမၢႆပၢင်ၵုမ်ၼႂ်းဝၼ်းတီႈ 17/12/2017 ပိူဝ်ႈဢုပ်ႇလွင်ႈ ၶဵၼ်ႇတႅမ်ႈပၵ်းပိူင် ၵေႃႁူမ်ႈသၢင်ႈ ၸိူဝ်ႉၸၢတ်ႈတႆး ၼႆႉယဝ်ႉ။