ၵူၼ်းမိူင်းတူၼ်ႈတီး ႁူမ်ႈၵၼ်ပႆတၢင်းၼႄၵၢင်ၸႂ် ၵမ်ႉထႅမ်တႃႇမူၼ်ႉ မႄးပိူင်ငဝ်ႈပိုင်းမိူင်း 2008 မိူဝ်ႈၼႆႉ ဝၼ်းတီႈ 17/7/2019 ယၢမ်းၵၢင်ၼႂ် 10 မူင်း တႄႇပႆ တီႈဝတ်ႉ/ ၵျွင်းမိၼ်း(မင်းကျောင်း) ထိုင် သူၼ်ႇမွၵ်ႇၵၢင်ဝဵင်း ၼႂ်းၸႄႈဝဵင်းတူၼ်ႈ တီး ၸိုင်ႈတႆးပွတ်းၸၢၼ်း။

ၵူၼ်းမိူင်းဢၼ်မႃးၶဝ်ႈႁူမ်ႈၵမ်ႉထႅမ်ပႆၸွမ်းသမ်ႉ တင်းမူတ်း မီး 300 ပၢႆ ၵမ်ႈၼမ်ပဵၼ်ပီႈၼွင်ႉတၢင်းၵၢတ်ႇလေႃႉ၊ တူၼ်ႈ တီး ၸဵမ်ၸိူဝ်းၼႆႉ ဝႃႈၼႆ။

ၵူဝ်ႇဝိၼ်းၼၢႆႇသူဝ်း ၽူႈဢွၼ်ႁူဝ်ပၢင်ၵမ်ႉထႅမ် ၼႂ်းၶွမ်ႊမတီႊ ၸုမ်းၼႅင်ႈသၢၼ် ၾၢႆႇပၵ်းပိူင် လၢတ်ႈတီႈၽူႈတွႆႇႁွၵ်ႈဝႃႈ “ ပိူင်ငဝ်ႈပိုင်းမိူင်း 2008 ၼၼ်ႉ ၶဵၼ်ႇတႅမ်ႈဝႆႉလူၺ်ႈ ဢမ်ႇပႃးသဵင်ၵၢင်ၸႂ်ၵူၼ်းမိူင်း။ တေႃႈလဵဝ်ၼႆႉ တွၼ်ႈတႃႇတေမူၼ်ႉ မႄးၼႆႉ ယူႇတီႈတၢင်းၾၢႆႇသၽႃးၵေႃႈတိုၵ်ႉၶတ်းၸႂ်ယူႇ ႁဝ်းၶႃႈၵူၼ်းမိူင်းတၢင်း တူၼ်ႈ တီးၼႆႉ ယွၼ်ႉဝႃႈ သူၼ်ၸႂ်ၶဝ်ႈၸႂ် တႃႇတေမူၼ်ႉမႄးပိူင်ငဝ်ႈပိုင်းမိူင်းၼႆသေ ၸင်ႇႁူမ်ႈၵၼ် ၸတ်းႁဵတ်းမႃးပၢင်ၵမ်ႉ ထႅမ်ၼႆႉ” ဝႃႈၼႆ။

ပူၼ်ႉမႃး မိူဝ်ႈပီ 2015 ၼၼ်ႉ ယူႇတီႈ NLD ပၼ်ၵႂၢမ်းမၼ်ႈဝႆႉ မိူဝ်ႈလူင်းႁႃသဵင်ၼၼ်ႉဝႃႈ ပေႃးပဵၼ်လူင်ပွင်ၸိုင်ႈမႃး တေ မူၼ်ႉမႄး ပိူင်ငဝ်ႈပိုင်းမိူင်း 2008 ၼႆ။ တေႃႈလဵဝ် ပဵၼ်လူင်ပွင်ၸိုင်ႈမႃး ၶၢဝ်းတၢင်း 3 ပီပၢႆယဝ်ႉ ပႆႇႁၼ်မူၼ်ႉမႄးသင် ဝႃႈ ၼႆ။

ၵူဝ်ႇၼၼ်ႇတႃႇၵျႄႇၸိၼ်ႇ ၽူႈၶဝ်ႈႁူမ်ႈၶွမ်ႊမတီႊဢွၼ်ႁူဝ် ပၢင်ၵမ်ႉထႅမ်ၼႆႉ လၢတ်ႈတီႈၽူႈတွႆႇႁွၵ်ႈဝႃႈ “ ႁူႉၵၼ်ယူႇၵူႈ ၵေႃႉၶႃႈယဝ်ႉ ပိူင်ငဝ်ႈပိုင်းမိူင်း 2008 ၼႂ်းမိူင်းမၢၼ်ႈၼႆႉ တႃႇတေမူၼ်ႉမႄးၼႆႉ ပဵၼ်ဢၼ်ယၢပ်ႇတီႈသုတ်း ၼႂ်းလုမ်ႈၾႃႉ။ လႆႈၶတ်းၸႂ်ဢဝ်ၶၢဝ်းယၢမ်းသေ မူၼ်ႉမႄးၵႂႃႇ။ တေႃႈလဵဝ် တႃႇတေမူၼ်ႉမႄးၼႂ်းသၽႃးမိူင်းႁူမ်ႈ တုမ်ၼႆႉ လႆႈၶွတ်ႇၽွတ်ႈ ဝႆႉ ၶွမ်ႊမတီႊ 45 ၵေႃႉ။ ၼင်ႇႁိုဝ် ၶဝ်ၸဝ်ႈပေႃးတေမူၼ်ႉမႄးပိူင်ငဝ်ႈပိုင်းမိူင်းလႆႈဝႆးဝႆးၼၼ်ႉ ႁဝ်းၶႃႈ ယူႇတီႈၵူၼ်းမိူင်း ထုၵ်ႇလီၵမ်ႉထႅမ်ပၼ်ႁႅင်းၶဝ်။ ၵွပ်ႈၼၼ်လႄႈ လႆႈႁဵတ်းပၢင်ၵမ်ႉထႅမ်ၼႄၵၢင်ၸႂ်” ဝႃႈၼႆ။

ပၢင်ၼႄၵၢင်ၸႂ် ၵူၼ်းမိူင်းၵမ်ႉထႅမ် တႃႇမူၼ်ႉမႄးပိူင်ငဝ်ႈပိုင်းမိူင်း 2008 ၼႆႉ ၵဵဝ်ႇၵပ်းလွင်ႈၼႆႉ မိူဝ်ႈပီ 2019 လိူၼ်မၢတ်ႊၶျ် ၼၼ်ႉၵေႃႈ ၵူၼ်းမိူင်းႁူမ်ႈၵၼ်ပႆၼႄၵၢင်ၸႂ် ၵမ်ႉထႅမ်မႃးယဝ်ႉၵမ်းၼိုင်ႈ။ ၵမ်းၼႆႉ ပဵၼ်ပၢင်ၼႄၵၢင်ၸႂ် ထႅင်ႈၵမ်းၼိုင်ႈ တင်းမူတ်းႁူမ်ႈၵၼ် ပဵၼ် 2 ပွၵ်ႈယဝ်ႉ ဝႃႈၼႆ။

ပၢင်ၼႄၵၢင်ၸႂ်ၼႆႉ လိူဝ်သေတီႈဝဵင်းတူၼ်ႈတီးယဝ်ႉ တီႈၸႄႈဝဵင်းတႃႈၶီႈလဵၵ်း၊ ယွင်ႁူၺ်ႈ ၸဵမ်ၸိူဝ်းၼႆႉၵေႃႈၸတ်းႁဵတ်း ပႃး ဝႃႈၼႆ။