ပလိၵ်ႈထႆးတီႈၶူဝ်မိုတ်ႈၵိုဝ်းမၢႆ 1 တႃႈၶီႈလဵၵ်း-မႄႈသၢႆ( လႅၼ်လိၼ်တႆး – ထႆး) ၵူတ်ႇထတ်းတီႉလႆႈ ယႃႈမႃႉ 1 မိုၼ်ႇမဵတ်ႉ ပၢႆလႄႈ ယႃႈ ဢႆႊသ် 400 ၵရမ်ႇ တီႈၵူၼ်းထႆး 2 ၵေႃႉ။
ဝၼ်းတီႈ 17/7/2019 ယၢမ်းၵၢင်ၼႂ် 9 မူင်း ၽူႈၸၢႆး 2 ၵေႃႉ ပဵၼ်ၸၢဝ်းထႆး ဢႃယု 19 ပီ လႄႈ 30 ပီ လၵ်ႉတေႃႉယႃႈမဝ်းၵမ် တၢင်းၾင်ႇတႃႈၶီႈလဵၵ်းသေ တေဢဝ်ၵႂႃႇတၢင်းၾင်ႇထႆးၼၼ်ႉ ၺႃးၸဝ်ႈၼႃႈတီႈပလိၵ်ႈ ၵူတ်ႇထတ်းတီႉလႆႈ တီႈၶူဝ်မိုတ်ႈ ၵိုဝ်းမၢႆ 1 တႃႈၶီႈလဵၵ်း – မႄႈသၢႆ(လႅၼ်လိၼ်တႆး – ထႆး) ဝႃႈၼႆ။
ၶၢဝ်ႇ Chiang Rai Report တႅမ်ႈဝႆႉတႄႉ “ ၽူႈၸၢႆး သွင်ၵေႃႉၼႆႉ ယူႇတီႈၸႄႈတွၼ်ႈၽယဝ်း ၸိုင်ႈထႆးတွၼ်ႈၼိူဝ်။ မိူဝ်ႈၶဝ်လုၵ်ႉတၢင်းတႃႈၶီႈလဵၵ်း ပႆၶဝ်ႈမႃးၾင်ႇထႆးၼၼ်ႉ ၸဝ်ႈၼႃႈတီႈထႆးၶဝ်လႆႈၵူတ်ႇထတ်းႁၼ်ယႃႈမဝ်းၵမ် ၼႂ်းသွၵ်းတိၼ်ၶဝ်” ဝႃႈၼႆ။
ယႃႈမဝ်းၵမ် ဢၼ်ပႃးမႃးၼႂ်းသွၵ်းတိၼ်ၶဝ်သွင်ၵေႃႉၼၼ်ႉပဵၼ် ယႃႈမႃႉ 11,000 မဵတ်ႉ။ ယႃႈဢႆႊသ် 400 ၵရမ်ႇ ဝႃႈၼႆ။
ၼႂ်းၶၢဝ်းၶိဝ်းဝူင်ႈဝၢင်ႈၼႆႉ ၼႂ်းၸႄႈဝဵင်းတႃႈၶီႈလဵၵ်း ၵႆႉတီႉလႆႈ ၵူၼ်းၸၢဝ်းထႆး ၵဵဝ်ႇလူၺ်ႈလွင်ႈယႃႈမဝ်းၵမ်လႄႈ ၶိူင်ႈၵွင်ႈ ၵၢင်ႇ ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ