မိူင်းUSA ဢမေႊရိၵၼ်ႊပိုၼ်ၽၢဝ်ႇ တေဢဝ်တၢင်းၽိတ်း ၽူႈၼမ်းသိုၵ်းမၢၼ်ႈသုင်သုတ်း မိၼ်းဢွင်ႇလၢႆႇလႄႈ ၽူႈၵဵဝ်ႇၶွင်ႈလၢႆၵေႃႉ ၼႂ်းတၢင်းၽိတ်း ပူၼ်ႉပႅၼ်သုၼ်ႇလႆႈၵူၼ်း ၸၢဝ်းရူဝ်ႊႁိၼ်ႊၵျႃႊ ။

ဝၼ်းတီႈ 17/07/2019 သိုဝ်ႇၶၢဝ်ႇ Reuters ပိုၼ်ၽၢဝ်ႇဝႃႈ –  ယူႇတီႈၽွင်းလူင်ၾၢႆႇၼွၵ်ႈမိူင်း မိူင်းUS Mr. Mike Pompeo  သေ ပိုၼ်ၽၢဝ်ႇတေပၼ်တၢင်းၽိတ်း ၸွမ်သိုၵ်းလူင်မိၼ်းဢွင်ႇလၢႆႇ  ၸွမ်ၸိၵ်းသိုၵ်းမၢၼ်ႈ ၊ ၸွမ်သိုၵ်းလူင်   သူဝ်းဝိၼ်း ၵႅမ်ၽူႈၵွၼ်းသိုၵ်းသုင်သုတ်းမၢၼ်ႈ၊ ၸွမ်ႁၢၼ်တၢၼ်းဢူးလႄႈ ၸွမ်ႁၢၼ်ဢွင်ႇဢွင်ႇ ဢိၵ်ႇၵူၼ်းၼႂ်း မုင်ႉ ႁေႃႁိူၼ်း – ၼႂ်းတူတ်ႈတၢမ်ႇ ဢမ်ႇႁပ်ႉပုၼ်ႈၽွၼ်းလွင်ႈ ဢၼ်သိုၵ်းလူင်ပွင်ၸိုင်ႈမၢၼ်ႈ ပူၼ်ႉပႅၼ် ၶႃႈႁႅမ်ၸၢဝ်းၶိူဝ်းရူဝ်ႊ ႁိၼ်ႊၵျႃႊ ၼႂ်းၸႄႈမိူင်းရၶႅင်ႇ  ဝႃႈၼႆ ။

Mr. Mike Pompeo ၽွင်းလူင်ၾၢႆႇၼွၵ်ႈမိူင်း မိူင်း US လၢတ်ႈဝႃႈ “ႁဝ်းၶႃႈမီးလွင်ႈမႆႈၸႂ် ဢၼ်သိုၵ်းလူင်ပွင်ၸိုင်ႈမၢၼ်ႈ ဢမ်ႇလၢတ်ႈ ဢမ်ႇႁပ်ႉပုၼ်ႈၽွၼ်းသင် ၵဵဝ်ႇလူၺ်ႈဢၼ်သိုၵ်းတပ်ႉမတေႃႇ  ပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းၸၢဝ်း ရူဝ်ႊ ႁိၼ်ႊၵျႃႊ ၼႂ်းၸႄႈမိူင်းရၶႅင်ႇ” ဝႃႈၼႆ။

ၼႂ်းမိူင်းႁူမ်ႈတုမ်မျႅၼ်ႇမႃႇ ၼႆႉ တင်ႈတႄႇလူင်ပွင်ၸိုင်ႈၸုမ်းၼူၵ်ႉယုင်း NLD ဢၼ်ဢွင်ႇသၢၼ်းၸူႉၵျီႇ ဢွၼ်ႁူဝ်  ၽွင်းငမ်းဝၢၼ်ႈမိူင်း 2016 မႃးၼႆႉ ဢိင်ၼိူဝ်ၸၢဝ်းၶိူဝ်းရူဝ်ႊႁိၼ်ႊၵျႃႊ သၢင်ႈလွင်ႈဢမ်ႇၼိမ်သဝ်းၼႂ်းပိုၼ်ႉတီႈ မီးလွင်ႈ ပိုတ်းယိုဝ်း ၶဝ်ႈလမ်တပ်ႉပၢင်သဝ်းသိုၵ်း၊ ႁူင်းပလိၵ်ႈၼႂ်းမိူင်းရၶႅင်ႇၸိူဝ်းၼႆႉသေ ၾၢႆႇၸဝ်ႈၼႃႈတီႈမၢၼ်ႈ မီးလွင်ႈပူၼ်ႉပႅၼ်သုၼ်ႇလႆႈၵူၼ်း တေႃႇၸၢဝ်းၶိူဝ်းရူဝ်ႊႁိၼ်ႊၵျႃႊႁၢဝ်ႈႁႅင်း၊ ႁဵတ်းႁႂ်ႈၸၢဝ်းၶိူဝ်းရူဝ်ႊႁိၼ်ႊၵျႃႊ လႆႈပၢႆႈဢွၵ်ႇမိူင်းၵႂႃႇပိုင်ႈယူႇသဝ်း ၼႂ်းမိူင်းၿင်ႊၵလႃႊၻဵတ်ႊသျ် ၼပ်ႉႁူဝ်မိုၼ်ႇႁူဝ်သႅၼ် တေႃႇထိုင်ယၢမ်း လဵဝ်ပၼ်ႁႃပႆႇယဝ်ႉပႆႇတူဝ်ႈ ။