သိုဝ်ႇၶၢဝ်ႇထႆး ဢွၵ်ႇဝႆႉဝႃႈ တီႉလႆႈယႃႈမႃႉမွၵ်ႈ 5 လၢၼ်ႉမဵတ်ႉ ၸွမ်းလႅၼ်လိၼ် တႆး – ထႆး ၼႂ်းၸႄႈတွၼ်ႈ ၵဵင်းမႆႇ ဝႃႈၼႆ။
ဝၼ်းတီႈ 10/7/2019 ယၢမ်းၵၢင်ၶိုၼ်းမွၵ်ႈ 11 မူင်းၼၼ်ႉ ၸုမ်းပလိၵ်ႈဢဝ်ႁူမ်ႇလူမ်ႈလႅၼ်လိၼ်ထႆး တင်း ၸုမ်းတေႃႉ သူင်ႇၵႃႉယႃႈလႆႈမီးၵၢၼ်ပိုတ်းယိုဝ်းၵၼ် ၼႂ်းၵႄႈမိူင်းတူၼ် တင်း မႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆး။ လႆႈပိုတ်းယိုဝ်း ၵၼ် တင်းႁိုင်မွၵ်ႈ 5 မိၼိတ်ႉသေ ၵူၼ်းတေႃႉသူင်ႇၵႃႉယႃႈၼၼ်ႉ တၼ်းပၢႆႈလွတ်ႈ။ ၵူၺ်းတၼ်းတီႉလႆႈယႃႈမႃႉတင်းၼမ် 5 လၢၼ်ႉမဵတ်ႉ ဝႃႈၼႆ။
တီႈသိုဝ်ႇၶၢဝ်ႇထႆး ဢွၵ်ႇဝႆႉတႄႉ ၵဵဝ်ႇၵပ်းလွင်ႈပိုတ်းယိုဝ်းၵၼ်ၼႆႉ တၢင်းၾၢႆႇပလိၵ်ႈထႆး ဢမ်ႇမီးလွင်ႈမၢတ်ႇၸဵပ်းသင်၊ ၵူၺ်းၵႃႈ တၢင်းၾၢႆႇၵူၼ်းၵႃႉယႃႈၼၼ်ႉတႄႉ မီးလွင်ႈမၢတ်ႇၸဵပ်းၵမ်ႈၽွင်ႈယူႇ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းပလိၵ်ႈဢဝ်ႁူမ်ႇလူမ်ႈၸွမ်းလႅၼ်လိၼ်ထႆး တီႉလႆႈယႃႈမႃႉ 5 လၢၼ်ႉမဵတ်ႉလႄႈ ယႃႈဢႆႊသ် 10 ၵီႊလူဝ်ႊလႄႈ ၵႅတ်ႉတမိၼ်ႇ 10 ၵီႊလူဝ်ႊ။ ၵူၺ်းၵႃႈ ဢမ်ႇတီႉလႆႈ ၵူၼ်းၵႃႉၶၢႆ လၵ်ႉတေႃႇသူင်ႇ ဝႃႈၼႆ။