ၽူႈၸၢႆး ၵေႃႉၼိုင်ႈ ဢႃယု မွၵ်ႈ 40 ပီပၢႆ ၺႃးယိုဝ်းတၢႆ ၼႂ်းပွၵ်ႉႁူဝ်မူၼ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ဝၼ်းတီႈ 16/7/2019 ယၢမ်းၵၢင်ၼႂ်မွၵ်ႈ 11 မူင်းၶိုင်ႈ ၽူႈၸၢႆးၵေႃႉၼိုင်ႈ ဢႃယုမွၵ်ႈ 40 ပီပၢႆ ၺႃးၸုမ်းဢမ်ႇႁူႉၾၢႆႇ ယိုဝ်းတၢႆ ၼႂ်းပွၵ်ႉႁူဝ်မူၼ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၺႃးယိုဝ်းဢမ်ႇယွမ်း 7 ႁွႆး ဝႃႈၼႆ။
ဢူးတွင်းထုၼ်း ၸုမ်းၵရုၼႃႇၾၢႆႇၸွႆႈထႅမ်ပၢႆးပိူင်ၵူၼ်း မူႇၸေႊ လၢတ်ႈတီႈၵေႃသိုဝ်ႇၶၢဝ်ႇၽူႈတွႆႇႁွၵ်ႈဝႃႈ “ ၽူႈၸၢႆး ဢၼ် ၺႃးယိုဝ်းတၢႆၼၼ်ႉ လႆႈတိူဝ်ႉၺႃးမၢၵ်ႇၵွင်ႈ တီႈၵွင်ႇၵေႃႈ 4 ၵမ်း၊ တီႈမိုဝ်း 1 ၵမ်း၊ တီႈၶႃ 1 ၵမ်းလႄႈ တီႈပုမ် 1 ၵမ်း။ ၽူႈ ၸၢႆးဢၼ်လူႉတၢႆၼၼ်ႉ ပဵၼ်ၵူၼ်းၸၢဝ်းၶႄႇ” ဝႃႈၼႆ။
ၽူႈၸၢႆးဢၼ်ၺႃးယိုဝ်းတၢႆၼၼ်ႉ တေႃႈလဵဝ် လႆႈဢဝ်ၶၢပ်ႈတူဝ်သူင်ႇၵႂႃႇဝႆႉတီႈႁူင်းယႃ မူႇၸေႊဝႆႉယဝ်ႉ။
ၵဵဝ်ႇၵပ်းလူၺ်ႈ ပိူင်ပဵၼ်ၵၢၼ်ယိုဝ်းၵၼ်တၢႆၼႆႉ ၼၢင်းယိင်းၵေႃႉၼိုင်ႈ ဢၼ်ယူႇတီႈပွၵ်ႉႁူဝ်မူၼ်ႇ လၢတ်ႈဝႃႈ “ မီးၵူၼ်း ၼုမ်ႇ 2 ၵေႃႉ ၶီႈၵႃးမႃးသေ မႃးယိုဝ်း ပဵၼ်ၽႂ်ၵေႃႈဢမ်ႇႁူႉၸၵ်း။ ၽူႈတၢႆၼႆႉၵေႃႈ မီးပၼ်ႁႃၵၼ်တင်းၸုမ်းလႂ် ဢၼ်ဝႃႈ ၼၼ်ႉၵေႃႈ ဢမ်ႇလႆႈႁူႉ” ဝႃႈၼႆ။
ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ ၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင်ၵႂႃႇမႃးၵေႃႈၼမ်၊ ၸုမ်းပျီႇတူႉၸိတ်ႉ ၵေႃႈၼမ်။ ယွၼ်ႉၼၼ်လႄႈ ၵႆႉမီးလွင်ႈပိုတ်းယိုဝ်းၶႃႈႁႅမ်ၵၼ်တၢႆ၊ လၵ်ႉ၊ ၸူၼ်ၵၼ်ၵေႃႈၼမ် ဝႃႈၼႆ။
လိူဝ်ၼၼ်ႉ ယွၼ်ႉဝႃႈ ပဵၼ်မိူင်းဢၼ်တိတ်းၸပ်းလႅၼ်လိၼ်တႆး – ၶႄႇ ၵေႃႈၸႂ်ႈသေ လွင်ႈသိုဝ်ႉၶိူင်ႈလၢၵ်ႈၼၢၵ်ႈ ၵွင်ႈ ၵၢင်ႇၵေႃႈငၢႆႈ။ ယႃႈမဝ်းၵမ်ၵေႃႈ သိုဝ်ႉၶၢႆၵၼ်ငၢႆႈ ပၢင်တေႃႇလွင်းၵေႃႈၼမ်။
