ၾၢႆႇၸတ်းႁႃၵၢၼ်ၵဵင်းမႆႇၾၢင်ႉ ၸၢင်ႈႁႅင်းၵၢၼ်ၽိတ်းမၢႆမီႈ ၸၢင်ႈၺႃးမႂ်ငိုၼ်းၼမ်ထိုင်2 သႅၼ်လႄႈ တူၵ်းၶွၵ်ႈ ထိုင် 3 ပီ။

ဝၼ်းတီႈ 11/07/2019 သိုဝ်ႇၶၢဝ်ႇၵဵင်းမႆႇ ပိုၼ်ၽၢဝ်ႇဝႃႈ ႁွင်ႈၵၢၼ်ၾၢႆႇၸတ်းႁႃၵၢၼ်ၵဵင်းမႆႇလႄႈ ၸဝ်ႈၼႃႈတီႈၾၢႆႇၵဵဝ်ႇ  ၶွင်ႈ လူင်းပိုၼ်ႉတီႈၵူတ်ႇထတ်းပၼ်တူတ်ႈတၢမ်ႇ ပေႃႈလဵင်ႉမႄႈလဵင်ႉဢၼ်ၸၢင်ႈႁႅင်းၵၢၼ်ၽိတ်းမၢႆမီႈ 11 ၵေႃႉလႄႈ တီႉ ၺွပ်းႁႅင်းၵၢၼ်ၶဝ်ႈမိူင်းၽိတ်းပၵ်းပိူင်မၢႆမီႈ 60 ပၢႆ ။

ၾၢႆႇၸတ်းႁႃၵၢၼ်လၢတ်ႈဝႃႈ – “ ယွၼ်းၾၢင်ႉတိူၼ်ထိုင်ပေႃႈလဵင်ႉမႄႈလဵင်ႉ သင်ၸၢင်ႈၵူၼ်းဢမ်ႇမီးဝတ်းဝႂ် ဢမ်ႇၼၼ်ႁႂ်ႈႁႅင်းၵၢၼ်ႁဵတ်းၵၢၼ်လိူဝ်သေဢၼ်မၵ်းမၼ်ႈဝႆႉၼႂ်းဝႂ်ၼႆၸိုင် တေၺႃးမႂ်ငိုၼ်း 10,000 – 100,000 ဝၢတ်ႇ သင်ႁဵတ်းၽိတ်းယဝ်ႉႁဵတ်းၽိတ်းထႅင်ႈၼႆၸိုင် ၸၢင်ႈၺႃးတူၵ်းၶွၵ်ႈ 1 ပီ မႂ်ငိုၼ်း 50,000 – 200,000 ဝၢတ်ႇ ဢမ်ႇၼၼ် တင်းတူၵ်းၶွၵ်ႈ တင်းၺႃးမႂ်ငိုၼ်းလႄႈ ႁၢမ်ႈဢမ်ႇႁႂ်ႈၸၢင်ႈႁႅင်းၵၢၼ်တႃႇၶၢဝ်းတၢင်း 3 ပီ။ ႁႅင်းၵၢၼ်သမ်ႉ သင်ဢမ်ႇမီးဝတ်းဝႂ်သင်သေ ႁဵတ်း ၵၢၼ်ၸိုင်ၸၢင်ႈၺႃးမႂ်ငိုၼ်း5,000 – 50,000 ဝၢတ်ႇ ” ဝႃႈၼႆ။

ၼင်ႇႁိုဝ်ၵူၼ်းမိူင်းႁူမ်ႈတုမ် တေၶဝ်ႈမိူင်းထုၵ်ႇမႅၼ်ႈၸွမ်းၼင်ႇမၢႆမီႈလႄႈ ဢမ်ႇတူၵ်းပဵၼ်ယိူဝ်ႇ ၵူၼ်းၵႃႉၵူၼ်းၼၼ်ႉ မိူဝ်ႈဝၼ်းတီႈ 08/07/2019 ၸွမ်သိုၵ်းလူင်ၾၢႆႇပလိၵ်ႈ ၶျၶျ်ႊၶျႆႊ သမ်ႊၼဵင်ႊ လဝၵထႆးလႄႈ ၸွမ်သိုၵ်းၾၢႆႇပလိၵ်ႈ ထုၼ်းထုၼ်းၼၢႆႇ လဝၵ ဝဵင်းတႃႈၶီႈလဵၵ်း ႁူမ်ႈၵၼ်ပိုတ်ႇႁွင်ႈ ၵၢၼ်ၵူတ်ႇထတ်းၵူၼ်းမိူင်းၵွၼ်ႇၶဝ်ႈမိူင်းထႆး တီႈၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး ၸိုင်ႈထႆး။