ႁိူၼ်းၵူၼ်းဝၢၼ်ႈလင်ၼိုင်ႈ ၼႂ်းမူႇၸေႊ ၺႃးၵူၼ်းဢဝ်မၢၵ်ႇပွႆႇသႂ်ႇ ၼႂ်းဝၢင်းႁိူၼ်းမၢၵ်ႇတႅၵ်ႇလွင်ႈလူႉတၢႆမၢတ်ႇၸဵပ်း ဢမ်ႇ မီး။
ဝၼ်းတီႈ 14/7/2019 ယၢမ်းၵၢင်ၶမ်ႈ 8 မူင်းၶိုင်ႈၼၼ်ႉ မီးၵူၼ်းဢမ်ႇႁူႉၸၵ်းဢဝ်မၢၵ်ႇပွႆႇသႂ်ႇ ႁိူၼ်းလုင်းဢၢႆႈလႄႈ ပႃႈသွႆႈ ၶမ်း မၢၼ်ႈတူၼ်ႈ ႁုင်းၶဵဝ် မူႇမၢၼ်ႈတိုင်း ၸႄႈဝဵင်းမူႇ ၸေႊ ၸိုင်ႈတႆးပွတ်းႁွင်ႇ။
ၵူၼ်းႁိူၼ်းလုင်းဢၢႆႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မၢၵ်ႇတႅၵ်ႇလုၵ်ႈၼိုင်ႈ။ တႅၵ်ႇၼႂ်းဝၢင်းႁိူၼ်း တီႈ ႁိမ်းသိုင်ႇၽိုၼ်း၊ မၢၵ်ႇတႄႉ မၼ်းတေပဵၼ်မၢၵ်ႇဢၼ်ယႂ်ႇ ဢၼ်လူင်တႄႉ ဢမ်ႇၸႂ်ႈ၊ မၼ်းတေပဵၼ်မၢၵ်ႇပွႆႇပႃႁိုဝ် မၢၵ်ႇ မဵဝ်းႁိုဝ် တႄႉဢမ်ႇလႆႈႁူႉ။ ယဝ်ႉၵေႃႈ မၢၼ်ႇၽၵ်းတူပွင်ႇၸိူဝ်းၼႆႉၵေႃႈ တႅၵ်ႇၵမ်ႈၽွင်ႈ။ လွင်ႈမၢတ်ႇၸဵပ်းလူႉတၢႆတႄႉ ဢမ်ႇမီးသင်” ဝႃႈၼႆ။
ႁိူၼ်းလုင်းဢၢႆႈၼႆႉ မိူဝ်ႈဝၼ်းတီႈ 4/5/2019 ၼၼ်ႉ မီးၵူၼ်းၶဝ်ႈမႃးယိုဝ်းၼႂ်းဝၢင်းႁိူၼ်းယေးၵမ်းၼိုင်ႈယဝ်ႉ လွင်ႈမၢတ်ႇ ၸဵပ်း လူႉတၢႆတႄႉ ဢမ်ႇမီး ဝႃႈၼႆ။
ၵူၼ်းႁိူၼ်းလုင်းၸၢႆး လၢတ်ႈဝႃႈ“ ႁဵတ်းၼႆၶႃႈဢေႃႈ လုၵ်ႈယိင်း လုင်းဢၢႆႈ တင်း လုၵ်ႈၶူၺ်ၶဝ် မီးလွင်ႈၽိတ်းမေႃး လွင်ႈ ပၼ်ႁႃၼႃႈႁိူၼ်းသေ ၵေႃႉပဵၼ်လုၵ်ႈၶူၺ် လႅပ်ႈဢမ်ႇမီးလွင်ႈႁၢၼ်ႉၸႂ်ႁႃႉ လွင်ႈၸိူင်ႉႁိုဝ် ဢၼ်ဝႃႈၼၼ်ႉ ႁဝ်းၶႃႈ ၵေႃႈ ဢမ်ႇလႆႈႁူႉလီ မိူဝ်ႈဝၼ်းတီႈ 4/5/2019 ၼၼ်ႉ မၼ်းၸၢႆးဢဝ်ၵွင်ႈသေ ၶဝ်ႈမႃး ယိုဝ်းၼႂ်းဝၢင်းႁိူၼ်း ယဝ်ႉၵမ်းၼိုင်ႈ။ မိူဝ်ႈ ဝၼ်းတီႈ 14/7/2019 ၼႆႉသမ်ႉ မၢၵ်ႇမႃးတႅၵ်ႇၼႂ်းဝၢင်းႁိူၼ်း။ လွင်ႈၼႆႉတႄႉ လႅပ်ႈတေပဵၼ်မၼ်းၸၢႆးၵူၺ်းႁိုဝ် ဢၼ်ဝႃႈ ၼၼ်ႉ ႁဝ်းၶႃႈၵေႃႈ ပႆႇယိုၼ်ယၼ်လႆႈတႄႉတႄႉ” ဝႃႈၼႆ။
“လွင်ႈၸိူင်ႉၼႆတႄႉ ႁဝ်းၶႃႈ ၵူၼ်းဝၢၼ်ႈ ၵူၼ်းယူႇႁိမ်းႁွမ်းတႄႉ ပဵၼ်ဢၼ်မႆႈၸႂ်၊ ၵူဝ်ၵၼ်ၶႃႈဢေႃႈ ယူႇလၢႆလၢႆၸိူင်ႉၼႆ မီးၵူၼ်းဢဝ်မၢၵ်ႇမႃးပွႆႇသႂ်ႇႁဵတ်းၼႆ လွင်ႈၼႆႉ မၼ်းဢမ်ႇလီပဵၼ် ဢမ်ႇလီႁဵတ်းၶႃႈ။ လုင်းဢၢႆႈၼႆႉ ပဵၼ်ပေႃႈၼၢင်းသႅင်ပဝ်း၊ ၸၢႆးလႃႉ (ၼွင်ႁဵၼ်)သမ်ႉ ပဵၼ်လုၵ်ႈၶူၺ် ၵဵဝ်ႇၵပ်းလွင်ႈၼႆႉ ယွၼ်ႉပဵၼ်လွင်ႈၼႃႈႁိူၼ်းယေးလႄႈ ႁဵတ်းႁိုဝ်လႄႈၼႃႈ ႁိူၼ်း ၼၢင်းသႅင်ပဝ်း တင်း ၸၢႆးလႃႉ ယၢႆႈၵၼ် ဢၼ်ဝႃႈၼၼ်ႉ ႁဝ်းၶႃႈ ဢမ်ႇလႆႈႁူႉၸွမ်းတၢင်းမၼ်းလီ” ၵူၼ်းမၢၼ်ႈတူၼ်ႈ ႁုင်းၶဵဝ် ၵေႃႉ ၼိုင်ႈတႄႉ လၢတ်ႈၼႄၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ